اقرأ قصيدة جديدة:سِفْر للشاعر أحمد عبد الجواد

فى البدء
الأب واقف
والأخ يقتل أخوه
الزمن زى
أول نبى بعد انتشار القتل فى الدنيا
نوح طوق الحمامة
هو طوق النجاة للبائسين فى البحر
يرتجو الهرب
الغراب
أول صنيع الكُفر بين جِنس الطيور
وجد المياه اختفت
دوّر على عشه
إدريس نبى الحكمة
أدرك حدود الفهم فقال:
أما بعد..
يونس
تسبيح الوحيد
هو تسبيح الملايكة
والنهار
مش معنى الضلام فى الحوت
المعمدان
راحت رقبته
نتيجة
انهيار القصر
يوسف
زى ما انهزم فى الحرب
قرر
يرعب اخواته الجواعة
ويحتفظ بالنصر
يعقوب
نبى ترك ولاده يعرفوا
يعنى ايه الحب خير
موسى
لم ينتحر
إنما مات
بعد ما فقد الطريق فى التيه
عمران
طيب رجال الأرض
كانت مهمته يجيب مريم للحياة
تبقى كِلْمِةْ ربنا بتمشى وسط الناس
إوعاك تزعل لما تجيك البنت
إبراهيم
روح الأنبيا الخالصة
أُمَّةْ بتدْعِى الخير
يجيها بُكا من وحشة الغربة
إبراهيم
صلاة الفجر والتسابيح
أول طريق الهنا ع الأرض
ضحى بفَرْحُه
فكانت فِدْيتُه
انتزاع الحزن من جوفه
عيسى
فى
انتظار
نزوله
يمكن
تكون
الأرض
أحلى
محمد
سهم الحنين فى بياض الجنة
انت انهزام الحزن
اشتهاء الحنين للجرح
جوف الحيارى
رجفة الفرح
ربطة حجر ع "البطن"
صوت الآدان والشفا
انتهاء نزول جبريل للأرض
انت بحور الشعر
واشتهاء النثر
ومتعة السرد
وكان السرد
مابين الدفة والتانية
وعود كبريت بيلسع ضلك العارى
وحوت بيموت
ويدينا طريق الانتحار بالأجر
طريق من ريحة المختار
وعنبر لما بتشمه
تحس الدفة بتميِّل
على كونك بديع الصنع والأيام
على نجمة تضل المُهْتَدِى فى طريق
ولا يمشى ف "طريق" خارج حدود الأَسْر
ولا تتنافس الأمواج على حِمْل المواكب نصر
بييجى الطيف ويتحول لشيئ يشبه
حكاوى الأنبيا فى الصيف
حكاوى الأنبيا والسرد كان فرحة
مكانش زاد ولا كان طريق
ما بين بنين تقدر تقول:
متعلقين بالفرح قش
والقش فوق موج الحياة
والمركب إن كانت طريق للمعرفة
فالكون يساع حرف الحروف
والألسُنات مرتجفة خوف
يا إجابة محتاجة لسؤال
الكون طريق
والجهل شَهْد المعرفة
بيترجم العبارات سطور
محفورة ف جبين النبى
ويصدَّر المعنى الغَنِى
وبيحفظ السطر الفقير
صلى فى معرفة الحاجات
واتشهِدْ العبارات ندم
حاذر لتوصل
الأمور مش زى بعض
الأبيضات وردة حبيب
هل توب كفن؟
بيوارى روح الأنبيا
العقل مسمارك فى نعش الأنبيا
والنعش متغطى بعذاب المحرومين
والطوق ذليل
عدرا اليتيم
يا سباق "جليل" فى خيل سَبَقْ
سدِّك ضياع مأرب سبأ
والضلة فى جنينة سيادك من ورق
عرق الغراقى الماسكين روح العواصف
طب ليه كسرت اللوح؟
سفينة الفقر محتاجة المسير
سيبت العيال
وسافرت مش ناوى تعود
"طب مين هايحمى الكنز فى غيابك"
والخوف نقر فى قلوبنا نقار الخشب
كان النبى
ومفيش نبوة بدون ألم
سلِّم رقبتك واندبح
طب مين هايفهم إن فدية عيال الحزن
ضحكة هاتتنبه بيها تكون أول رسول للفرح