ثورة اليكترونية مصرية ساخرة على صفحات شاكيرا واوباما وفان ديزل تحت شعار “قولوا للمشير يسلم السلطة نسلمكم الصفحة”

* شباب فيسبوك وتويتر يعلنون انطلاق ثورة 10 ديسمبر.. وعشرات الآلاف من التعليقات على صفحات المشاهير
* شباب يرشحون الشعب المصري لجائزة الألش .. وأخرون ينشئون صفحة إحنا أسفين يا فان ديزل
* تعليقات على صفحة أوباما الشعب يريد إسقاط المشير.. اوباما قول للمشير يسلمنا السلطة وإحنا نسلمك الصفحة
* - أوباما ... معلومة بسيطة... الشعب المصري مبيزهقش ... يعني عندك كده كل يوم لحد ما أمريكا تبقى دولة عربيه
كتب – تامر المهدي :
”ثورة اليكترونية ساخرة وحركة شباب 10 ديسمبر” حركات أعلنت عن وجودها بعد ساعات قليلة من انتشار عدوى التعليقات الساخرة على صفحات الفنانين والمشاهير والصفحات الرسمية لتصل لعشرات الآلاف بعد قيام الممثل والمخرج الأمريكي العالمي فان ديزل بنشر صورة له على صفحته الخاصة وهو في احد المناطق المصرية . وكان التعليق الأكثر انتشار هو قولوا للمشير يسلم السلطة نسلمكم الصفحة
وكان ديزل قد قام بنشر صورة له على صفحته الخاصة على شبكة “فيسبوك” وكتب عليها تعليق(مصر ..ابتسامة واحدة تختبئ بين أصابعها) وخلال لحظات تم مشاركة الصورة أكثر من 10 ألاف مرة فيما توالت التعليقات الساخرة لتنتشر بعدها “عدوى” احتلال الصفحات بالتعليقات كما حدث بصفحة الرئيس الأمريكي باراك أوباما وشاكيرا والمجلس الأعلى للقوات المسلحة وأنا أسف يا ريس ومنها شعارات
(الشعب يريد إسقاط المشير- – اوباما قول للمشير يسلمنا السلطة وإحنا نسلمك الصفحة- أوباما ... معلومة بسيطة... الشعب المصري مبيزهقش ... يعني عندك كده كل يوم لحد ما أمريكا تبقى دولة عربيه ).
فيما نالت صورة ديزل على صفحته الشخصية في إحدى المناطق الشعبية المصرية والتي تضم أكثر من 28 مليون معجب النصيب الأكبر من التعليقات ومنها
- ديزل:لو سمحت طلع المصريين من الصفحة بتاعتي
- طنطاوي :نعمل استفتاء الأول
- المجلس العسكري : نناشد أبناء مصر الشرفاء ترك الووال لفان ديزل لأن هناك أيادي ثالثة تكتب كومنتات قبيحة
- عكاشة : لو قلت لي يا سي ديزل اسم الولية بتاعة الجرجير اللي جنبك هنسيبك تكمل تصوير
- دلوقتى الداخلية تنزل ويقولوا إحنا كنا بنحمى الصفحة من المصريين بعد محاولتهم اقتحامها-
– إحنا مطالبنا واحده ...العسكري يسلمنا السلطة إحنا نسلم ديزل الصفحة الوقتي-
- بكره هيطلع العيسوي يقولك إحنا معندناش فان ديزل..و يطلع عمرو مصطفى يقوله أنت يا فان بتبص شمال عايز تقول إن الشعب المصري ماشي شمال .. لا هتلاعبني بالاتجاهات هلاعبك
- وييجي عكاشة يقوله لو أنت بتعرف دكر البط بكام في السوق إنا ممكن أرشحك لجايزة أوسكار
- أول بوست لفان بكرة علي الصفحة أنا أسف يا مصريين حقكوا عليا سيبوني بقي آكل عيش الله يخليكم
- والنبي أنت برنس يا فان ..... لا وإيه عليك هيبه ولا بتوع السيما
- ولا يا ديزل تعرف غسان مطر
- طب تعرف تقول قميص نفيسة نشف ولا لسه منشفش؟ -
- فيه إيه الصورة دي متصورة في شارع الحكومة ومن حقنا نعلق عليها
- مرتضي منصور بيقولك يافان ياديزي مش هاسيب حقي اللي عندك ونتقابل في المحكمة
- عاجل: بيان المجلس العسكري بخصوص نزول فان ديزل لمصر يهيب المجلس العسكري بالشعب المصري ألا ينساق وراء الإشاعات المغرضة والأيادي الخارجية التي تعبث بمصلحة امبابة وبولاق الدكرور
- عاجل : المجلس العسكري :التعديلات الدستورية لن تشمل بيدج فان ديزل
- عاجل : اوباما يدعو فان ديزل لضبط النفس لما يحدث فى البيدج بتاعته
- عمرو مصطفي : فوتوشوب
- عكاشة : طبعا جاي يتطمن علي المؤامرة الماسونية بتاعت أمريكا
- اسبايدر : و الله يا بلد انتو مش عارفين ديزل ده جاي مصر يعمل ايه و أنا الوحيد الي عارف
- مرتضي : معايا كل الدلائل الي تسبت إدانه ديزل في السي دي
- شلبي : ديزل ده حبيبيي(.
وقام البعض باقتراح ترشيح الشعب المصري لجائزة”الألش”بعد قيام الآلاف من الشباب بزرع عشرات الآلاف من التعليقات الساخرة على صفحات عدد من الفنانين والمشاهير والسياسيين حتى وزارة الدفاع الإسرائيلية.
ولاقى الترشيح للجائزة “الألش” قبولا كبيرا كما اقترحوا إنشاء صفحة بعنوان “إحنا اسفين يا فان ديزل” عشان ميزعلش، فيما أنشأت صفحات للثورة الاليكترونية على المشاهير وحركة أطلقت على نفسها شباب 10 ديسمبر وموقعة التعليقات والتي قامت بنشر روابط عدد من صفحات المشاهير ودعت الى اقتراح المزيد.