عمار ياسر : عن المجتمع المدني

قدامنا حالتين محتاجين النظر ليهم بتمعن ، أول حالة إن فيه ناس من بره المجتمع المدني فاكره إن منظمات أو مؤسسات المجتمع المدني من ضمن شغلها أو أحد أدوارها إنها تطلع بيانات إدانة ضد تشكيلات إجرامية أو عصابات أو فرق إرهابية … إلخ ، لدرجة إن البعض كانوا بيقولوا ليه المنظمات الحقوقية ما أدانتش عمليات الإرهاب ضد الجنود إللي استشهدوا ع الحدود .
وتاني حاله إن فيه ناس من جوه المجتمع المدني فاكره إن شغلتها هو التطبيل للحكومات .. أو إنهم ينزلوا أخبار عن جهود أحد الهيئات الحكومية في مجال ما والتهليل ليها .
خلينا الأول نقول إن الحكومات (بفرض إن الشعب حر وبيفهم حقوقه) المفروض فيه حاجتين أساسيتين محركين ليها: (الضرايب إللي من جيب المواطن .. والدستور وكل التشريعات المنبثقة منه) .. إللي المفروض في الديموقراطيات مصدرها المواطن برضه .. وبما إن الحكومات دورها تيجي تعمل خدمات عامة بفلوس المواطنين .. فهي بالتالي خاضعة لكل أنواع الرقابة المالية والتشريعية .. ثم الرقابة ع الأداء .. وأوجه الرقابة متعددة .. ومؤسسات المجتمع المدني جزء منها .
وده يوصلنا لفك طلسم الحالة الأولى .. المجتمع المدني (إللي هو تجمع سلمي لمواطنين من أجل هدف) شغلته الأساسية والوحيدة هي التعامل مع المؤسسات الحكومية ورقابتها وتحسين أداءها وتقديم الرؤية واضحة للمجتمع (زي المنظمات الحقوقية) أو لفئة معينة من الناس ليهم منافع (زي النقابات والتجمعات المهنية والنوادي والجمعيات الخيرية … إلخ(
وبالتالي .. حتى في مثال حالة حدوث جريمة أو هجوم إرهابي .. دور المجتمع المدني رقابة تعامل الحكومة مع الحادث ورقابة إتباعها الإجراءات التشريعية بما لا يتعارض مع الدستور والمبادئ العامة المتفق عليها سواء مع الضحايا (في الإتيان بحقوقهم) أو مع المجرمين (من أول القبض عليهم لحد التحقيق معاهم وإدانتهم أو تبرئتهم … إلخ(
بمعنى: لو طلعت منظمة أو مؤسسة مجتمع مدني تدين أي حد ما تبقاش مجتمع مدني .. وإنما مؤسسة "أمنية" لأن مش شغلتها إدانة حد (زي الصحافة والإعلام عندنا ما بيعمل حتى قبل نتيجة أي تحقيق) .. ولو أي حد بيطالب منظمات المجتمع المدني بإنها تدين تنظيم أو تجمع أو تشكيل إجرامي يبقى في الغالب مش فاهم معنى مجتمع مدني م الأساس .
أما في الحالة التانية فأظن بقت واضحة من الشرح إللي فوق .. إنه بما إن المجتمع المدني دوره رقابي على أداء الحكومات .. فأي حد شغال في مجتمع مدني أو أي مؤسسة مجتمع مدني بتطبل لحكومة أو لنظام أو قاعدة بتهلل فدي ما تبقاش مجتمع مدني وإنما مجتمع حاجة تانية !!