سخرية على تويتر من “حجاب تمثال حوريات البحر”: النهاردة غطوا الحوريات.. بكره يركبوا لأبو الهول دقن

تمثال حوريات البحر نقلاً عن المصري اليوم
* أبرز التعليقات: “كلنا حوريات البحر”.. “أنا عايز أختي تمثال الحوريات الإغريقي”
* تعليق : حتى تماثيل حوريات البحر هيحجبوه.. يالهوي.. آدي نتيجة الكبت وأكل جير من الحيطة
* دول ممكن يبنوا سد في النيل لمنع اختلاط السمكة بالقرموط.. و” حوريات البحر سمعت شريط أختاه فاتحجبت عن اقتناع”
كتب – إسلام الكلحي:
دشن نشطاء على موقع التواصل الاجتماعي تويتر حملة للسخرية من قيام سلفيون بتغطية تمثال “حوريات البحر” بميدان الرأس السوداء بالإسكندرية بالقماش والحبال، وذلك أثناء مؤتمر انتخابي لحزب النور السلفي .
وقال أحد الأشخاص ساخرا ” السلفي اللي مش عاجبه حوريات البحر يغض البصر.. النظرة الأولى ليك والثانية عليك”، وتساءل آخر “هي حوريات البحر مثيرة أوي كدة؟ “، وقال آخر السلفيين غطوا تمثال حوريات البحر بعد ما ظبطوا عيل بيتحرش بالتمثال قبلها بيومين”.
وجاءت بعض التعليقات على النحو التالي :
* طب كانوا يلبسّوا حوريات البحر بادى كارينا.. أهو يسترهم ويفضلوا باينين بدل الكفن الملون دة.
* قالك تمثال حوريات البحر سمعت شريط أختاه أختاه أختاه بتاع حسين يعقوب, فاتحجبت عن اقتناع.
* النهارده غطوا حوريات البحر .. بكره يركبوا لأبو الهول دقن.
* بعد تكفين تمثال حوريات البحر.. حاسس انهم هيركبوا دقن لابو الهول وجلبيه بيضا قصيره لتمثال رمسيس.
* السلفيون يقومون بتغطية تمثال حوريات البحر وصبحى صالح يدين الواقعة ويقول إن الحجاب أمر شخصي يرجع إلى التمثال ولا يجب فرضه عليه بالقوة.
* السلفيون كفنوا تمثال حوريات البحر. ده تمثال يا جهلة مش واحدة من الأخوات.
* طيب .. كلنا حوريات البحر.
* أنا عايز أختي تمثال الحوريات الإغريقي.
* افكر جدياً في تدشين حملة “اقلع هدومك” رداً علي اصحاب الرأي بضرورة حجاب تمثال حوريات البحر ومنع الناس من ارتداء البكيني .
* والله غباوة السلفيين دي هاتخلينا ندافع عن الفن القبيح بتاع حوريات البحر .
* اه بالحق أنا سمعت إن السلفيين غطوا تمثال حوريات البحر .... وهيغيروا اسم حارة اليهود ل حارة المؤمنين .... ايه الهبل دا ؟؟؟
* حتى تماثيل حوريات البحر هيحجبوه .. يالهوي .. آدي نتيجة الكبت وأكل جير من الحيطة
* حتى لو تمثال أم دعبس بائعة الجرجير .. طالما مؤنث تتغطى دول ممكن يبنوا سد في النيل لمنع اختلاط السمكة بالقرموط