نص التحقيقات مع والدة قتيل طره: دخلت التلاجة عشان أشوفه لقيت وشه وارم ومناخيره لونها ازرق وعلى بقه رغاوى ودم

* سمعت عصام بيصرخ ويقول الحقينى يا أمه وضابط حطله خرطوم وشربه 2 لتر ميه بمسحوق غسيل .
* كان معايا 6 شنط فيهم أكل ومكرونة وفول ورز وزيت وسكر وشاي وفاكهة وبطانية وملاية و ملابس وخط اتصالات .
* عصام كان عاوز أبوه يشتكى نور حسن للنائب العام بس أخوه محمد كلمه وقاله انه لو قدم شكوى هيتعذب زيادة
* فتشونا على الباب الرئيسي وحطوا الحاجات اللي معانا على جهاز علشان يشوفوا فيها ممنوعات ولا لا وبعد كدا فتشونا بمعرفة وحداة ست
* أثناء الزيارة كنت أنا وأيه وبنتي وعصام و مسجون أهله بيزروه ومسجون ثالث بيعمل شاي غير الشرطة اللي كانوا موجودين
كتب – عاطف عبد العزيز :
حصلت البديل على نص التحقيقات التي أجرتها النيابة مع والدة عصام عطا قتيل التعذيب بسجن طره، والتي قالت فيها أنها سمعت ابنها يصرخ أثناء ضرب الضابط له بعد إخبار أحد المساجين له أنه ابتلع مخدرات ، بسبب خلاف قديم على 5جنية ، وقالت أن الضباط أخرجوهم وطلبوا إنهاء الزيارة ،وأنها سمعت ابنها وهو يصرخ .
وقالت أنهم وضعوا بطانية على الشباك بعد إخراجها وابنتها وحبيبة ابنها حتى لا يروا التعذيب .
وأكدت أنها انتظرت للعصر وحاولت الدخول ولكنها لم تستطع وحينما كلمته في المساء رد زميله عليها وأخبرها أن ضابط وضع خرطوم لعصام في فتحة الشرج وشربوه حوالي 2 لتر ميه فيهم مسحوق .
وإلى نص التحقيقات :
س :ما الذي حدث
ج: اللي حصل إن ابني عصام على عطا كان أتقبض عليه 25/2/2011 بتهمة الاستيلاء على مسكن بحي المقطم وبتاريخ 26/2/2011 اتحكم عليه بسنتين سجن حكم عسكري وبعد كدا راح سجن الاستئناف وقعد هناك3 شهور وكنت بزوره كل أسبوعين وبقالي 3 شهور مزرتوش لحد ما رحت زرته يوم الثلاثاء اللي فات 25/10/2011كانت معايا واحدة جارتنا اسمها أيه وبنتي الصغيرة سلمى كنت وخداهم معايا عشان الشنط كانت تقيلة ولما دخلنا الزيارة قابلنا عصام وكنا قاعدين على كوفرته على الأرض
وكان معانا واحد مسجون تاني في الزيارة مع أهله وكان في واحد تأنى بيعمل شاي مسجون وعرفت من عصام إن ليه عنده خمسه جنية رفض يدهالوا وشد معاه في الكلام وقال انه هيتصافى معاه لما يدخل جوه
وأنا قلت له سيب الخمسة جنية زكاه عنك واديتوا الزيارة واديته شريحة تليفون كنت شيلاها مع أيه ، ولما ادناله الشريحة هو اداها لزميله المسجون اللي كان موجود علشان هو اقدم منه وساعتها المسجون اللي بيعمل الشاى شاف ابني وهو بيدى الشريحة لزميله فبلغ ظابط اسمه نور وبلغله باللى حصل
وطلبوا ينهوا الزيارة وراحوا مطلعنا بره واحنا خارجين سمعت عصام بيصرخ وبيقول الحقينى يا امى وبعدها زقونى بره وقفلوا الباب بصيت على الشبابيك السلك لقيتهم حطوا البطانية والكوفرته على الشباك علشان منشفهمش .
واستنينا بره لحد العصر بنحاول نعرف ندخل معرفناش وبعدين روحت وحاولت اتصل على تلفون كان بيكلمنى منه ابني لقيته مقفول وبعدها بساعة التلفون اتفتح وعرفت من واحد مسجون رد عليا ان ابني حطوله خرطوم في فتحة الشرج وشربوه حوالي 2 لتر ميه فيهم مسحوق غسيل بعدها باربع ساعات لقيت ابني بيكلمنى من الخط القديم اللي كان جوه السجن وحكالى وقالى ان الضابط نور بيعذبه وحطله خرطوم في فتحة الشرج وشربه حوالي 2 لتر ميه بمسحوق وساعتها قفل وكلمنى تأنى الساعة 11 مساءا وطلب اشحنله رصيد على الخط اللي أنا ادتهوله عشان كان عاوز يتكلم مع أبوه واخواته فعلا شحنتله كارت بعشره وكلمته واتأكدت ان الرصيد وصل ولما روحت هو اتصل بابوه وطلب منه ان يقدم شكوى للنائب العام بسبب التعذيب اللي حصله من الظابط نور حسن وساعتها محمد أخوه كلمه وشدوا مع بعض في الكلام وقاله انه لو قدمنا شكوى هيتعذب زيادة وقفل على كدا .
وكلمنا تأنى يوم الاربعاء 26/10 الساعة 11 مساءا سأل عليها وطلب منى تأنى اشحنله كارت بعشره وفعلا شحنتله كارت واتأكدت انه وصل وانقطعت معاه الاتصالات من وقتها لحد يوم الخميس حوالي 4 العصر كلمتنى واحداة جارتنا اسمها فايزة من عابدين وقالتلى ان عصام تعبان في المستشفى .
وطلبت ان احنا نروحله ساعتها وبعدها أيه كلمتنى وطبت منى اقابلها في السيدة عيشة عشان عرفت ان ابني تعبان وبيموت وفعلا لفيت معاها على مستشفيات كتير لحد لما رحت القصر العينى وعرفت ان ابني في مركز السموم ولما رحت عرفت ان ابني توفى وموجود في التلاجة ولما دخلت التلاجة عشان أشوفه لقيت وشه وارم ومناخيره لونها ازرق وعلى بقه فيه رغاوى مختلطة بالدم وبطنه مفتوحة وجسمه كله وارم .
س: منذ متى وابنك عصام على عطا مقيد الحرية
ج: 25/2/2011 تهمة الاستيلاء على مسكن وصادر فيها حكم سنتين عسكري يوم 26/2
س: وما الذي حدث عقب صدور حكم الحبس لنجلك
ج: هو تم ترحيله على سجن الاستئناف قعد فيه حوالي 3 شهور ونقلوه من شهر 5 او 6 على طره شديد الحراسه
س: وكم عدد المرات التى قمتى بها بزيارة نجلك أثناء تواجده بالسجن
ج: وهو موجود في سجن الاستئناف كنت بروح له كل اسبوع لحد ما تم نقله في سجن طره
س: وهل قمتم بزيارته بعد تواجده بسجن طره
ج: كنت بروح له كل أسبوعين بس انقطعت عنه الزيارة من 3 شهور
س: وما سبب ذلك الانقطاع
ج: بسبب الظروف المادية
س: وما الذي حدث عقب ذلك
ج: اول مره اروح له بعدها كان يوم الثلاثاء 25/10/2011
س: ومين برفقتك انذاك
ج: كانت معايا واحداة جارتنا اسمها أيه وبنتي الصغيرة سلمى وكان معانا زيارة أكل واخدنا لعصام
س: وما الذي كانت تحتويه تلك الزيارة والتي من المفترض تسلمها للمجنى عليه أثناء زيارتك
ج: أنا كان معايا 6 شنط فيهم أكل عبارة عن مكرونة وفول ورز وزيت وسكر وشاي وفاكهة وبطانية وملاية وبعض الملابس ده غير انه كان طالب منى خط اتصالات عشان يبقى معاه جوه السجن ودا أنا كنت شيلاه مع أيه عشان تدهوله في الزيارة
س: وهل توجهتى لزيارة نجلك المجنى عليه صباح يوم 25/10
ج: ايوه
س: ومتى تحديدا وصلتى للسجن
ج: أنا وصلت 8 ص وعلى ما دخلنا كانت الساعة كانت 2 الضهر
س: وما هى الإجراءات المتبعة أثناء دخولك من داخل السجن من ناحية التفتيش الخاص بالزائرين وما بحوزتهم
ج: هما في البداية فتشونا على الباب الرئيسي وبيحطوا الحاجات اللي معانا على جهاز علشان يشوفوا فيها ممنوعات ولا لا وبعد كدا بيفتشونا بمعرفة واحداة ست ، بعد كدا بنركب وندخل جوه
س: ما الذي حدث بعد ذلك
ج: دخلنا على الزيارة في اوده كبيرة وقعدنا على الأرض لان ابني كان فارش كوفرته على الأرض
س: ومن الذي كان متواجدا مع ابنك في الغرفه
ج: كان موجود ابني عصام وانا وايه وسلمى وكان في واحد تأنى مسجون كان أهله بيزروه وواحد مسجون ثالث بيعمل شاي دا غير بتوع الشرطة اللي كانوا موجودين أثناء الزيارة
س: وما هى الحالة التى كان عليها نجلك عقب مشاهدتك له انذاك
ج: كان وشه وارم ساعتها
س: وهل قالك على سبب ذلك
ج: ايوه
س: وما الذي قاله لك بشأن ذلك
ج: هو قالى انه مضروب من الظبابط الى اسمه نور حسن
س: وهل وقفتى على سبب قيام الظابط نور حسن بالتعدى على نجلك محدثا به الاصابات التى شاهدتيها أثناء الزيارة
ج: ايوه
س: وهل من ثمه اصابات شاهدتيها بنجلك
ج: لا مكنش فيه اى اصابات غير وشه اللي كان وارم
س: وما الذي حدث أثناء تلك الزيارة
ج: أثناء الزيارة أنا عرفت انه كان ليه خمسه جنيه عند المسجون اللي بيعمل الشاى في الزيارة وطلبها منه ورفض يدهاله وقاله لما نبقى ندخل جوه وانا قتله سبها زكاه عنك وايه اداتله شريحة الموبيل اللي كان طالبها
س: وما هو رقم تلك الشريحة
ج: أنا اديته شريحة رقمها 01555164916
ملحوظة : ( قدمت لنا الحاضره علبة كرتونة خاصة بشرائح الهواتف المحموله مدون عليها ذات الرقم والتي قررت تسليمها لنجلها )
س: وما الذي حدث عقب تسليم نجلك تلك الشريحة
ج: أيه هى اللي ادت الشريحة لابنى واخدها منها واداها للمسجون التانى واللى كان موجود في نفس الزيارة ساعتها
س: وما سبب قيام نجلك باعطاء تلك الشريحة لذك المسجون
ج: عشان المسجون التانى قديم عشان هو يدخلها
س: وهل معلوم لك اسماء المساجين الذين تواجدوا
ج: لا
س: وما الذ حدث عقب ذلك
ج: لما ابني ادى الشريحة لزميلة المسجون زميلة التانى اللي كان بيعمل الشاى شافه وبلغ بتوع المباحث اللي راحوا قالوا لنور ان ابني بيبلع حاجة والكلام دا مش صحيح وساعتها نور قالهم ينهوا الزيارة وخلونا نخرج بره وهما بيقفلوا الباب سمعت ابني وهو بيصرخ وبيقول الحقينى يا امى
س: وما الذي تناهى الى سمعك تحديدا انذاك
ج: أنا سمعته بيصرخ وبيقول الحقينى يا امى
س: وما التصرف الذي صدر منك عقب استغاثته
ج: أنا لفيت عشان أشوفه من خلال الشبابيك السلك بس هما كانوا حطه البطاطين والكوفرته على الشبابيك علشان منشفش حاجة
س: وهل وقفتى على سبب تلك الاستغاثة
ج: لا معرفتش هو بيصرخ ليه
س: والى اين اتجهتى عقب ذلك
ج: بعدها أنا روحت وفضلت اتصل على الرقم اللي كان بيكلمنى منه والرقم دا غير الرقم الجديد اللي اشترتهوله وادتهوله في الزيارة
س: وما هو رقم ذكل الهاتف المحمول الذي حاولتى الاتصال على نجلك عليه
ج: أنا معرفش رقمة بالضبط ولكن االرقم دا مع أيه
س: وهل اعتاد نجلك مهاتفتك من خلال ذات الهاتف المحمول أثناء ما كان محبوس في سجن طره
ج: كان على طول بيكلمنى من رقم اللي بتعرفه أيه لحد ما اشترت له خط جديد
س: ما الذي حدث عقب انصرافك من زيارة نجلك
ج: بعدها روحت وكنت بحاول اتصل بيها بعدها واحنا في الطريق أيه اتصلت فرد عليها مسجون وقالها عصام راح التأديب.
وقال انه حطوله خرطوم في فتحة الشرج وشربوه ميه باريل
س: وما التصرف الذي بدر منك عقب قيام من تدعى أيه باجراء ذلك الاتصال اليها والذى علمت من خلاله بما حدث لنجلك المجنى عليه
ج: أنا بدأت اصرخ بعدها باربع ساعات اتصل بيا ابني بلغنى باللى حصل معاه وطلب منى ابلغ والده
س: وما الذي ابلغك به نجلك
ج: قالى انه هما دخلوه التأديب وانهم حطوله خرطوم ميه في فتحة الشرج وشربوه حوالي 2 لتر ميه باريل واخدوا منه الزيارة لولا زمايله في السجن اللي دخلوا للضابط نور وقالوا له ان مبيشربش حاجة وملوش في اى حاجة علشان كدا خرجه من التأديب بس قالى انه هو تعبان
س: وهل قرر لك نجلك اسباب ذلك الاعياء انذاك
ج: قالى انه اضرب واتبهدل وقالى موضوع الخرطوم وطلب منى انى مبلغش انى هشتكى الظابط نور
س: وما هى الفترة الزمنية التى استغرقتها تلك المكالمة تحديدا
ج: هى ما تزدش على نصف ساعة وتزيد على ربع ساعة
س: وهل كانت تلك المكالمة الهاتفية من الشريحة التى استلمها منك أثناء الزيارة
ج: لا دى كانت من تلفون قديم جوه السجن
س: وما الذي حدث عقب ذلك
ج: في نفس اليوم اللي هو يوم الثلاثاء 25 /10 الساعة 11 مساءا عصام اتصل بيا تأنى من نفس الرقم القديم وطلب منى اشحنله الرقم الجديد عشان عاوز يكلمنا منه وبالفعل أنا شحنتله كارت بعشره
س: وما تحديدا حدثت اول مكالمة هاتفية من شريحة الهاتف المحمول والتي قمتى بتسلمها لنجلك والذى قررتى سلفا بالتحقيقات انها تحمل رقم 01555164916
ج: بعد ما شحنتله كارت بعشره المكالمة كانت الساعة 11 مساءا
س: وعلى اى هاتف محمول قام المجنى عليه بمهاتفتك من الخط سالف البيان
ج: مش فاكره
س: ما فحوى الحوار الذي حدث خلال تلك المكالمة
ج: هو كلمنى طلب يتكلم مع والده وكان عاوز أبوه يروح يشتكى نور حسن للنائب العام بس أخوه محمد كلمه وشد معاه في الكلام وقاله انه لو اتقدم شكوى هو هيتعذب زيادة
س: وهل تلك المكالمة يقوم بها المجنى عليه اليكم من الهاتف المحمول
ج: ايوه
س: وما هى الفترة الزمنية التى استغرقتها تلك المكالمة الهاتفية
ج: حوالي ربع ساعة
س: وما الذي حدث عقب تلك المكالمة
ج: بعد ما عصام كلمنا وكلم أبوه واخوه قفل وانقطعت الاتصلات لحد ما اتصل بينا تأنى يوم الاربعاء 26/10 الساعة 11 بالليل
س: وما مضمون تلك المكالمة
ج: هو طلب منى اشحنله كارت تأنى بعشره وشحنتله وساعتها قالى روحى علشان هيتصل بينا هو
س: هل قام بمهاتفتك عقب ذلك
ج: ايوه هو اتصل لما روحت وكلمنى وكلم أبوه وسأله اذا كان قدم شكوى في نور حسن ولا لا وابوه قاله انه هيقدمها ومحمد أخوه كلمه ساعتها وشد معاه في الكلام وقاله خليك راجل علشان لو اتقدمت شكوى هتتأذى بعدها قفل وعرفت من بناتى الاثنين بعدها ان هو اتصل وكلمهم عشان يطمن عليهم وبعد المكالمة دى معرفتش حاجة غير انه في المستشفى .
س:وكيف نما الى علمك بكون نجلك متواجد في احدى المستشفيات
ج: يوم الاربعاء لما كلمنى قالى انه تعبنا ويوم الخميس حوالي الساعة 4 العصر اتصلت بيا واحده جارتى اسمها فايزة من عابدين قالتى ابنك تعبان اوى في المستشفى روحى شوفية وبعدها مباشرة كلمتنى أيه وطلبت منى اقابلها في السيدة عيشة عشان نروح نشوف عصام
س:وكيف نما الى علم المدعوه فايزة بكون نجلك مريض انذاك
ج: فايزة عرفت من بنتى الكبيرة اسمها ياسمين بأن في واحد اتصل بياسمين وقالها ان عصام تعبان
س: وما هو الاسم الثلاثى لفايزة
ج: فايزة ده اسم الشهرة والاسم الحقيقى ليها زينب احمد خليل ومقيمة في 4 حارة عبد الدايم عابدين
س: وكيف نما الى علم من تدعى أيه بكون نجلك مريض
ج: معرفش
س: ما التصرف الذي بدر منك عقب علمك
ج: أنا قابلت أيه في السيده عيشة 5 مساءا ولفينا على مستشفيات كتير لحد ما رحت القصر العينى حوالي الساعة 8 عرفت ان ابني في مركز السموم الى بجوار طب اسنان
س: وما التصرف الذي بدر منك انذاك
ج: رحت مركز السموم وهناك مفيش حد كان راضى يدينى معلومات لحد ما عرفت ان ابني توفى وانه هو في تلاجة وساعتها كان أبوه واخواته جم ودخلت ان اوابوه التلاجة بالعافية علشن اشوف عصام
س: وما هى الحالة التى شاهدت نجلك عصام عليها
ج: أنا لقيته نايم ووشه وارم ومتغطى ببطانية ومناخيره بتنزف دم وجمسه وارم وبطنه منفوخة وكان فيه رغاوى على بقه من المسحوق اللي كان شاربه مختلط بالدم
س: وما الذي حدث بعد ذلك
ج: بعدها احنا طلعنا من التلاجة لحد لما ابني ودوه المشرحة ودا كل اللي حصل
س: وهل كان نجلك متعاطى لاى مواد مخدرة
ج: لا
س: هل كان نجلك يعانى من اى امراض نفسية وعصبية
ج: لا
س: هل كان نجلك المتوفى يتناول ادوية او عقاقير مؤثرة على الصحة النفسية والعصبية
ج: لا
س: كم عدد المرات التى اتصل بك من الهتاف المحمول الجديد
ج: مرتين
س: وعلى اى هاتف محمول تحديدا يهاتفك من خلال هذا الرقم
ج: مش فاكره
س: وكم عدد المرات التى قام نجلك بمهاتفت والده انذاك
ج: مرتين من نفس الرقم
س: ما سبب قيام الضابط بالتعدى على نجلك
ج: معرفش
س: وما هى الافعال المادية التى مورست قبل نجلك
ج: ضربوه وعذبوه دا غير انهم حطوله خرطوم في فتحة الشرج وشربوه 2 لتر ميه مسحوق غسيل
س: ما قولك فيما قرره احمد السيد صديق من انه عقب عودة نجلك عقب توقيع الكشف الطبى قرربقيامه بتناول اقراص وعقاقير ومواد مخدره أثناء الزيارة الخاصه به
ج: الكلام دا محصلش لان أنا اتفتشت أثناء الزيارة
س: وما تعليقك فيما قرره سالفى الذكر
ج: الظباط هددهم
س: ما علاقتك بالظابط نور حسن
ج: أنا معرفوش ومشفتش شكله
س: ما قولك فيما قرره نجلك محمد عطا من ان الهاتف المحمول الذي قمتى بادخال شريحته للمجنى عليه يحمل رقم 01155164916فى حين اقرارك سلفا في التحقيقات تحمل رقم 01555164916
ج: ده الرقم الى ناا دخلته لابنى واللى أنا قدمت كرتونه بتاعته النهارده تحديدا
س: بما تتهمى الظابط نور حسن
ج: أنا اتهمة بموت ابني
س: هل لديكى اقوال اخرى
ج: لا
س: ومن تحديدا الذي قام باتيان تلك الافعال
ج: ضابط اسمه نور ومعاه 3 مباحث معرفش اسماءهم
س: وكيف نما الى علمك بوجود 3 افراد برفقته
ج: ابني اللي قالى انه هما الثلاثة اللي كانوا موجودين أثناء الزيارة وطردونى بره
س: وما قصد الضابط نور ومرافقيه من افراد الشرطة
ج: معرفش
س: ما قولك فيما قرره كل من احمد السيد عبد الرحمن واحمد السيد صديق ومحمد على السيد والسيد عثمان محمد وسيد رزق من انهم قد ابصروا نجلك المتوفى وهو في حالة اعياء شديد وسؤاله عما اصابه قرر لهم بتناوله طعام فاسد
ج: لا محصلش
س: ما قولك فيما قالوه انه عقب ذلك فانه قد تم عرضه على طبيب مستشفى السجن والذى قام باسعافه الى ان تم عودته لمحبسه وتحسن حالته
ج: ده محصلش