عرضت فضائية «الحياة»، تسجيلًا منسوبًا إلى الرئيس الأسبق حسني مبارك، أثناء مكالمة هاتفية مع صحفي بجريدة المصري اليوم. وجاءت نص المحادثة بين مبارك، والصحفي على النحو التالي .. محسن: إزي حضرتك؟ مبارك: أيوه يا محسن ربنا يخليك. محسن: نفسنا نشوفك والله يا افندم ونقعد نسمع حضرتك ونتكلم معاك. مبارك: إن شاء الله شوفوا لكم 3 أو أربعة كده وتيجوا تقعدوا معايا شوية. محسن : ياريت يا افندم، حضرتك مع السيسي ولا مش معاه؟ مبارك : ما قدامكوش غير السيسي دلوقتي. –: طاب يا افندم إنت مطمن على مصر والإخوان موضوعهم انتهى؟.. محسن : خايفين على أولادنا وبيوتنا وعيالنا. مبارك : بص أنا حذر جدًا في الحكاية دي. محسن : طب النهاردة بريطانيا يا سيادة الرئيس اعتبرتهم…؟ مبارك: أمريكا بتقول مش هنديكم الطيارات إلا لما ندخل الإخوان، يعني عاوزين يركَّعونا، حاولوا معايا اركع ومركعتش، وتربست معاهم تمامًا بارفض بارفض. - محسن : بس كده قطر بتحاصرنا وبريطانيا بتمارس ضغوط عليهم، والموضوع بالنسبة لقطر تقلَّص؟ مبارك : كلهم بيدوروا على نفسهم واحنا إن شاء الله نروح في داهية، أنا معنديش ثقة فيهم أبدًا، وما دام عندهم قاعدة أمريكية الأمريكان حاطينهم في جيوبهم، والأمير بتاعهم بيزور أمريكا ويقعد ثلاثة أسابيع ومحدش يقابله، هما الأمريكان كده.. - محسن : دعم الإمارات والسعودية يطمن؟ مبارك : بيدعمونا بس لازم نشتغل، مش هيفضلوا يدعمونا على طول، واحنا ما بنشتغلشي. محسن : موضوع مشروع قناة السويس؟؟ مبارك : أنا باسمع عنه طراطيش كلام، لكن معنديش قناعة بيه، قناة السويس اللي عاوز ياخد الضفة الشرقية كانت الإخوان المسلمين علشان يجيبوا شركات أجنبية بباسورات يهودي، ويبنوا مشاريع لحد ما يوصلوا للعريش، ويبقى يعوض علينا ربنا، وهتبقى شركات إسرائيلية على طول من باسبورتات أمريكاني، طاب ما تيجي قناة السويس والعين السخنة، اشمعنا الضفة التانية بتاعة قناة السويس، علشان واسعة ويتوسعوا بالتدريج لحد مايبقوا كلهم بباسبورتات أجنبية كلهم يهود. محسن :حمدين صباحي؟؟ مبارك : حمدين صباحي ده مفيش فايدة منه ومينعفعش، إزاي يبقى رئيس أنا هاتجنن. - محسن : آآه ياريته زي عبد الناصر لكن التجربة مش كويسة؟ مبارك: لا لا لا سيبك من عبد الناصر ده كلام مزيكا بيتمحكوا فيه، طيب عبد الناصر كان ماسكها بإيد من حديد، واللي يفتح بقه يروح السجن، بيتمحكوا في عبد الناصر، وابن عبد الناصر بيمشي معاه لكن يوم ما يمسك هيدي الناس بالشلوت، هو فيه ناس كده على طول. محسن : تعرف يا افندم فيه ناس عملت توكيلات لحضرتك وجمال مبارك علشان تترشحوا في الانتخابات؟ مبارك: ههههههههههه أنا خلاص تعبت، هاقولك حاجة أنا باشتغل بقالي 62 سنة، 30 سنة حروب و30 سنة بخدم البلد. - محسن: بصراحة كان عندك راجل اسمه حبيب العادلي، الراجل ده مسك البلد مسكة من حديد والأمن بتاعها.. مبارك: آه طبعًا مسك البلد بيد من حديد، لكن دلوقتي كل واحد بيدور على نفسه، والبلد تروح في داهية ما يجراش حاجة. - محسن: بس أنا كده هانتخب السيسي علشان إنت نصحتني.. مبارك: انتخب السيسي أحسن انتخاب، السيسي هو الوحيد الموجود على المسرح وأصلح واحد.