هذا المقال يحتوى على ألفاظ وتصريحات يحذر على مرضى الضغط والسكر والقلب قراءتها ..لذا يتوجب علي أن أحذرك وأقول أنك الوحيد المتحمل مسئولية ما تفعله الآن . تبدأ القصة عندما كنت في طريقي الى منزلي بمنطقة الهرم عائدا من عملي بمصر الجديدة ب ( تاكسي ) ولأن طريق العودة طويل وممل ولأن ( الكاسيت ) معطل هكذا قالها لي السائق آسفاً , بدأنا في تبادل الحديث أثر خروجنا من مصر الجديدة ولكن المبادرة كانت من السائق فكانت المفاجأة بسبب صراخه في بشكل غريب : يا بيه ..البلد هتتقسم وأمريكا واسرائيل داخلين علينا ؟ تداركت الصدمة وقلت له :استهدا بالله بس يا أسطى ...جبت منين الكلام ده بس؟!! * يا أستاذ انت مش من هنا ولا ايه ؟! الأستاذ توفيق عكاشه الله يعمر بيته – الراجل ده دماغه سم يا بيه – اه والله , قال ايه ؟ قال أنه كشف مخطط أمريكي اسرائيلي بأنهم عاوزين يقسموا مصر ل 4 حتت وانهم السبب في الثورة عندنا وفي سوريا وليبيا وتونس عشان يعملوا حاجه كده اسمها ايه – اللهم صلي ع النبي – اه شرق أوسط جديد ,وأن الصعيد يبقى بلد لوحده والنوبة تبقى بلد لوحدها والقاهرة تبقى عاصمة المسلمين وأسكندرية تبقى بتاعة المسيحين ؟
كنت أعلم من هو توفيق عكاشه لأن في أحد الليالي منذ أكثر من عام كنت عائد الى المنزل وأثناء وقوفي أمام الباب سمعت ضحكات أبي تتعالى بشكل ملحوظ ..فدخلت لأراه يجلس أمام التلفاز وعلى الرغم من اندهاشي لسهره لمنتصف الليل لكني تداركت أن هناك سبب هام وقال لي أجلس وشاهد ذلك الرجل ( دمه خفيف أوي يا محمد عامل زي الراجل اللي كان بيجي في الكاريكاتير زمان بتاع مصطفى حسين ) .وبدأت من بعدها تبادلي أنا وأبي قفشات ونكات توفيق عكاشه.
* بس يا أسطى الكلام ده مش مقنع لأن الثورات اللي قامت في البلاد دي كانت بسبب كبت الحريات وسوء الحالة الاقتصادية وغياب العدالة الاجتماعية ..من الآخر الثورة دي قامت عشان انت تعيش مرتاح..حر ..قادر تكفي بيتك أكل وشرب وتعليم وصحة ..يبقى في مستقبل ليك ولأولادك , وبعدين يا أسطى يعني هي أمريكا كانت بتكره الروؤساء العرب أوي كده , يعني انت شايف أنهم كانوا واخدين بالهم أوي من البلد كده ومعاديين أمريكا واسرائيل لدرجة أن أمريكا تعمل مخطط عشان البلاد تعمل ثورة؟!! * اه والله يا باشا عندك حق لكن الأستاذ توفيق قال أن البرادعي وساويرس وواحد اسمه حمزاوي أنا معرفوش يا بيه , أن دول علمانين ..والواد اللي اسمه وائل غنيم وجاب واد معاه بسم الله ما شاء الله عليه – ربنا يحفظه لشبابه – أسمه أحمد أزبايدر , أحمد ده بأه يا باشا كشف مخطط العلمانين وكمان الماسونين دول في مصر والموساد الاسرائيلي بيهدده وأمريكا وعملائهم في مصر والأستاذ توفيق عكاشه حياته في خطر وجاله تهديد أنهم هيفجروا القناة – الراجل ده وطني وفدائي والله – تصدق مش هامه منهم وبيتحداهم في كل حلقة بيكشف فيها أسرارهم .
* طيب يا أسطى أنت تعرف مين العلمانين دول ؟
* لا يا بيه بس أعوذ بالله بس بيقولوا أنهم ولاد الشيطان. , انت عارف يا بيه أن هيبقى رئيس مصر بعون الله ؟
* ده على أساس ايه يا اسطى ؟
* عمل يا بيه انتخابات على القناة بتاعته عن طريق الرسايل وكسب البرادعي وعمرو موسى وأحمد شفيق والشيخ محمد حسان ,تخيل حتى بيعرف في الدين أكتر من الشيخ محمد حسان ,طيب نجيب منين واحد زيه كده والنبي حبيبك قولي انته؟
* هنا أدركت أنني يجب أن أوقف هذا الحديث بأي شكل لأنني عائد من 14 ساعة عمل متواصل لا أستطيع صد هذا الكم من بساطة التفكير والسطحية مع أنني أعلم ان واجبي أن أقنعه وأشرح له وأقوم بتوعية ولو جزء بسيط لكني لا استطيع الآن بسبب عدم مقدرتي بالفعل على الحديث بسبب الآم الرأس المستمرة .
* طيب يا اسطى ربنا يصلح الحال ويعمل الصالح لمصر
* يابيه طول ما فيها ناس بتحس بالفقرا زي الأستاذ توفيق عكاشه ربك هيسترها , طيب انت عارف أنه مسك البرادعي ده من كام يوم وسأله سؤال واحد ..سؤااااال وااااحد ....ولحد دلوقتي ولا رد ..طبعا هتقولي ايه هو ؟ ..أقولك أنا ..سأله هو يعرف تمن دكر البط كام ؟ طيب يعرف علف المواشي بكام ؟ الله ما يا بيه الريس اللي جاي لازم يبقى عارف شعبه وحاسس بيه , طب أقولك على حاجه تانيه ده كشف لعبة الإخوان المسلمين وأنهم متفقين مع أمريكا علينا ..وبيهددوه دوله كمان ..ايه رأيك بأه؟
* الرأي رأيك يا أسطى والله ...بس هطلب منك طلب وحيد عاوزك بس تسمع ناس تانيه ..برامج تانيه ..أقرا جرايد يا اسطى ...اسمع أكتر ما تتكلم ..مش لازم واحد بيضحك ويقول نكت ..ممكن تسمع وتسأل عن اللي مش فاهمه ..أسأل عن العلمانية يا اسطى عشان هما مش ولاد الشيطان ولا حاجه , اسأل مين توفيق عكاشه وكان شغال ايه ؟ أعرف أنه كان عضو في أمانة السياسات في الحزب الوطني وباس أيد صفوت الشريف مرتين , أعرف أن القناة دي بتاعته وأن مش كل واحد يعمل قناة يطلع يقول أن هو الصح والباقي غاط ..أبوس ايدك يا اسطى متسلمش عقلك لأي حد يقولك كلمتين حلوين .
* تصدق يا باشا انت عندك حق أنا مكنتش أعرف أن الراجل ده كده ..ده راجل كذا وكذا وكذا
هنا أدركت أنني أمام رجل بسيط يتلقى معلوماته من أي شخص سواء كان مثلي شاب ويتحدث بهدوء لدقائق معدودة فيغير رأيه بكل سهولة وشخص آخر يؤثر عليه بلكنته الريفية وأسلوبه الذي يشبه أسلوب محمد أفندي بفيلم الأرض – الفلاح الذي تلقى قدر من التعليم ليجزم كل أهل القرية بأنه أعلم أهل الأرض – فينظر اليه المنتمون الي الطبقة الكادحة والفقيرة والفلاحين بالنجوع والقرى الغير متعلمين منهم بأنه الأب الروحي الذي جاء لخلاص الفلاحين من هول جبروت وظلم الباشا ونسوا أننا بسنة 2011 وأن هناك ما يسمى بثورة 25 يناير وأن من قام بها شعب مصر وليس جمال عبدالناصر ليخلصهم من الملك ويعطي لهم الأرض , ولأنني من الأرياف مثله ومن قرية صغيرة بالمنصورة ..أعرف أسلوبه جيداً فأنه يعتمد على بساطة في الذم وتعقيداً في المدح ليوصل المعلومة كما يريد , احذروا من هؤلاء فأنهم يصلون الى الطبقة الكبرى بمصر ..أو انتخبوا توفيق عكاشه رئيساً لمصر ..يرحمكم الله.
