بالصور: حقيقة صفحة “ضباط الشرطة الشرفاء من أبناء الوطن” على الفيس بوك ومحاولات تشويهها للثورة

* الصفحة تنشر تقريرا حول المخطط الكامل لسقوط مصر تتهم العقيد عفيفي بقيادة الثورة وتشكيل مجموعات تخريبية لإعادة احتلال مصر
* حقيقة الأدمن المدني بالصفحة .. ولماذا تم طرد زميل حاول مناقشتهم حول التقرير المفبرك بعد تأكيدهم له انه حقيقي
أسفرت تجربة للزميل محمود الششتاوي الصحفي بالبديل عن كشف حقيقة صفحة على الفيس بوك تحت عنوان ” ضباط الشرطة الشرفاء .. وجاءت التجربة التي خاضها محمود لتكشف محاولات الصفحة لتشويه صورة الثورة المصرية من خلال دس معلومات مغلوطة وأخبار مفبركة حول الثورة ومنها خبر يتحدث عن المخطط الكامل من البداية للنهاية لسقوط مصر بالأدلة والذي يتحدث عن أن العقيد عمر عفيفي هو قائد الثورة وأنه درب مجموعة من الشباب ومولهم لإسقاط النظام وانه قسمهم لقسمين قسم يقوم بمظاهرات سلمية وآخر للقيام بأعمال تخريبية تمهيدا لاحتلال مصر .. فماذا حدث مع الششتاوي عندما حاول مراجعتهم فيما كتبوا هذا ما تكشفه التدوينة التالية التي كتبها الششتاوي :
فيه صفحة على الفيس بوك اسمها ” ضباط الشرطة الشرفاء من أبناء الوطن” الصفحة دي أنا مشترك فيها من فترة ، الصفحة دي عبارة عن صفحة عاملها ضباط من إسكندرية ، وكنا بنظن ان اللي عامل الصفحة دي ضباط شرفاء كما يقول الاسم لكن مؤخراً اكتشفت ان الصفحة دي اللي بيديرها تقريباً ضباط تابعين لبقايا جهاز أمن الدولة – اللي المفروض انه أتلغى – ومازال ولاؤهم للنظام القديم وبيحاولوا يشوهوا الثورة والثوار بأي طريقة ..
من كام ساعة لاحظت ان الصفحة دي عاملة شير للينك عنوانه ” المخطط الكامل من البداية للنهاية لسقوط مصر بالأدلة ” ، اللينك ده عبارة عن موضوع على مدونة وواضح جداً ان الموضوع متفبرك لتشويه الثورة والثوار ، مختصره بيقول ان اللي بيقود الثورة دي هو العقيد عمر عفيفي الظابط اللي عايش في أمريكا ، وانه مدرب ناس وبيمولهم عشان يسقط النظام ، وانه مقسمهم مجموعتين مجموعة سلمية ومجموعة تخريبية تمهيداً لاحتلال مصر وقصة كبيرة وهابلة تقدروا تطلعوا على تفاصيلها بالضغط على اللينك المرفق في الأسفل ، انا دخلت قريت الحوار استغربت ان اللي يعمله شير الصفحة دي اللي المفروض انهم بيقولوا انهم شرفاء ومع الثورة والأفلام الهندي واللي طلعت كدب دي ، واللينك معمول له شير بدون تعليق ، وبعد ما دخلت وعلقت على الحوار ده وهاجمتهم ، لقيتهم بيأكدوا انهم مبيرفعوش اخبار ولا بينشروها الا لما يكونو متأكدين منها ، وانهم بيفتحوا عيون الأعضاء وشوية كلام كدة من نوعية السوس اللي بينخر ونظرية المؤامرة الهابلة اللي من وراها عايزين يشوهوا صورة الثورة ويقولوا ان اللي عاملها عملاء لتضييع الوطن واحتلاله والفيلم البايخ ده ، وفي أحد ردوده ليا أكدلي انه هو الأدمن المدني مش أحد الظباط ، وبقية الحوار هتلاقوه كامل في الصور تقرأوه بعناية وتشوفو بنفسكم ..
طبعاً انا انفعلت جداً وشتمتهم – وهتلاقوا ده برضه في الصور – لكن ربنا ألهمني اني اخد برينت سكرين للصفحة دي والحوارات اللي عليها والملحوظات اللي لاحظتها عليها في ذلك الوقت لأجد المفجأة وهي ان الأدمن اللي كان بيأكدلي انه هو الأدمن المدني يطلع أحد الظباط ، واكتشف ان الأدمن المدني تم إزالته من الصفحة وانه تم وقف الأكونت بتاعه نفسه أساساً وده ان دل فيدل ان الصفحة دي مش بيديرها اتنين أدمن باتنين اكونت كما نظن وانما يديرها واحد او مجموعة بالأكونتين في وقت واحد وبيشتغلونا بفيلم ادمن مدني وادمن ظابط ..
الخلاصة اللي اكتشفتها عشان مرغيش كتير هي ان الصفحة دي كانت شبه فخ كدة او كانت صفحة لتحسين صورة ضباط الشرطة وبعد ما الناس تثق فيها يبدأوا في دس السم في العسل ويروجوا لأخبار ومعلومات من شأنها تشويه الثورة والثوار وتظهرهم بمظهر العملاء الممولين من الخارج ، كمان لاحظت ان الصفحة دي كانوا عاملين من ضمن صفحهم المفضلة صفحات لتأييد أحمد شفيق رئيس وزراء مبارك السابق ، فيه شيئ مريب ، ودلوقتي هابدأ في عرض الصور مع شرح مبسط لكل صورة ، وفي آخر الموضوع هتلاقوا رابط منه تقدروا تحملوا نسخ للصور دي على جهازكم ، وكمان هتلاقوا صفحتهم ياريت ندخل كلنا نعملها ريبورت ونحذر الناس منها ومن سمومهم اللي بينشروها ..
اول صورة تظهر أول تعليقي ويظهر الإتنين أدمن في الصفحة
صورة تظهر اول ردوده عليا ومازال الأدمن الثاني موجود
هنا بقية ردوده وهتلاحظوا في احد ردوده اللي بين النقطتين الحمر هو بيأكدلي انه هو الأدمن المدني
بعد كشفي لهم وبعد الحوار بياخد رأي اعضاء الصفحة في طردي من الصفحة
لاحظ المفاجأة بقى هنا : وهي ان الأدمن التاني اختفى من الصفحة بعد كشفي لهم
في التعليق ده وهو اثناء الحوار كان بيطلب من احد الأشخاص انه يدخل على أدمن الظابط ويدخل بيه بشكل خفي ، غالباً تبديل وردية
المحلوظة المهمة هنا : المفروض انه هو اللي بيتكلم باستخدام اكونت الأدمن الظابط بعد ازالة الأدمن المدني ، يعني ده شخص واحد او مجموعة بيستخدموا الحسابين وبيخدعوا الناس بفكرة ان هناك ادمن مدني وادمن ظابط
في الصورة دي هنلاقيه بيقول انه الأدمن المدني ، وده قبل الحوار بيني وبينه بقليل
لاحظوا انهم عاملين لايك لصفحة دعم أحمد شفيق !!
هنا ده المفروض انه كان صفحة البروفايل بتاع الأدمن المدني اللي اتشال لكن طبعاً تم ازالته وتم وقف الأكونت زي ما احنا ملاحظين
رابط التدوينة اللي كانوا عاملين ليها شير اللي فيها قصة المؤامرة الخرافية واللي بيقصدوا يشوهوا بيها الثورة
http://waleedbesho.blogspot.com/2011/02/blog-post.html
وده رابط صفحاهم ، وياريت كل الناس تعمل ريبورت للصفحة دي
https://www.facebook.com/ALEXANDRIAPOLICE
وده رابط الملف اللي فيه نسخ الصور كلها
http://www.mediafire.com/?bqpdoha2pebeg8f
قام بالتجربة - محمود الششتاوي :