محمود هاشم : طراطيش كلام

وصحيت على الدنيا وأنا ببكى
من بطنها نازل أنا بردان
وف بردها م الحر ليه بشكي؟!
مأساتي إني في الحياة عصفور
ريشه ضعيف عشه على قده
والحق ليه في الدنيا دي مجبور
والظلم ليه زايد على حده
القلب يا ما من عمايلك داق
والصدر ضاقت فيه ضلوعه وضاق
وأسمع كلامك يا أبن أدم أصدقه
يطلع في أخره حبر ع الأوراق
¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬¬
يا مستديرة ودايرة الكل فى حبالك
ومحيرة الفكر فى طبعك وفى حالك
يا مستبدة ومادة الخلق على شوكك
يا دنيا حار البشر فى حفظ أشكالك
صقر الصقور هوى فى بحر البحور
والأسد غابت فى الكهوف والجحور
صبح الحرير كسوة بدن للكلاب
والخلق مش لاقية كساوى القبور
الطبع غالب عالتطبع فى المدى
والنفس ليه على كل خير متمردة ؟
والخلق ليه ماشية فى سكة حتفها
وعلى كتفها شايفة النهاية مؤكدة ؟!
جلا جلا عراف وعالي المنزلة
والسر باتع فى حلول المسألة
دق الودع قال يا جدع حكمة زمان
أفرح مفيش إنسان من الأحزان خلا
http://kalamtaratesh.blogspot.com/