إسترجل

الحياد في هذا الوقت خيانة..
التوازنات في هذا الوقت خيانة..
الخواطر في هذا الوقت خيابة.. '' خيابة مش خيانة ''.. بعتذر لكل أصدقائي اللي ماسكين العصاية من النص و عاوزيني أعمل كده أنا كمان..
بس أنا مش آسف أبداً إن أنا وقفت مع بلدي و جيش بلدي ضد الإرهاب..
مش آسف أبداً إن أنا ساندت بلدي و سميت الخونة بمسمياتهم الحقيقية..
مش آسف أبداً إن أنا مكنتش محايد في وقت الشدة..
مش آسف إن أنا سميت الإرهابي إرهابي.. و العميل عميل.. و الجبان جبان.. و البطل بطل..
لكن آسف عليكم.. علي اللي مش قادر يقول كلمة حق علشان خايف من صحابه يزعلوا منه..
آسف علي كل واحد مش قادر يقول للأعمي إنت أعمي علشان صورته متتهزش قدام الناس..
آسف علي كل واحد معندوش الشجاعة إنه يقول للإرهابي إنت إرهابي علشان محدش يعاتبه..
آسف علي كل واحد مش قادر يساند جيش بلاده في عز أزمة وطنه علشان محدش يقول عليه بتاع العسكر..
آسف علي كل واحد مخدوع في ناس كتير و بيبررلهم من غير مبرر أصلاً..
آسف علي كل واحد جبان مش قادر يقول للبطل اللي واقف يدافع عنه ضد الإرهابيين إنه بطل علشان محدش يقول عليه من لاحسي البيادة..
يا كل اللي قالوا عليا كل الكلام ده.. يا كل اللي لاموني علشان وقفت جنب بلدي.. العسكر دول هما المصريين اللي واقفين دلوقتي في الشوارع علشان يحموك و إنت قاعد في بيتك معزز مكرم..
العسكر دول هما اللي بيموتوا و يستشهدوا في سينا و رفح و العريش و المنيا و أسيوط و القاهرة و الإسكندرية علشان سيادتك تعيش آمن مطمأن..
العسكر دول هما اللي فضوا إعتصام رابعة و النهضة علشان كان فيه إرهابيين مسلحين واخدين مواطنين مصريين رهائن..
العسكر دول هما اللي كنت سيادتك هتعيط علشان ينزلوا يريحوك من مرسي..
العسكر دول هما اللي ريحوك من مبارك..
العسكري ده هو أخوك.. و أبوك.. و إبنك..
الجيش ده هو إحنا.. دمنا و لحمنا اللي منطور علي أرض مصر كلها..
مش جماعة إرهابية ولا مرتزقة ولا محتل أجنبي علشان تهتف ضده و تستعر إنك تسانده بالشكل ده..
إلي كل من يستحي من مساندة جيشه.. و إلي كل من يسمي الأمور بغير مسمياتها.. إلي كل من يسعي إلي التوازنات في وقت الحرب.. إلي كل من يمسك العصا من المنتصف أقول: عيب عليك.. إسترجل