اسرار تحنيت المصريون القدماء للجثث

يعد التحنيط من اهم العمليات التي كان يقوم بها المصريون القدماء للحفاظ علي الجسد من التلف والتعفن، حيث كان الجسد يبقي محفوظاً لالاف السنيين
فكرة التحنيط:
رتبط بفكرة الخلود اللي امن بيها المصريين. بيقول عالم الاثار الكبير بريستد انه ما شافش شعب قديم و لا حديث آمن بفكرة الحياه بعد الموت زي المصريين. المصريين شافو الحياه علي الارض كمجرد مرحله مؤقته بتسبق انتقال الانسان لعالم الخالدين و الحساب علي الاعمال الدنيويه، و ده كان سبب اهتمام المصريين ببنا المقابر الهرميه الضخمه اللي ما بتفنيش علي مر الزمن و حتي مبني اللابيرنت اللي افتكرههيرودوت قصر و وصفه في كتابه ' التاريخ ' علي الاساس ده اتضح من قريب انه معبد جنائزي خاص بهرم امنمحعت التالت.
المصريين اعتقدو ان جسم الانسان بيتكون من تلت عناصر الاول هو ' خات ' يعني الجسم و التاني هو ' كا 'القرين او الاله الحارس ' و ده بيتولد مع الانسان و بيلازم الجسم بعد الوفاه عشان يدافع عنه في الحياه الاخري و فيه مؤرخين و باحثين اعتقدو ان ' الكا ' هي المشيمه اللي بتحفظ الانسان و هو جنين. و التالت هو ' با 'يعني الروح اللي بتفارق الجسد عند الوفاه و بتنطلق للسما اذا كان المتوفي فرعون او بتروح العالم السفلي اذا كان من عامة الشعب، و بتفضل تزور الجسم من وقت للتاني و رمز المصريين ليها بطاير ليه وش انسان. و لإن المصريين كانو بيعتقدو ان الشمس بتتولد كل يوم في الشرق و بتموت في الغرب عشان كده كان شط النيل الغربي هو المكان المفضل لدفن الميتين.
مهنه التحنيط:
ارتبط التحنيط بالكهانه و كانت طقوسه بتتمارس قرب المعبد او المدفن و المكان اللي كان بيتعمل فيه التحنيط المصرين كانو بيسموه ' المكان المطهر ' أو ' خيمة الاله '. مهنة رئيس المحنطين كانت مهنه مرموقه لكن مهنة اللي بيطلعو الاحشاء من الجسم كانت مهنه منبوذه اكمن فيها انتهاك لحرمة جسد المتوفي.
طريقة التحنيط:
مر التحنيط في مصر الفرعونيه بعدة مراحل للحفاظ علي الجسد وهي :
رئيس المحنطين كان بييجي و يفرغ البطن من الاحشاء لكن كان بيسيب القلب مكانه اكمن وجوده ضروري لعودة الحياه للمتوفي، و كان عادة بيحشي البطن بالكتان المشبع بالصمغ و الپارفانات او بالقار، و بعدين كان بيخيط الفتحه الجانبيه او كان بيسدها هي و خرام المناخير و الودان و العينين بالصمغ او الشمع المصهور.
بيتم غسل الامعاء بنبيت النخل و بعدين كانت بتتملي بالمر و الايسون و البصل و تتحط في اوعيه خاصه و في احوال نادره كانو بيرجعو الامعاء للبطن تاني. و الغريب ان فيه مومياوات اتلاقت من غير امعاء لكن ما كانش فيه اي فتحه في البطن و لغاية دلوقتي مش معروف كانو بيطلعوها ازاي.
بيتجفف الجسم بدفنه في النطرون ' كربونات الصوديوم اللي بيحتوي علي شوايب من ملح الطعام '، و اكمن الضوافر كانت بتقع وقت التجفيف فكانت بتتثبت بخيط او بلفايف دهب صغيره او من اي معدن تاني، و لو انكسر اي طرف وقت التحنيط كان بتتعمل اطراف صناعيه و تتركب مكان اللي انكسرت و ده للمحافظه علي هيكل الجسم بالكامل، و ساعات كل العمود الفقري كان بيتعوض لو تلف و ده اتلاقي في موميا اكتشفت في الفيوم.
بعد رفع الجسم من النطرون كان بيتغسل بمحلول الملح و بيتعطر و بتتعالج اي تسلخات فيه، و بعدين كان بيتدهن كله بالصمغ السايل و بتتلف عليه شرايط طويله من الكتان المغموس في الصمغ، و بعدها بيتحط في تابوت ليه هيئة الجسم المتحنط و تتم عملية الدفن.