عاوزين ايه من السيسي

تعالوا نتكلم بصراحة.. كل واحد قاعد في بيتهم ومش بيعمل اللي عليه يقولك السيسي رفع الاسعار وزود الكهربا والبنزين والمواصلات.. ولا حد فاهم حاجه..الناس اتعودت علي الانتخة وأبو بلاش.. ولا حد عاوز يشتغل.. كله عاوز فلوس وبس..طب ما تيجو نتكلم بصراحة.. بعد 2011 مبقاش في بلد وكنا عايشين علي الشحاته وكله بيشتغل كله وبعد كده جه راجل وطني محترم كلنا نزلنا الشوارع علشان نقوله تعالي رئيس وأنقذ البلد.. الراجل استجاب لدعوة الملايين وقبل المنصب اللي احنا كنّا عاوزينه..تعالوا نفتكر هو قال ايه.. قال خلوا بالكم انا بتاع شغل وهتتعبوا معايا ولازم كلنا نبقي مع بعض وانا لوحدي مش هقدر..وقال كمان ما ينفعش نفضل كل شويه نقول للأشقاء عاوزين ده وضع مش كويس..وقال البلد دي هتبقي قد الدنيا بينا كلنا..طب ايه رأيكم ان اكتر واحد بيشتغل في مصر هو عبد الفتاح السيسي رئيس الجمهورية.. المشكلة ان احنا شفنا الحلو من طرق وكباري ومحطات كهرباء ومياه ومدن سكنية وارضي زراعية جديدة ومجمعات صناعية ده بجانب عودة الأمن ومحاربة الفساد..ومع كل ده في حرب شرسة بيخوضها الجيش والشرطة ضد الاٍرهاب بتتكلف مليارات الجنيهات بخلاف دماء الشهداء اللي بتسيل كل يوم.. وفي الآخر نقول هو السيسي عمل ايه يعني..بالذمة ده كلام.. ده يبقي اسمه ظلم وافتري وربنا ما يرضاش بكده.. صحيح في برنامج إصلاح اقتصادي صعب بس هيوصلنا لبر الأمان ويخلينا ما نشحتش تاني ونقدر نعتمد علي نفسنا.. لو عاوز تعرف السيسي عمل ايه خليك صريح مع نفسك وقول انت عملت ايه.. يا تري الغني عمل واجبه الاجتماعي والعامل كان مخلص بجد والفاسد بطل يرتشي.. محدش عاوز يبقي صريح مع نفسه..المشكلة مش في السيسي خالص المشكلة فينا لأننا بنحب نتكلم وعاوزين كل حاجة علي الجاهز من غير تعب.. السيسي خلي كل واحد يجري يطفي النور الزيادة في البيت وده مش عيب بدل ما كنّا بنستهلك الخدمات من غير حساب رغم انها بتتكلف مليارات..علي فكرة السيسي خد البلد دي اشلاء دولة بجد..لا فيها بنية تحتية ولا نظام ولا تعليم ولا أمن ولا صحة ولا اقتصاد.. دلوقتي تقدر تقول اننا بقينا علي الطريق الصحيح ونقدر نبني البلد بجد بشوية ضمير وجهد وإخلاص حقيقي.. السيسي لوحده مش هيقدر يعمل حاجة لازم الشعب كله يشتغل ويبقي شعب منتج مش كسول ويعيش علي النميمة والشائعات.. اللي مش شايف السيسي عمل حاجة كبيرة اوي لمصر يبقي مش بيشوف ولا هيشوف..واللي عاوز مصر تبقي قد الدنيا بجد يشتغل ويكمل المشوار مع الراجل اللي أنقذ مصر وباقي المنطقة العربية من المصير المجهول.. نحمد ربنا علي النعمة اللي احنا فيها ونخلي عندنا شوية ضمير ونعتمد علي أنفسنا علشان خاطر ولادنا..وتحيا مصر.