مها نور: «السرطان» صديقي اللدود وأحاربه بصاحبة الجلالة

لمجرد أن يمر اسم مرض السرطان علي الاذهان فيرافقه حتما الموت او اقتراب الأجل.. لكن جعل الله سبحانه وتعالي مع كل محنة منحة عظيمة وصبرا وروحا قتالية لاصحابها ومها نور المصابة بمرض السرطان لها الصفات القتالية وتقاتل بكل ما تمتلك من حب وعزيمة وايمان هذا المرض اللعين..
مها اطلق عليها سوبر مها وايضاً المرأة المقاتلة وسط أقرانها لانها نجحت في الشفاء من المرض وهزمته قبل ان تعلم منذ ايام بوجوده في أماكن اخري من جسدها لتبدأ معه شوطا جديدا من الآلام مغلفا بالصبر والرضا.. التقتها »الأخبار»‬ لنعلم كيف تواجه (السوبر مها) الكانسر وأحلامها وطموحاتها وهوايتها في الكتابة الصحفية..
• اولا مها بترفضي اسم مريضة وتعشقي محاربة للسرطان ليه؟
- لاني بحارب كل شيء سلبي في حياتي من بداية المرض والأحاسيس والأفكار السلبية اللي ممكن تتسلل جوا عقلي كلمة مريض أو مريضة تعبر دائما عن الوهن والضعف وانا محبش أكون ضعيفة قدام نفسي ولا قدام اي حد.
قصة نجاح وكفاح لمقاومة المرض.. الفضل لمين؟
- الفضل الأول لزوجي ولاسرتي ساعدوني اني اقاوم كل احاسيس اليأس والضعف والألم بدعمهم وحبهم وطبطبتهم علي قلبي الموجوع حولوا الوجع لهدوء ورضا وإحساس بالأمان.
ماما مها الاسم الأكثر حبا لقلبك احكي لنا عن مها الام.. أنا أم شديدة جدا يمكن بحكم أن اولادي صبيان لكن ميمنعش اني كتير بكون طفلة اكتر منهم بحب اجري والعب معاهم يمكن لاني بحن كتير لايام طفولتي ونفسي ترجع تاني ولو ليوم واحد.
علاقتك بزوجك علاقة رائعة احكي لنا عن دوره.
- زوجي هو سر الحياة والنجاح بالنسبة لي لولا وجوده ودعمه وحبه عمري ما كنت هقدر اكمل مشواري مع صديقي اللدود (السرطان) كان دائما بيقويني وفي عز الألم كان بيبقي هو الترياق اللي بيداوي همي ووجعي وجروحي.
من امتي بتحاربي المرض؟
- من ست سنوات كان عمري وقتها 33 سنة بالضبط انا عرفت أن عندي سرطان يوم عيد ميلادي عشان كده بعتبر عمري الحقيقي هو الست سنين اللي عيشتهم بعد معرفتي بالمرض.
وإزاي قابلتي خبر الاصابة بيه؟
- »‬انما الصبر عند الصدمة الأولي» لحد النهارده انا نفسي مستغربة من رد فعلي كنت ثابتة جدا ومتقبلة كل كلمة بيقولها الدكتور كان معايا وقتها زوجي واختي كانوا ساكتين وانا اللي كنت بدير الحوار مع الدكتور عن كل التفاصيل من اول معاد العملية لحد هنستاصل ايه من جسمي وده كان اصعب واقسي واطول حوار عملته في حياتي.
ليكي دور اجتماعي مهم لمساعدة المرضي احكي لنا.
- بحاول يكون ليا دور في اسعاد الغير مش بس محاربي السرطان مش لازم يكون ظاهر لكل الناس لاني بحب دايما اعمل ده في الخفاء بحس وقتها ان الجزاء والدعوات بتكون اقوي واسرع لوصولها لربنا.
شفيتي من المرض ولا لسه؟
- المفروض اني شفيت لكن الفترة دي عرفت من الطبيب المعالج ان في نشاط جديد في اماكن جديدة في الجسم لكن ده مش هيخليني اخاف ولا اتضايق بالعكس انا متاكدة اني هكون اقوي من اول مرة لاني شوفت اد ايه في تجربتي السابقة مع المرض ان ربنا مبيعملش حاجة وحشة ابدا بالعكس انا يمكن شايفة ان حياتي ابتدت وبقت اجمل وكلها نجاح ورضا وحب وقوة بعد اصابتي بمرض السرطان عشان كده دايما بقول السرطان بالنسبة لي كان بداية لحياة جديدة ومن رحم الألم يولد النجاح.
احكي لنا عن الكتابة..
- الكتابة هي حياتي كل كلمة بكتبها بتكون خارجة من جوا قلبي مش لازم تكون تجربة خاصة ممكن يكون موقف اتأثرت بيه يخص ناس غيري لكن حرك مشاعري وخلاني اكتب.. الكتابة هي انفاسي اللي بتدخل جوايا عشان توهب روحي الحياة.. الكتابة هي اللي بتخليني احس ان ليا كيان وفايدة وبالذات لما بشوف تعليقات المتابعين والاصدقاء متتصورش اد ايه بتسعدني وتشجعني وتدعمني.
مها الصحفية بدأت امتي وأهم حاجات كتبتيها؟
- بدأ حبي للكتابة والصحافة من وانا طفلة عندي خمس سنين كانت دايما أمي بتشجعني أني اكتب وكانت بتشتري لي قصص وكانت دايما تقولي اكتبي وأنا هبعت كتاباتك لمجلة عشان ينشروها عشان تشجعني بعد كده كبرت وبدأت ادخل مسابقات في المدرسة عن كتابة التقارير وكان اول تقرير ليا عن رحلة للقرية الفرعونية وكسبت وقتها المركز الاول وكانت الجايزة مقلمة وقلم جميل اوي بعد كده بدأت اكتب خواطر عن الحب والحياة بحكم سني وقتها سن المراهقة وبعد ما اتجوزت تقريبا توقفت عن الكتابة وانشغلت بالبيت والاولاد ورجعت تاني بعد رحلتي مع السرطان رجعت عن طريق مجلة الكترونية خاصة بي سمتها سحر الحياة انشأتها صديقة لي ومنها بدات اكتب في عدد كبير من الجرائد والمجلات الكبيرة والمعروفة زي الجمهورية واليوم السابع ومجلة اكتوبر وانفراد واصبح لي عمود باسمي بعنوان يوميات زوجة حالمة في موقع نسائي مهم واستمرت الحياة مع الصحافة والكلمات إلي الان.
ما اصعب واخطر موقف تعرضتي ليه في حياتك؟
- اصعب موقف تعرضت له لما ابني تعب والدكاترة اشتبهوا في ان عنده ورم سرطاني في الغدة اتمنيت أني أموت وماشوفش فيه يوم وحش ابدا.
ايه هو حلمك وأملك في الحياة؟
- حلمي أن ربنا يكون راضي عني وأني اشوف اولادي في اعلي المناصب وان مجلتي سحر الحياة تبقي اكبر واشهر مجلة في الدنيا.. انا طماعة شوية ونفسي أكون مذيعة راديو جدا.