حديث وشجون

يوميات ضابط من مصر «5»

الاحد الماضي كان عيد الشرطة كل سنة وهما طيبين وعلي الإرهاب ربنا يقويهم وعليه ان شاء الله مخلصين والسنة الجاية تلاقي كل الحزن والكسرة ال في عيون ولاد الشهداء رايحين بعد ما زملاء ابائهم لتارهم واخدين.. ولكل رجال الشرطة اقول ما تزعلوش من الشرطة في أي بلد محبوبين خاصة من البلطجية وال علي القانون خارجين.. الشرطة طول عمرها للمصريين حاميين 25 يناير 52 ذكري استشهاد خمسين منها واصابة ثمانين وهما عن الاسماعيلية ضد الانجليز حاميين.. لكن احنا ليكوا مقدرين ولبيادتكم مقبلين.. اللهم احميكم فإن الله خير الحافظين.
ونكمل يوميات ضابط ال من شهر احنا ليها بادئين.. 31 يناير عادت بعض وحدات الامن المركزي لمعسكراتهم والباقي للوزارة ليها حامين.. 3 ايام علي وجبات يوم واحد عايشين وصابرين.. ضباط وعساكر مش رافضين.. ونزل الجيش لشوارع ومحافظات مصر ليها حاميين.. وانتشر اللصوص والبلطجية من جحورهم خارجين ولممتلكاتنا ومبانينا الا بفلوسنا سارقين وحارقين.. وعمت الفوضي البلاد ليه احنا مندهشين.
اصدر مبارك قراراً بعزل حبيب العادلي علي انه لم يكن بالحكمة من المتصرفين.. وعاشت الشرطة اسوأ ايامها داخل معسكراتهم قابعين لأهاليهم وولادهم واحوالهم مش عارفين بعد غيبة مريبة طلع حسني مبارك اتكلم وطلب مهلة 6 اشهر والناس ليه وفيه مش واثقين.. ووقف الشعب امام القصر الجمهوري واصر لو مارحلش مبارك احنا مش ماشين وتحاور مع مبارك المشير طنطاوي وكان الجيش والحرس الجمهوري متفقين علي حماية مصر وشعبها مش متنازلين..
و11 فبراير اعلن عمر سليمان تنحي مبارك عن الحكم وان الجيش والمجلس العسكري لمصر حاكمين.. احنا الاسبوع الجاي ان شاء الله مكملين.