نميمة رياضية

المهندس هاني أبوريدة شيخ عرب بجد.. مش بس بيحاول يحل أزمات الكرة في مصر،لا ده كمان دخل علشان يحل مشاكل المياه مع اثيوبيا وأزمة سد النهضة مستغلاً علاقته القوية مع رئيس الاتحاد الاثيوبي لكرة القدم.. وراح مقعد ممثل 50 دولة من الاتحاد الافريقي مع خبراء وزارة الري المصرية والكلام ده كله في أثيوبيا.. صحيح الرياضة تصنع المعجزات وعلاقات أبوريدة تحقق الإنجازات.. بجد برافو يا بشمهندس.
خبر تقرأه قريباً.. مرتضي منصور يتقدم للحصول علي الدورة التدريبية C.. بجد حقه لأن بعد ما الجهاز الفني للزمالك لعب مباراة الطلائع بالخطة اللي قال عليها فاز 6/1.. بصراحة كده من حقك نص مرتب الجهاز الفني.
الخوف بس ان جمال علام رئيس اتحاد الكرة يحاول يقلد مرتضي،ويقولك احط الخطة لشوقي غريب اشمعني انا.. لا بس صحيح انا نسيت في ناس في الجبلاية عايزه تجيب كابتن فاروق جعفر بدل شوقي مش عارف ليه الصراحة بس الواضح ان الكابتن غانم سلطان الصديق الصدوق ل «روقة» زهق من تدريب الكرة النسائية وعايز حاجة « خشنة « شوية.. ربنا يستر علي قرارات الرجالة في الجبلاية.
خير الله ما أجعله خير بيقولك ان المستشار خالد زين بيطلب في خطاب رسمي وساطة الوزير خالد عبد العزيز علشان يرجع عضويته في نادي الصيد بناء علي لائحة طاهر أبوزيد المعمول بها حاليا اللي اساسا اللجنة الاوليمبية رفضاها.. الصراحة انا لو من الوزير اصطاد في الماء العكر وابعت المذكرة اللي وقع عليها 8 من أعضاء اللجنة بمحض ارادتهم للجنة الاوليمبية الدولية.. ربنا يكرمك يا عمرو يا سعيد شكلك بتستخدم مهارات الجمباز علي حق.