فضفضة

زراعة اللحمة؟!

لكل الهفتانين اللي ماداقوش زَفر، ولا حتة لحمة من كذا أسبوع.
لكل الموظفين ومحدودي الدخل اللي اتحرق قبلهم من البدنجان المقلي، وزهقت معدتهم من الفول المسوس، وهمه بيضحكوا علي نفسهم وعيالهم بأنه صحي عن أكل اللحمة!.
لكل هؤلاء ازف هذا الخبر السعيد الجديد لنج.. ابشروا فقد نجح الخبراء في هولندا في زراعة اللحمة!.
أيوه زراعة اللحمة،، والله العظيم تلاته بالله أنا لابخرف ولا بروج اشاعات، ولا قلة اللحمة لحست نفوخي.
الخبر بيقول أن العلماء نجحوا في عملية زراعة اللحوم. والمشكلة ان قدامهم شوية وقت علشان تبقي التجارب اقتصادية، يعني في مقدورك انت وأنا.. وده حيكون خلال كذا سنة..
يعني إيه يا جماعة؟
يعني بساطة حيجي اليوم اللي تقدر فيه تزرع حتة اللحمة اللي بتحبها.. حته من العكوة، ولا حتة من الموزة، ولا حتي عِرق.
لأ وإيه.. الموضوع مش محتاج تروح لغاية جزار ولا خلافه وكل ما تهفك نفسك علي شوية مرقة وهبر، قوم وحش اللي انت عايزه.
يرضي مين اللي حصل في مصر؟ يرضي مين ان سعر كيلو اللحمة داخل علي سبعين جنيه، وعلي رمضان ان ربنا كتب لنا عمر، حيوصل مائة جنيه.. يعني مرتب الواحد يدوب يكفي كام كيلو لحمة. ومش مهم التعليم والسكن ولا حتي العلاج..
أنا شخصيا مضرب عن أكل اللحمة المذبوحة وفي انتظار اللحمة المزروعة في البلكونة أو الغيط او حتي تحت السرير.. المهم لحمة والسلام.