كلام يبقي

النهاردة إجازة

ممتاز القط
ايه رأيكم أنا كل يوم جمعة هكتب لكم بالبلدي يعني باللغة العامية ونسيبنا من الكلام المفلطح والمزوق علي كل لون يا باطسطة.
زمان وانا في إعارة من الأخبار لأخبار اليوم كنت بكتب عمود اسمه حكايات صحفية في ملحق النهاردة إجازة اللي مات من زمان واستخسروا ينشروا له نعي في صفحة الوفيات.
المهم كل يوم جمعة هنقعد مع بعض نتكلم بدون اي حواجز من القلب للقلب وارجوكم استحملوني واعرفوا انكم اجمل حاجة في حياتي.. القراء هم اغلي رصيد عند أي واحد بيكتب.
النهاردة بقي عايزين نتكلم عن الخسة والندالة والحقد الأسود اللي مالي نفوس ناس كتيرة اوي الأيام دي!! ايه اللي حصل لنا؟! قالو لنا ثورة وعيش وحرية وعدالة اجتماعية.. قلنا وماله كلها حاجات حلوة وكويسة ومحدش يقدر يقول عنها تلت التلاتة كام. لكن من يوم ما قامت الثورة والدنيا اتشقلب حالها وعاليها جه واطيها.. يعني معظم واغلبية اللي طلعوا علي السطح دلوقتي ناس محدش سمع عنهم قبل كده.. واهي طاحونة كلام داير ولا حد بيقول لحد أي حاجة وبقت قلة الأدب والشتيمة شيء عادي اوي كله بيشتم في كله ومحدش بيحاسب حد وده كله عمل نوع من الفوضي والانفلات.. الصوت العالي وقلة الأدب دايما هيه اللي تكسب.
وفي احدي المحافظات نزل المحافظ بنفسه عشان يشوف موضوع البياعين السريحة وفجأة واحد منهم وعيني عينك قدام البيه مدير الأمن ورجاله المحافظة قال للمحافظ طيب يا بيه لو حد راجل في البلد دي يقرب من الفرشة بتاعتي عليا الطلاق بالتلاتة لشرحه ميت حتة وارميه للكلاب.. حرام عليكم الفرشة دي رزقي ويا واخد قوتي يا ناوي علي موتي.
وطبعا البيه المحافظ لقي ميت ايد بتشده بعيد عن الواد قليل الادب ده مع كام وعد بانه هيتحاسب.
المهم يا تري ايه السبب اللي وصلنا لكده.. ليه القانون بقي طري وملوش اظافر تندب في عين أي واحد يحاول يكسره.. والنبي حد يقولي ومحدش يخاف احنا في ثورة!!