لمبه حمرا

ما حدث هو عين العقل وهو كما يقولون صح الصح، لأننا كان لازم نضحي بالشعب عشان مجلس الشعب يعيش، كان لازم نضحي بالهدوء والاستقرار عشان الفوضي تنتشر وتتوغل وتستمر، كان لازم نضحي بالقانون عشان كل واحد يمشي علي حل شعره من غير ما يحس بالذنب ومن غير ما يحس أنه بيعمل حاجة غلط، كان لازم نضحي بأحكام القضاء عشان إحنا شعب حر ماينفعش حد يحكم عليه، كان لازم يبقي رب البيت بالدف ضارب عشان تبقي شيمة أهل البيت كلهم الرقص، كان لازم كل ما الحزينة تفرح ما تلاقيلهاش مطرح، كان لازم كل ما نطلع لقدام نلاقي نفسنا بنرجع لورا، كل ما نطلع من نقرة نقع في دحديرة، وكل ما نقول هنبقي كويسين نلاقي نفسنا متنيلين، وعلي رأي المثل جبتك يا عبد المعين تعيني لاقيتك يا عبد المعين إخوان.