كل يوم جمعة

الحلقة الأولي من المسلسل التليفزيوني و»عليكم السلام«!..

لم يخطر علي بالي يوما ان اكون واحدا من مؤلفي المسلسلات التليفزيونية ولا اعتقد انني ارغب في ذلك مع ان بعض المخرجين الكبار امثال محمد فاضل وجمال عبدالحميد طلبوا مني كتابتها وبناء علي طلبهم هذا جربت من بعيد دون عرضه عليهم ان اكتب مسلسلا من 03 حلقة بعنوان »وعليكم السلام« وقد يسألني احدهم ولماذا 03 حلقة بالتحديد؟! والرد غالبا هو.. حتي نأخذ راحتنا في المط والتطويل و»هبش« الاجر المناسب!..
المشهد الاول عبارة عن شارع طويل في حي شبرا.. مشهد واحد لا يتغير طوال الحلقة التي مدتها 54 دقيقة لا غير حيث تشاهد اثنين من الاصدقاء »أحمد آدم وصلاح عبدالله« تقابلا صدفة في الشارع.. احتضن كل منهما الآخر ودار بينهما هذا الحوار...
- ازيك يا ابو صلاح..
- الله يخليك يا عم احمد..
- فين من زمان ما حدش شافك في القهوة؟!
- بتقول ايه؟!.. زعق شوية علشان »وداني« بطاريتهم خلصت ومش سامع كويس..
- باقول لك انت فين من زمان.. بقالك مدة ما ظهرتش في »القهوة«؟!..
- علشان »الكنكة« بقت ضيقة حبتين.. لكن من هنا ورايح انشالله حاظهر في »براد« الشاي!..
هأهأ.. ها.. دمك خفيف كالعادة وازاي المدام صحتها عاملة إيه؟!
- الحمد لله كانت عيانة اليومين اللي فاتوا..
- ويا تري عاملة ايه دلوقتي؟!
- فضلة خيرك عاملة »مسقعة« تاكل صوابعك وراها!..
- ما انا عارف نفسها في الطبيخ باسم الله ما شاء الله.
- دي من حبها للطبيخ يا ابو صلاح مسمينها في الحتة الست »أم العزايم«.. كل عزومة غداء او عشاء حتلاقي علي السفرة بتاعتها ثلاثة او اربعة من الجيران والقرايب!..
- والاولاد اخبارهم ايه؟!..
- بيبوسوا الايادي!..
- باستهم العافية.. يا تري جابوا ايه في الامتحانات السنة دي؟!
- جابوا ييجي ثلاثة كيلو »كحك« وتورتة من عند »العبد«!..
- هأها.. ها حلوة.. عموما ماتزعلش روحك.. خد سيجارة كليوباترا..
- بطلت السجائر من زمان لما لقيت صدري بتطلع منه »خشخشة« موسيقية زي ما يكون واحد قاعد جواه بيضرب علي »أكورديون«.. نفسي ومني عيني اسجل ال »خشخشة« دي علي شرايط كاسيت اطرحها للبيع في السوق وانا واثق من انها حتعجب الناس اكثر من »خشخشة« حميد الشاعري وعمرو مصطفي!..
- والكاسيت ناوي تبيعه في السوق بكام؟!
- بعشرين جنيه وما عنديش مانع بعشرة للي عاوز يسمعه ب »ودن« واحدة!..
- هأهأ.. حلوة.. خد لك سيجارة »عفرها«..
- ما قلت لك بطلت »العفرة« علشان راجع الملاعب تاني العب »كورة«!..
- انت كنت بتلعب »كورة« قبل كده؟!
- ايوه كنت »لفت« ونج نادي الزمالك؟!
- ونج »لفت« واللا ونج »خيار« هأهأ.. ها!..
- دمك خفيف يا عم احمد.. ياريت بقي »تخلي« في عينيك نظر وتتوصي بالنكت الحامية دي.. قوللي واحدة ثانية...
- نشوف الاول فاضل قد ايه من مدة الحلقة وانا احشيها لك نكت قديمة من بتاعة فيصل خورشيد!.. واحد قهوجي راح يتجوز دفع المهر »ماركات«!.. واحد حداد لقي جيرانه بتوع مشاكل فقرر »يحدد« علاقتهم بيهم!.. تاجر مخدرات راح يتجوز ام العروسة سألته بتشتغل ايه؟! قال لها: فني »تكييف«!..
- هأهأ.. ها.. ضحكتني يا ابن الايه حيث كده لازم »تعفر« واحدة سوبر!..
- ما قلت لك بطلت »العفرة« من زمان..
- طيب علشان خاطري ولعها خدلك نفسين مش اكثر..
- خاطرك علي »الباروكة« من فوق! »تتجه الكاميرا لحظتها ناحية اليد اليمني لاحمد ادم رافعا اياها تجاه الباروكة التي يضعها فوق رأسه« ويكمل قائلا: عن اذنك بقي ورايا مشوار مهم..
- مشوار رايح فين؟!
- بعدين اقولك..
- طيب خلينا نشوفك..
- شافتك العافية في الحلقة الجاية بكره..
- طيب سلامو عليكم..
- وعليكم السلام.. »تنزل بعدها كلمة النهاية مع الاشارة بميعاد عرض الحلقة الثانية«!..
ويا سلام لو قطاع الانتاج طلب مني كمؤلف للمسلسلات ان تكون مدة الحلقة 06 دقيقة بدلا من 54 كنا ساعتها من باب المط و»تطويل« الاجر قد فكرنا بعد جملة المدام عاملة »مسقعة« تاكل صوابعك وراها ان نضيف لنقول وغدا فضلة خيرك حاتعمل محشي كرنب وبعد كده ملوخية بالارانب.. وبعد بعده حاتعمل حواوشي ويوم الخميس الجاي علشان العيال زهقت من اللحمة حاتعمل كشري.. ويوم الجمعة علشان جاي لنا ضيوف حاتعمل بامية خضراء باللحمة الضاني من بقك كده للبلعوم ومن البلعوم للمعدة حتلاقي اللقمة نازلة »تتأمع« ماحدش قدها ومطرح ما تسري تمري.. وسلامو عليكم.. عليكم السلام لحلقة »الرغي« القادمة!..