مباشر

يا أهل مصر المحروسة علشان خاطر ربنا فكروا شوية في اللي بيحصل في البلد وحللوها وخدوا الماضي عبرة علشان محدش يضحك علينا،. فعلي سبيل المثال ليه مايكونش عبدالمنعم أبوالفتوح اللي بيدعموه السلفيين والجماعات الاسلامية هو مرشح الاخوان الرئيسي وكل اللي بيحصل تمويه علشان الناس تروح في حته وهما بيضبطوا في حتة تانية الناس رايحة لها بمزاجها.. ودة اللي بيحصل الان وأبوالفتوح اخواني حتي النخاع ولابد من يوم معلوم تجذبه بركة المرشد!!.
فكروا للحظة ان أمنية كل واحد فينا يزور المسجد الاقصي ويصلي فيه بس من غير التأشيرة الاسرائيلية.. طيب ليه لما المفتي عملها وحقق حلمه، قاموا عليه المتأسلمين وطيور الظلام والباحثين عن السياسة تحت غطاء الدين.. يا ناس قولوا لهم كفاية كرهناكم وكل يوم بيزيد كرهنا بتصرفاتكم وفضايحكم!!.
فكروا كده ان المصريين عايشين كلاتهم في كفرالهنادوة والدكتور مرسي قعد علي الكرسي وبقي زعيمنا وجاب ولاده الامريكان يتمنظروا علينا، ولزمن هيرفضوا بوس ايد المرشد زي حالتنا لانها عيبة حداهم. وساعتها الاخوة هيلتمسو لهم العذر لان تربيتهم الامريكية تمنعهم لكن المصريين عليهم البووس البوس البوس.. وربنا يصبرنا علي أيد المرشد وكفر الهنادوة!!.
يا أولاد أبواسماعيل عايزكم تفكروا، ليه ماتكونش قطر هي محرضة امريكا علي ملعوب جنسية أم الريس علشان الساحة تفضي للمرشح اللي هي عايزاه.. وحتما يكونوا زوروا المستندات وحطوا فيها صورة الام الفاضلة بشعرها ومن غير حجاب وبعتوها بمخصوص من القاعدة الامريكية بقطر!.
تفكيري مش مقتنع أن محمد الأمين هو صاحب CBC ومودرن والوطن ودماغي رايحة لعامر جروب مش عارف ليه!!