يعني إيه سرقة وطن؟!!

يعني إيه سرقة وطن؟!!
يعني ناس عواجيز كبار
سن لكن مش مقام
يسرقوا النور م النهار
ويعيشوا مصر في ظلام
ناس تصادر ع اللي الجاي
لاجل ماضي مش شريف
عروا لحم الشعب فيه
وانتحر علشان رغيف
يعني ناس كفرة بصحيح
مصمصوا حتي النخاع
عضمنا وصلبوا المسيح
دمه شربوه الضباع
يعني ايه سرقة وطن؟!
يعني حاكم ديكتاتور
عقله اتخن م الكروش
للي مابتشبعش أكل
لملموا حتي القروش
السنان زي المخالب
جوه لحم الشعب تغرز
والايدين زي العقارب
سمهافي القلب يهرس
يعني شلة مستحيل
تبقي م المحروسة اصلا
اصلهم؟! ما لهمش اصل
او وحوش م الغابة يمكن
يعني إيه سرقة وطن؟!
يعني حرامية وعصابة
متجوزة من قلب بعض
يعني ماما والا بابا
في الفقير تنهش تعض
الوكيل يقول ما عضش
والقضاة يدوه براءة
والمصاهرة ليها حق
واللي تغويه الجراءة
يفتكر نفسه في دولة
من رقبته يجرجروه
فيه نيابة أمن دولة
يسجنوه هو وابوه
يعني لو عامل جرئ
وكتبتلك كلمة في مقالة
تنضرب علقة وتبقي
عبرة للباقي وحالة
او تختفي والكل صامت
نمرة في الدفتر وماتت
والوساخة فعل ثابت
والحقيقة تبقي عالة
يعني ايه سرقة وطن؟!
يعني قتل سحل موت
شنق ويا نهب ياما
ذل فقر مالهوش صوت
أو وطن من غير كرامة
يعني ثورة تقوم قيامة
يملي دم الشهداء مصر
ياللا قومي بالسلامة
م المرض والخوف يا مصر
نلقي كل يوم عساكر
سجانين زي التتار
يمسكوا في اي ثاير
ياخدوا من عينه النهار
ويقولوا عنه بلطجي
مجرم.. عميل
مع ان دمه اللي روي
روحك يا نيل
من نور عينيه اتحررت
شمس الاصيل
يعني ايه سرقة وطن؟!
يعني ناس تقوم بثورة
ييجوا ناس تانيين عليها
يركبوها.. ويخطفوها
ويبيعها باللي فيها
يعني صفقة بين كبار
ع الكراسي والفلوس
والشباب شمس النهار
يهرسوه بين التروس
يعني ناس ما لهمش ملة
الا كرسي وسيف وجاه
يتكلموا باسمك يا دين
ويكفروا حتي الحياة
يعني ناس مفروض يكونوا
في المتاحف معروضين
لسه عايزين يحكموا
بأي شرع وأي دين؟!
يعني ايه سرقة وطن؟!
يعني ضحكة تتسرق
دم شهدا يروح بلاش
قلب ام بيتحرق
ع اللي راح ما رجعلهاش
يعني لسه العيشة مرة
يعني ثاير يتسجن
يعني ثورة مستمرة
لحد ما يعود الوطن
يعني نرجع للميدان
يعني شهداء ودم تاني
واللي قتلوا مستحيل
يرجعوا للحكم تاني
اللي قتلوا مستحيل
يرجعوا للحكم ثاني