صباح الورد

»العتب ع الگهربا«!

قال الملك رمسيس الثاني مخاطبا روكا الحرامي بغضب: التيار الكهربائي لم ينقطع عن مملكتي دقيقة واحدة حتي قبل اختراع الكهرباء ب23 قرنا من الزمان، لأن رجالي كانوا يخططون للمستقبل. واليوم ، في عام 0102 تسبح العاصمة ومقاطعات المملكة في الظلام بسبب موجة حر. ولا تفعلون شيئا سوي التشدق بالمبررات . انتم يا أحفادي أوغاد !
همس روكا في اذن الشيخ غريب : شتيمة دي يا مولانا ؟
أجاب الشيخ : جلالته ما وضَّحش يا معلم !
قال روكا للملك : أصل الحر الله يجازيه كَبس من غير إحم ولا دستور سيادتك . المكيفات اشتغلت ليل نهار لحد ما سحبت كل الكهربا . ما فضلش في المخزن ولا فتفوتة كهربا. حتي المكن اللي بيعمل الكهربا قطع النفس وطب ساكت لما مالقاش كهربا يشتغل بيها عشان يعمل كهربا . الشركة ربنا يبارك لها عملت اللي عليها. قالت آدي الله وآدي حكمته ، وعلي قد لحافك مِد رجليك وكهربا هنية تكفي مية. شوية الكهربا اللي حيلتها وزعتهم بالعدل . يعني مثلا لو منطقة نورت يبقي لازم المنطقة اللي جنبها تضلَّم. وشوية عليها وشوية علينا لحد ما ربنا يفرجها بكهربا من عنده .
قال الشيخ : كله بأمره !
قال روكا : المكيفات نامت وشخَّرت . الثلاجة جابت هَبْو والسخان بقي زير ، والعيانين اللي بيتنفسوا بأجهزة تشتغل بالكهربا يابختهم .. زمانهم دلوقت في الجنة ونعيمها . العتمة الحلوة فردت جناحاتها وضللت بسوادها اللي يرد الروح ع الشوارع والدكاكين والبيوت . المغمض والمفتح بقوا زي بعض . كله بيحسس لا مؤاخذة . واللي غاوي لغوصة يحط إيده ع الممنوع ويقول العتب ع الكهربا .
قال الشيخ : يرزق الهايم والنايم علي صرصور ودنه !
قال روكا : إمبارح وانا خارج الصبحية علي فيض الكريم المدام قالت لي روح ربنا يفتحها في وشك ويرزقك برزق العيال يا روكا يا ابن نانسي . وعشان حلاوتهم طيبة وقلبها أبيض زي اللبن الحليب ربنا استجاب لدعاها . أصلها بنت حلال سيادتك وقلبها طاهر زي إيدها.
قال الشيخ : ما تتخيرش عنك يا سيد المعلمين !
قال روكا : بعد الشمس ما قالت باي باي يا جماعة والليل خش علينا بحلاوته ، النور انقطع سيادتك. اللي ما يفهمش في حلاوة الضلمة قال يا حفيظ. لكن انا قلبي هفهف وقلت مدد يا أم العيال . أصل أنا ابن ليل وباشوف حلو قوي في الضلمة . وانا واقف علي باب المحطة اربط عيني بلحاف وانشن والدنيا كحل علي جناح دبانة نايمة ورا ودن كلب جربان بيقرقش عضمة فوق مقلب الزبالة بتاع شارع العقاد في مدينة نصر ، وبعون الله أجيب أجل الكلب .
قال الشيخ : فداك الكلب يا معلم !
قال روكا للملك : نرجع لمرجوعنا. الضلمة فرشت في قلبي وقلب صبياني نور مالهوش حل . تقولش ضهر سيادتك . خدنا العدة ونزلنا الشغل وقلنا ياهادي . القفل يشوفنا من بعيد ينوَّر زي فانوس رمضان بتاع الصين . ألاغيه بالطفاشة يسيح في إيدي زي حتة الحلاوة الطحينية .. وعبي يا روكا .
قال الشيخ : ربنا يديم الضلمة !