باسم يوسف لمرسي : اللي بيشتغل سياسة ومستني الناس "تصقف له" يشتغل في حضانة

هاجم الإعلامي الساخر باسم يوسف الدكتور محمد مرسي رئيس الجمهورية بعد تحذيره للذين يتطاولون أو يجرحون الناس، قائلاً "من الآخر كده لما حزب أو تيار يمسك السلطة خصومه السياسيين بيطلعوا له القطط الفاطسة ومش بيشوفوا إلا العيوب السياسة ما فيهاش إنصاف في العالم كله".

وأضاف يوسف عبر حسابه على موقع "تويتر" عصر اليوم "الحزب اللي في السلطة على طول بيلعب دور الضحية وإن الإعلام و المعارضة ضده.. مافيش إنصاف ولا حيادية في السياسة.. ماحدش حيطبطب عليك مهما عملت".

واستطرد يوسف "بصوا يا جماعة اللي بيشتغل في السياسة و مستني الناس تصقفله يشتغل في حضانة أحسن مفيش إنصاف أو حيادية في السياسة دور الضحية ماعدش ينفع"، وأشار إلى أن حزب أردوغان في تركيا "متبهدل في الجرايد كل يوم"، وأوباما "متبهدل في إعلام الجمهوريين في أمريكا"، و جورج بوش كان "متبهدل من إعلام اليسار"، على حد تعبيره.

وواصل يوسف "أما موضوع النقد البناء ده فمكانه في موضوعات الإنشا مفيش نقد بناء.. مفيش إنصاف.. مفيش حيادية في السياسة، والنقد البناء والإنصاف والحيادية موجودين بس في اليوتوبيا إحنا مش عايشين في يوتوبيا.. السياسة قذرة.. لو مش عايز تتوسخ اتفرج على سبيس تونز"