هيئة مكتب سفراء السلام بمصر تتقدم بالتهنئة لاوائل الثانوية العامة وتخص بالذكر ( مريم ) الملقبة مريم بمليووووون راجل

هيئة مكتب سفراء السلام بمصر تحت رعاية السيدة الفاضلة / السفيرة هدى
تتقدم بالتهنئة لاوائل الثانوية العامة وتخص بالذكر ( مريم ) الملقبة مريم بمليووووون راجل
كما تناشد السفيرة هدى وجميع سفراء السلام
السيد/ رئيس الجمهورية بتكربم تلك الطالبة واسرتها وتوفير مسكن ملائم لهم
محمد سالم
مريم .. بنت بمليون راجل
الفتاه التى صفعت المجتمع والمراهقين على وجوههم بقسوة !
** مريم .. الجميله العسل دى
من اوائل الثانويه العامه .. 99%
امبارح كانت ضيفة حلقة معتز الدمرداش
** مريم والدها حارس عقار او زى ما بنقول بالبلدى بواب
** انا خرجت من اللقاء كله امبارح بشوية رسايل .. رسايل من البنوته اللى كانت بتتكلم بكل تلقائيه وحب ورضاء وسعاده ..
رسائل لعل ربنا بعتها جايز تفوق عقول .. او تنقذها
1- مريم فخوره .. مريم وقفت قالت للكل ابويا حارس عقار
المدرسين .. وسكان العماره .. واصحابها ..
لما اتعمل معاهم لقاء..قالوا كانت بتتعمد تجيب ابوها وتقولنا دا ابويا وشغلته حارس عقار ???? ..
===========
2- امبارح طول الحلقه .. اى كلام عن نجاحها .. تقول ربنا وامى وابويا
ولا مره خلال حلقه استمرت اكتر من ساعتين قالت كلمة أنا !
دايما ابويا وامى ????
==========
3- امبارح واحده من سكان العماره اللى والدها بواب فيها اتصلت بمعتز الدمرداش .. الست كانت مبسوطه اوى .. وبتقوله انا من زمان وانا بقولها يا دكتوره مريم ..كنت عارفه انها هاتبقى دكتوره
دى كانت رساله .. رساله ان لسه في ناس فى مصر بتتعامل بالانسانيه
لسه مابقيناش كلنا بنبص نظرات التعالى
واللى راكب عربيه عاوز يدوس على خلق الله
واللى معاه فلوس حاسس انه اشترى الكل بفلوسه
لسه فى ناس محترمه وشبعانه
=======
4- ايوه مريم كانت القشه اللى قصمت ظهر الحمير مش البعير
لان مريم امبارح قالت انها قاعده هى ووالدها ووالدتها و اربع اخوات بنات فى اوضه .. وانها عشان تعرف تركز فى المذاكره ..كانت بتذاكر فى محل .. بتروح تقعد فى محل مقفول عليها وتذاكر …
ولما معتز سألها انتى كنتى بتقدرى تذاكرى رغم ظروفك دى ؟
ردت قالتله ظروف ايه؟! .. انا ماعنديش ظروف
الحمد لله انا احسن من غيري وماكانش فى اللى يعطلنى عن مذاكرتى !!!!
سطرين الرضا والجمال دول كانوا بمثابة صفعه على وش كل عيل فى نفس سنها وعمال يشتم ويصوت على حاله رغم انه طول السنه بيذاكر تحت التكييف وعلى سرير وجنبه العصير وبياخد دروس وفى الاخر سقط !!
=======
5- الصفه التانيه …
هى كانت نفس الرساله اللى قالتها مريم بدون قصد
واللى بسببها برضو صمم الفنان محمد صبحى يعمل مكالمه
لما مريم قالت انا ماعنديش فيس بوك ولا تويتر ولا واتس
معايا تليفون بيقول الو بس عشان اطمن بابا عليا
ودخل محمد صبحى قال لمعتز ..امسك فى النقطه دى …
نجحت لان مفيش فيس بوك ..مفيش اللى يشغلها .. عشان كده كان عندها وقت تنجح وتتفوق ..الفيس بوك يا جماعه..السرطان اللى انتشر فى عقولنا كلنا..و دى حقيقه ..أيام الامتحانات اللى فاتت الشباب بتوع ثانوى كانوا بينزلوا كوميكس انه كل ما يجي يذاكر يرمى الكتاب ويمسك الموبايل !!
البنت اللى استغنت عن السرطان دا..طلعت الاولى على مصر ????
6- الصفعه التالته …
مريم وهى بتتكلم …
بتقول انا نفسى اعمل حاجه لبلدى
فمعتز الدمرداش فكره كلام انشا و هز راسه
قالتله لا..انا مابقولش كلام انشا ..
البلد دى اخدت منها مدرسه مجانى وطلعت الاولى
ولسه البلد دى هاتدينى جامعه ببلاش
فلازم لما اتخرج اعمل اللى يساعدها
دى كانت صدمه بالنسبالى لما سمعتها بتقول كده
كنت عاوز اقولها اصرخى وقولى كلامك دا للكلاب من المراهقين اللى فى نفس سنك اللى شغلتهم انهم يعملوا صفحات كوميكس وسخريه على انستجرام كلها بتدور حوالين الهجره من البلد والبلد الزباله والبلد اللى بتقضي عليهم والبلدى اللى مش بتديهم حاجه !!!
الكلمتين دول كانت اكبر صفعه على وجه الكلاب دول
اللى البنت ماعندهاش ربع الى عندهم
7- اما الصفعه الاخيره … كانت صفعة مريم للمجتمع
فى الفقره التانيه تم استضافة والد مريم الراجل المحترم
ذكر نقطه خليتنى مندهش .. وفى نفس الوقت عرفت ان البنت دى بمليون راجل
ابوها قال .. بنتى تفوقت عشان اتحدت اهلها !!
سأله معتز ازاى يعنى
قاله انا فلاح .. وعندنا فى الفلاحين العزوه بخلفة الرجاله
وانا عندى 5 بنات فكان دا مش حلو
مريم وهى فى تالته اعدادى قعدت معايا وقالتلى والله العظيم هاثبتلك انى احسن من مليون ولد واخلى كل الناس تتكلم عنك .. وحصل ..وفى يوم وليله بقيت بطلع على التلفزيون .. والناس كلها بتتكلم عنى !
8- حاجه بسيطه حصلت محدش اخد باله منها فى اللقاء
اتصل حد من جريدة الجمهوريه وقالها عاملين ليكي مفاجأه
انتى هاتطلعى مع الاوائل رحله لاوروبا
ردت البنت قالتله شكرا ..بس مقدرش اوافق قبل ما استشير اهلى !!
انا انبسطت ..لانى يوميا بشوف الاصغر منها وهما بيعملوا كل حاجه غلط بدعوى الحريه والفرررى !
9- اما الحاجه الاخيره .. دى منى انا مش من مريم
الناس اللى بتقول التعليم مالوش لازمه وان الشهادات مالهاش لازمه
وان المتعلم زى اللى مش متعلم
انا معاك ان الشغل بشهادتك صعب
بس العلم نووووور مهما اختلف الزمن
والا ماكنش والد مريم امبارح يقول ..
انا ساكن عندى فى العماره ناس متعلمين ..
بصيت ليهم ولكلامهم ومعاملتهم و اخدتهم قدوه ليا