يحدث في مصر

ريهام إبراهيم : أهلا بكم أعزائى المشاهدين أهلا بكم ومرحبا فى حلقة جديدة من يحدث فى مصر حلقة النهاردة هنواصل فيها حديث كنا بدأناه سابقا عن المنتجات وعن السلع اللى بيستخدمها المواطن المصرى فى حياته اليومية والأسرة المصرية بالكامل بنستكمل هذا الحديث وتحديدا مصلحة مهمة جدا وتابعة لوزارة التجارة والصناعة مصلحة الكيمياء ومصلحة أخرى لا تقل أهمية عنها وهى مصلحة الرقابة الصناعية
محمد المغربى : مصلحة الكيمياء تم إنشاءها فى عام 1898 كان معمل للتحليل الكيميائى وكان ساعتها فى مصر حدث فريد وكان معمل وحيد بعدها ب 100 سنة تقريبا فى عام 1990 أنشئ فرع المصلحة بأسيوط لخدمة مناطق الصعيد وقبل 8 سنوات فى عام 2002 أنشئ معمل للمصلحة آخر داخل المنطقة الحرة لمدينة نصر لخدمة مصانع النسيج بها وأيضا خدمة فروع أخرى تم إنشاءها مستحدثا
ريهام إبراهيم : مصلحة الكيمياء فى مصرهى الجهة المعتمدة لإجراء كل الاختبارات والتحاليل للخدمات والمواد والمنتجات الصناعية بكافة أنواعها معاونة أيضا الجهات الرقابية فى حماية المستهلك وفى مكافحة الغش التجارى والصناعى وده بيتم بإجراء الاختبارات والتحاليل لعينات كل هذه المنتجات
محمد المغربى : إذن الجزء الأول من حلقة الليلة سيخصص لمصلحة الكيمياء أما الجزء الثانى فسنفرده للحديث عن مصلحة الرقابة الصناعية هنتكلم عن نشأتها ، عن دورها ، عن المهام بتاعتها ربما حتى نتكلم عن الحملات التى تقوم بها أيضا الاشتراطات التى وضعتها لمنح تراخيص جديدة للمصانع وكمان لمراكز الصيانة مثلا لاستخدام قطع غيار أصلية للسيارات
ريهام إبراهيم : الحقيقة إن فيه أسئلة كثيرة جدا وفيه أيضا حديث هام عن مصلحة الكيمياء فى حياتنا اليومية وفى حياة كل مواطن وكل مستهلك وكذلك مصلحة الرقابة الصناعية هنقترب أكثر من الصورة ونتعرف على هذه المصلحة من خلال حوارنا مع ضيفنا وضيفكم الدكتور هانى بركات رئيس الهيئة المصرية للمواصفات والجودة والمشرف أيضا على مصلحتى الكيمياء والرقابة الصناعية بوزارة التجارة والصناعة مساء الخير يا دكتور
محمد المغربى : أهلا بك معانا يا دكتور هانى معانا تقرير بسيط عن مصلحة الكيمياء وعن مصلحة الرقابة الصناعية نشوفه سريعا ونبدأ الحوار
فاصل تقريرى
مذيع التقرير : صحة المستهلك أهم أولويات وزارة الصناعة والتجارة ليس هذا مجرد شعار ترفعه الوزارة بل سياسة تطبقها من خلال مصلحتين بها مصلحة الرقابة على الصناعة التى تعمل من خلال حملاتها التفتيشية على المنتجات الصناعية للقضاء على الصناعات الضارة بسمعة الصناعة المصرية
م / معتصم عرابى : المصلحة أنشئت سنة 1956 وابتدت تباشر أعمالها طبقا لقانون تنظيم الصناعة اللى صدر سنة 1958 المصلحة كان دورها الرئيسى والأساسى هى التأكد من جودة المنتجات الصناعية بجميع قطاعاتها فى المصانع المنتجة بمعنى إن احنا نتأكد من جودة المنتج وسلامته بالنسبة للصحة والأمن وتطبيق المواصفات القياسية المصرية على هذه السلع والمنتجات
مذيع التقرير : مصلحة الكيمياء والتى تعد واحد من روافد وزارة التجارة والصناعة والرقابة وتقوم باختبار كافة الخامات الطبيعية والمنتجات المطروحة فى الأسواق طبقا للمواصفات القياسية فى كافة المحافظات
د / مخلص الكردى : المصلحة بتقوم بدورها فى مجالات عديدة يعنى هى بتخدم جهات متعددة سواء المستهلك المصرى أو سواء الاقتصاد القومى يعنى لها دور مهم فى الاقتصاد القومى يعنى فى الاقتصاد القومى وزارة المالية ممثلة فى الجمارك والضرائب على المبيعات بتستعين بالمصلحة لتعيين المواد الأولية أو بالمواد المنتجة المستوردة لتحديد التعريفة الجمركية على هذه المنتجات
مذيع التقرير : وتبقى جولة هى الأهم وأكبر التى تحمله الدولة على عاتقها فى حماية المستهلك
ريهام إبراهيم : دكتور هانى يعنى بعد ما شفنا يعنى هذا التقرير ومعمل بيختص بمياه الشرب أكيد فيه مواد مستهلكة من قبل الأسرة المصرية بتهتم بها هذه المصلحة نبدأ بمصلحة الكيمياء وهذه المعامل بما فيها من كوادر بشرية إيه هو التطوير اللى بتشهده نظرا لأهميتها فى الرقابة على هذه المنتجات
د / هانى بركات : هو الحقيقة مصلحة الكيمياء هى مكملة لهيئة مواصفات فى ضمان سلامة وجودة المنتجات المصرية المكمل هو معمل يستطيع إن هو يختبر المنتجات الصناعية ويقرر مطابقتها أو عدم مطابقتها للمواصفات وهو عمل علمى على أعلى مستوى والحقيقة العلم بيتقدم بسرعة كبيرة جدا المواصفات بتتقدم بسرعة جدا كذلك مصلحة الكيمياء تتقدم بسرعة جدا مصلحة الكيمياء هى مصلحة علمية بيولوجية متخصصة بتطبق المواصفات بيجي لها المنتج الصناعى وهى اللى بتحدد هذا المنتج الصناعى سواء مستورد أو منتج محليا مطابق أو غير مطابق للمواصفات آمن للمستهلك المصرى أو غير آمن للمستهلك المصرى وبتطلع تقريرها وهو تقرير ملزم لجميع الجهات فى مصر
محمد المغربى : طب يا دكتور هانى لما قررنا نخلى حلقة النهاردة عن مصلحة الكيمياء كان عندنا حاجة واحدة كان عندنا محور واحد إن فيه كثير من الجهات فى البلد المواطن العادى أو احنا أنفسنا لا نعلم أهمية دورها احنا بنوضح للمشاهد إن مصلحة الكيمياء هى المسئولة عن مراجعة أى حاجة تخش البلد دى حاجة خطيرة أكد لى الجملة دى وكلمنى عن تفاصيلها
د / هانى بركات : مصلحة الكيمياء هى فعلا المعمل بعينه المعتمد لضمان سلامة وجودة المنتجات فى مصر سواء مستوردة أو مصانع محلية مصحلة الكيمياء بتختبر فى السنة حوالى 120 ألف منتج وبتقرر مطابقتها للمواصفات وللا لا ومصلحة الكيمياء بقى دورها مهم جدا فى السوق لما كنا استيرادنا قليل والاستيراد مغلق كان الحاجة للرقابة أقل لكن الآن الاقتصاد مفتوح المنافسة كبيرة جدا سواء للمنتج المحلى أو المستورد وهنا مهم جدا إن احنا نقوى آليات الرقابة وضبط الأسواق أنا هنا بحمى المستهلك المصرى أنا كمان بحمى الصناعة المحلية من منافسة ضارة لمنتج غير مطابق للمواصفات أنا بفتح أسواق للمنتجات المصرية فى الخارج مصلحة الكيمياء هى اللى بتبنى ثقة المستهلك المصرى فى المنتج المصرى وثقة السوق العالمى فى المنتج المصرى
ريهام إبراهيم : بس يا دكتورمصلحة الكيمياء هى المؤسسة الوحيدة المسئولة عن رقابة هذه المنتجات بتنوع أهميتها لدى الأسرة المصرية يعنى إزاى وهى لازم تكون مثلا كبيرة من ناحية الكوادر من ناحية الأجهزة من ناحية الإدارات الموجودة فيها هل هناك إدارة عامة للبحوث مثلا فيها خصوصا مع انتشار المناطق الصناعية وكثرتها فى أماكن مختلفة فى القاهرة وفى غيرها
د / هانى بركات : هو فى الحقيقة هى فعلا مصلحة الكيمياء هى الجهة المحايدة اللى بتطبق المواصفات يا إما مطابقة للمواصفات يا إما غير مطابقة للمواصفات هى فعلا دورها زاد جدا فى المرحلة الأخيرة هناك توسع كبير جدا فى فروعها مصلحة الكيمياء عندها دلوقتى 5 فروع فى أنحاء الجمهورية ولكن بتتوسع مع توسع المناطق الصناعية مهم جدا فى كل منطقة صناعية يكون فيه معمل اختبارات لسلامة المنتجات هى دورها بيزيد جدا جدا مع التنمية الصناعية ومع آليات السوق لكن هى ضمان إن المستهلك المصرى بيوصل له منتج آمن وسليم سواء مستورد أو مصنع محلى
محمد المغربى : دكتور هانى هل تفتكر مثلا فى 2009 المصلحة رفضت علميا دخول كام شحنة من أصل كام يعنى ممكن تقول لى والله تقدم شحنات كذا رفضت المصلحة رقم كذا لأسباب ما؟
د / هانى بركات : فى قطاعين المستورد والمحلى الحقيقة عايز أضع مثال مهم جدا للمنتج المصرى بشترى المصرى ؛ المصرى بيخضع للرقابة
ريهام إبراهيم : ما هو لازم يكون فيه ثقة يا دكتور يعنى دايما المستهلك المصرى الثقة متوترة شوية مع المنتج المحلى وللا إيه ؟
د / هانى بركات : احنا الحقيقة عشان كده دورالمواصفات ومصلحة الكيمياء والرقابة الصناعية هو بناء ثقة المستهلك المصرى فى المنتج المصرى
ريهام إبراهيم : إزاى بقى ده يتم؟
د / هانى بركات : بإن احنا نضمن له إن هناك جهات بتضع مواصفات دولية وأن هناك مصلحة كيمياء بتطبق معايير دولة لاختبار المنتجات ثم هيئة الرقابة الصناعية بتراقب الأسواق رد على سؤال حضرتك حوالى 20 % من العينات اللى بتخش مصلحة الكيمياء غيرمطابق يعنى لو 120ألف عينة فى السنة حوالى 20 % منهم غير مطابقين للمواصفات وبيمنع دخولهم لو هم مستوردين ولو هو منتج محلى يمنع نزوله فى الأسواق
محمد المغربى : هل فيه زى محكمة الطوارئ كده هل فيه حق النقد مثلا لرأى مصلحة الكيمياء هل ممكن حد يتقدم بتظلم وللا رأى نهائى لا يخضع لنقاش
د / هانى بركات : فيه استئناف يعنى إذا مصلحة الكيمياء قررت إن هذا المنتج غير مطابق للمواصفات من حق المتضرر إنه يستأنف فى هذه الحالة بنعيد التحليل فى معمل آخر تابع لمصحلة الكيمياء لو فى القاهرة يبقى فى الاسكندرية بتنقل العينة لمعمل الإسكندرية وفيه تقرير ثانى
ريهام إبراهيم : طب لو مصلحة الكيمياء قالت على منتج إن فيه مخالفات يعنى إيه هى العقوبات اللى بتطبق يعنى مثلا الأختام اللى كانت أو بتتم استخدامها على بعض اللحوم مصلحة الكيمياء فى يوم من الأيام قالت وقرأنا إن فيها مشاكل وخطورة صحية كبيرة جدا وفيها بعض المواد المستخدمة المحظورة مش فى مصر محظورة دوليا ما هى العقوبات
د / هانى بركات : أنا عاوزأقول إن الموضوع اللى حضرتك أثرتيه ده الحقيقة بيدل على قوة أجهزة الرقابة فى مصرإن مصلحة الكيمياء قادرة دائما إنها تراقب حضرتك لاحظى إن هذا الموضوع تقوم به جهة حكومية فمصلحة الكيمياء بتراقب جودة المنتج سواء من القطاع الخاص أو من الجهات الحكومية ومصلحة الكيمياء جهة علمية محايدة ما بتشوفش إسم مصدر العينة أو بتطلع دائما تقرير علمى محايد موضوع العقوبات اللى بيطبقه الرقابة الصناعية وهنا برضه مهم فى العملية التنظيمية فى الأسواق أن يكون المعمل جهة علمية محايدة وجهة الرقابة والعقوبة جهة أخرى دى هنكملها فى الرقابة الصناعية لكن مصلحة الكيمياء أنا بس عايز أقول إيه التطوير بيتم وكل تحسين قدراتنا العلمية بتتم كل ما قدرتنا على الكشف بتزيد احنا نستغرب جدا لو حللنا ألف منتج طلعوا كلهم مطابقين يبقى مؤكد فيه حاجة غلط يبقى الأجهزة الرقابية كلها بتطور بنرجع لكم باكتشاف مكونات غير مطابقة للمواصفات
محمد المغربى : دكتورهانى عاوز أرجع برضه فى غضون سنة عاوز أعمل إحصائية فى غضون سنة كده إيه أشهر حاجة تم رفضها مش هنقول إسم المنتج لكن الصنف إيه وليه لإن ممكن يكون فيه منتج جاب 10 أطنان من كونتينة فيها دفع تحويشة العمر زى ما بيقال وجهة الرقابة تقول له ممنوع دخولها مصر إيه أشهر حاجة
د / هانى بركات : يمكن أشهرحاجة تحضرنى بشكل واضح قطاع غيار السيارات اللى فيها مادة الاسبيتيوس العالم اتفق على منع استخدام مادة الاسبيتوس فى أى نوع ومصرطبقت المواصفة وبدأت مصلحة الكيمياء تطبق هذه المواصفة نتج عنها رفض
محمد المغربى : شحنة سيارات ؟
د / هانى بركات : عشرات الشحنات من قطاع السيارات مكونات سيارات بالاسبيتوس لما عرفنا هذارفضنا دخولها مصر بالكامل طبعا برضه بعض الشحنات الخاصة بالمواد الغذائية
ريهام إبراهيم : أخبار مياه الشرب إيه يا دكتور كان عليها بعض المشاكل فى الفترة الأخيرة بعض الأسماء فى مياه الشرب الحديث كتر عليها لدرجة إن خلاص المستهلك بقى بيبعد عنها
د / هانى بركات : الحقيقة عشان نرجع ثقة المستهلك فى المياه المصرية التطوير تم على 3 مراحل : المرحلة الأولانية بالمواصفة نفسها ؛ المواصفة المصرية كانت بتعتمد على المنتج النهائى يعنى المياه المعبئة بناخدها نحللها لكن الحقيقة المواصفة تطورت أصبح هناك مواصفة للمصنع نفسه لازم تكون الشروط الصحية المطبقة جوة هذا المصنع مطابقة للمعايير الدولية ما بكتفيش بالمنتج النهائى فتم تطبيق نظام دولى للمعايير الصحية داخل المصانع وإلزام جميع المصانع للمياه المعبئة بتطبيقه ومراقبتها ده الحقيقى أدى إلى تقليل خطورة منتج نهائى مفيش داعى إن احنا ننتظر الشروط الصحية غير مؤائمة وما يكونش فيه بعد كده مخالفات فى المنتج النهائى فطبقنا مواصفة الإنتاج ومواصفة المنتج النهائى
محمد المغربى : طيب معانا 30 ثانية على الفاصل وفيه سؤال فى ثانية كده إزاى بتغطوا كل الجمهورية انتوا لكم 5 فروع زى ما قلنا فى المقدمة إزاى مصلحة الكيمياء بتشرف على مراجعة كل المنتجات المصنوعة خاصة فى ضواحى الصعيد فيه هناك مصانع يعنى كثيرة جدا مش عايزأقول مش مصانع أصلا إزاى بتشرفوا عليها
د/ هانى بركات : مصلحة الكيمياء غير مصلحة الرقابة الصناعية ، الرقابة الصناعية فيها 18 فرع على مستوى الجمهورية وجارى إنشاء فرعين كمان يبقى عندنا 20 فرع فيها حوالى ألف مفتش بيخشوا المصانع وبيتجمع هذا فى 5 فروع حاليا لمصلحة الكيمياء مصلحة الكيمياء ما بتنتقلش للمصنع الجهة الرقابية أو الرقابة الصناعية هى اللى بتغطى الجمهورية ومصحلة الكيمياء هى المعمل اللى بيتلقى العينات
ريهام إبراهيم : احنا هنستكمل الحديث أكيد عن رقابة أخرى ومصلحة أخرى هى الرقابة الصناعية وخصوصا إن حضرتك لقت لنا مدخل جميل وهو مدخل العقوبات مع الرقابة الصناعية ولكن فاصل ونستكمل معا برنامج يحدث فى مصر مشاهدينا الكرام إبقوا معنا لازال لدينا الكثير
فاصل
محمد المغربى: عدنا إليكم مشاهدينا الكرام والحديث متواصل مع الدكتور هانى بركات عن مصلحة الرقابة الصناعية بعدما تكلمنا عن مصلحة الكيمياء دكتور هانى يعنى مصلحة الرقابة الصناعية أنا واحد من الناس ما أعرفهاش إنما هل دورها كان بالتوازى مع مصلحة الكيمياء هل تاريخها برضه من 120 سنة تقريبا هل يعنى بيكملوا بعض إلى أى مدى؟
د / هانى بركات : مصلحة الرقابة الصناعية هى الشقيق الثالث لمنظومة الجودة ؛ المواصفات والمعامل ورقابة الأسواق مصلحة الرقابة الصناعية 18 فرع على مستوى الجمهورية حوالى 1000 مفتش هى اللى بتراقب المصانع المصرية بتزور المصانع المصرية بشكل يعنى منظم وبتأخذ عينات عشوائية عشان تتأكد من مطابقة المواصفات وبرضه الحقيقة بتتأكد من تطبيق المصنع مش بس المواصفة ولكن مواصفات الإنتاج نفسه المصنع لابد أن يكون متوافق بيئيا لابد أن يطبق المعايير الصحية ولابد أن ينتج منتج مطابق للمواصفات وآمن للمستهلك المصرى فهى الحقيقة الزراعة التنفيذية لمنظومة المواصفات والجودة
ريهام إبراهيم : يعنى هى اللى بتترجم كل اللى احنا بنقوله ده على أرض الواقع طيب لو قربنا من دورها أكثر إيه فائدة الرقابة الصناعية فى كيان زى الصناعات العشوائية وهى صناعات منتشرة إزاى ممكن بدل ما يتم إغلاقها يتم تنميتها إزاى ندمجها مع المجتمع الصناعى وتبقى عضو فعال وبناء زى ما بنقول
د / هانى بركات : طبعا سلامة المواطن المصرى بترتبط بعدم وجود صناعات عشوائية لا تخضع للرقابة مهم إن المصانع تكون مسجلة وخاضعة للرقابة فالرقابة الصناعية بتعمل على كسب الصناعات العشوائية لتنظم للاقتصاد الرسمى ولا تسمح بوجود منتجات عشوائية غير مطابقة للمواصفات فى الأسواق فبتركز الرقابة على المناطق العشوائية وبتديها مهلة لتوفيق الأوضاع لتنضم إلى منظومة الرقابة والمواصفات
ريهام إبراهيم : ونجحت فعلا الخطة دى تنفيذ بعض المصانع العشوائية ودخولها تحت مواصفات الرقابة ؟
د / هانى بركات : الحقيقة يعنى نجحت إلى حد كبير ولكن احنا بنطور المنظومة على أساسين الأساس الأولانى هو طرح علامة الصناعة المصرية ؛ علامة الصناعة المصرية هى اللى هتفرق بين منتج جاء من مصنع مطابق للمواصفات وعليه رقابة أو منتج جاء من العشوائيات وسيمنع تداول أى سلع فى الأسواق غير حاصلة على علامة السلامة وهتبقى الرقابة الصناعية هى اللى بتراقب تطبيق علامة السلامة المصرية فى الأسواق المصرية
محمد المغربى : دى علامة مرئية؟
د / هانى بركات : علامة مرئية هنعمل إعلان عنها إن شاء الله فى خلال الأسابيع القادمة
ريهام إبراهيم : شكلها إيه يا فندم العلامة دى؟
د / هانى بركات : الحقيقة العالم اتجه إنها تكون تصميم بسيط سهل على المستهلك بجميع مستوياته إن هو يتعرف عليه غير معقد مفيهوش كلام كثير سهل إنك تحطه على كل المنتجات بكل أشكالها وكل أحجامها هنعلن عن علامة السلامة المصرية خلال الأسابيع القادمة وهتبقى هى العنصر الأساسى فى ضبط الأسواق فى مصر
محمد المغربى : دكتور هانى هل كلامنا عن دورالرقابة الصناعية فيه بعض النموذجية فيه بعض يعنى التفاؤل شوية ما السوق مليان يعنى بمنتجات مجهولة المصدر زى ما بيقولوا حتى ساعات بيخش البلد مش السوق بيخش البلد حاجات مجهولة المصدر إيه هى التحديات اللى بتواجه يعنى مصلحة الرقابة الصناعية ؟
د / هانى بركات : الحقيقة التحديات هو التغير الضخم جدا فى شكل الاقتصاد المصرى اللى أصبح اقتصاد منفتح دوليا منفتح على الاستيراد منفتح على المنافسة فيه تعاون كبير جدا إذن انت بتلاقى من السلعة نوع واحد دلوقتى من السلعة الواحدة بتلاقى أشكال وأنواع لإن كان زمان الاقتصاد مغلق الاستيراد قليل الحكر قائم على القطاع العام دلوقتى آليات السوق بتدى للمستهلك المصرى بدائل كثيرة جدا جدا جدا اللى يكملها هو جهات رقابية قوية تضمن سلامة وجودة المنتجات
محمد المغربى : يعنى أعتبر ده رد على السؤال أنا ما أخدتش رد على السؤال الحقيقة إن انت معترف معايا إن السوق مليان بمواد مجهولة المصدر آه أو لا ؟
د / هانى بركات : أنا معترف مع حضرتك
محمد المغربى : كويس
د / هانى بركات : إن تحولنا لآليات السوق فرض علينا إن احنا نطور منظومة الجودة والرقابة أيوة دور الرقابة الصناعية بيزيد لإن المجتمع المصرى بيتجه إلى آليات السوق والضمان الحقيقى لثقة المستهلك المصرى فى المنتج المصرى هو وجود جهات رقابية قوية
ريهام إبراهيم : خط حماية المستهلك اللى موجود بقى له فترة وممكن الناس بتشتكى عليه من بعض الصناعات الرديئة ده تابع للرقابة الصناعية يعنى خطوط أخرى فيه مكاتب معينة للرقابة الصناعية علشان تبقى على صلة أكثر مع المستهلك نفذتها فعلا لتلقى الشكاوى .
د / هانى بركات : فيه تكامل كبير جدا للعمل ما بين جهاز حماية المستهلك وما بين مصلحة الرقابة الصناعية جهاز حماية المستهلك هو جهة تلقى شكاوى المستهلكين لكن علشان نحل هذه الشكاوى هنا ببيجى دور مصلحة الرقابة الصناعية بنحصر هذه الشكاوى ونفضل نتتبعها ونمنع المنتج غير المطابق للمواصفات ما هو كل ما تكررت الشكوى معناها إن فيه مشكلة فى المنتج المعلومات دى هى اللى بتستعملها مصلحة الرقابة الصناعية فى مراقبة الأسواق وبرضه هنا فيه موضوع مهم شوية إنه بينقسم السلع فى الأسواق حسب الخطورة الموسمية وحسب خطورة المنتج يعنى مثلا احنا دلوقتى داخلين على الصيف تيجى مثلا فى الأجهزة المعمرة التكييف لابد من التشدد على الرقابة على التكييف ومراكز الصيانة الخاصة بأجهزة التكييف برضه تيجى فى المياه المعبئة والمياه الغازية الصيف هو الموسم بتاع كثرة استخدام المياه المعبئة
محمد المغربى : والعصائر؟
د/ هانى بركات : والعصائر فاحنا بنعد الحقيقة ترتيب خطتنا فى الأسواق طبقا لتقدير المخاطر والموسم اللى احنا هنشتغل فيه
ريهام إبراهيم : والمراكز الخاصة بالسيارات زى ما حضرتك ذكرت التكييف فيه تكييف فى السيارات برضه فى صيانة السيارات ودى مراكز كثيرة جدا فيه مراكز معتمدة وفيه مراكز زى ما فيه منتج مجهول الهوية فيه مراكز مجهولة الهوية
د/ هانى بركات : الرقابة الصناعية عليها دور مهم جدا إن هى جهة رقابة مراكز الخدمة والصيانة وتم وضع مواصفة لمركز الصيانة الناس اللى بتشتغل فيه لازم تكون متدربة إزاى الأجهزة اللى موجودة قطع الغيار الأصلية ومصلحة الرقابة الصناعية بتعمل حملات مستمرة للتأكد من تقديم خدمة جيدة من خلال مراكز الصيانة للمواطن المصرى
محمد المغربى : دكتورهانى يعنى المصلحة رافعة شعار يعنى عنوانه الرقابة الصناعية على عين ساهرة على حماية المستهلك وحضرتك قلت إن مصلحة الرقابة الصناعية هى ذراع مصلحة الكيمياء إلى أى مدى بيكفل لها القانون يعنى هذه الآلية إلى أى مدى ممكن مفتش يقفل مصنع فيه مخالفات قل لى إيه الخطوات المتبعة مع مصنع فيه مخالفات؟
د/ هانى بركات : إن الحقيقة مصلحة الرقابة الصناعية فيها حوالى 1000 مفتش لهم ما يسمى التغطية القضائية يعنى بيقدرإن هو يدخل أى مصنع ويضبط المخالفات ويحولها إلى أحراز قطعا بيحرز ويحولها إلى النيابة وتحول قضية من الغش التجارى إلى لو فيه مواد غيرصالحة للاستهلاك الآدمى تتحول إلى عقوبة جنائية
محمد المغربى : ده بينزل لوحده وللا فيه حملة معينة معاه؟
د/ هانى بركات : لا الحقيقة فيه نظام لازم إن يتحط خطة وبتنزل حملة مكملة لعبض عشان تاخد العينات وعشان تحرزها وعشان تراقب المصنع أنا عايز أقول برضه حاجة احنا بنحاول إننا نفتح جسور ثقة ما بين الصناعة وما بين الرقابة الصناعية احنا يهمنا إن الصناعة المصرية تستطيع حقيقة أن تتوافق مع المواصفات تنتج منتج جيد فبنحاول دائما نعمل نوع من الرقابة الوقائية قبل للرقابة المانعة يعنى قبل ما أعمل له محضر يهمنى إن أنا أبعت له مرة واثنين وأزوره مرة واثنين وأتأكد إن الناس دى عندها القدرات الفنية ومطابق للمواصفات
محمد المغربى : وبيبقى فيه مدة محددة؟
د / هانى بركات : بالضبط
ريهام إبراهيم : فيه خطط يعنى واضح إن المصلحتين أهم من بعض الحقيقة والاثنين بيكملوا بعض وزى ما حضرتك قلت هم أشقاء فى منظومة كبيرة وهى المستهلك هو المستفيد آخر الخطط الموضوعة لمصلحة الرقابة الصناعية ومصلحة الكيمياء ؟
د / هانى بركات : زى ما حضراتكم أشرتم العبئ على المصلحتين دول بيزيد بشكل شديد جدا جدا مع تطور الاقتصاد المصرى ومع نمو الصناعة المصرية أنا برضه عاوز أقول الصناعة المصرية رأت فى السنوات الأخيرة نمو كبير جدا جدا ده بيحط عبئ على مصلحة الكيمياء وعلى مصلحة الرقابة الصناعية ويجب أن المصلحتين يتطوروا علميا وينمو بنفس معدلات الصناعة المصرية فاحنا حاطين نصب أعيننا أهداف واضحة جدا لابد أن نعيد ثقة المستهلك المصرى فى المنتج المصرى عاوزين لما المستهلك المصرى يتحط أدامه المنتجين ده مستورد وده مصرى يقول هاخد المصرى يهمنا إننا نفتح الحقيقة برضه أسواق دولية للمنتج المصرى الجودة هو مدخل المنتج المصرى للتصدير أنا بقول إن احنا يجب إننا نلعب دور فى القوى التنافسية للمنتج المصرى
محمد المغربى : هل بتشعر إن يدك مغلولة بعض الشئ فى عمليات التطوير هل انت محتاج دعم ما يعنى مثلا عندما تكتب على جوجل على الإنترنت تكتب مصلحة الكيمياء أو مصلحة الرقابة الصناعية هتجد 4 ، 5 أخبار عن دور المصلحة وبعدين عشرات المقالات عن أهمية التطوير ربما برضه الباحثين جوة المصحلتين بيناشدوا الناس بالتطوير أو بيناشدوا المسئولين هل بتشعرإن انت محتاج مزيد من الدعم؟
د / هانى بركات : أنا الحقيقة فى السنة الأخيرة بالذات أطلقنا استراتيجية جديدة لتنمية المواصفات والجودة فى مصر الحقيقة زودنا سقف توقعاتنا وبالتالى حطينا على نفسنا أهداف أكثر بنشعر إن عندنا تحدى لكن عندنا أمل كبير جدا وعندنا الحقيقة قصص نجاح احنا فى الفترة الأخيرة بدأنا فى قطاعين مهمين جدا وهى السيارات ومكوناتها ولعب الأطفال من المواصفات إلى المعامل إلى الرقابة الصناعية والرقابة فى الأسواق الحقيقة اللى احنا بنسجله النهاردة تحسن ضخم جدا فى جودة السيارات ومكوناتها ولعب الأطفال فاحنا بنرى المسئولية اللى علينا وبنرى أن المواطن المصرى يستحق أن يكون لديه منتج سليم وآمن طبقا للمعايير الدولية فاحنا عندنا أمل كبير جدا إننا نحدث تغيير حقيقى فى حياة المواطن المصرى
ريهام إبراهيم : المواطن المصرى فى انتظار هذا التغيير
محمد المغربى : للأسف مفيش مشكلة فى الدعم المادى تحديدا وللا إيه؟
د / هانى بركات : أنا عاوز أقول إن التطوير مش بس مشكلته الدعم المادى التطوير حقيقة مشكلته الرؤيا الصحيحة والثاقبة والقدرة على التغيير
محمد المغربى : المواطن المصرى والجميع فى انتظار هذا التغيير والمواطن يستحق والمنتج المصرى أيضا يستحق أن يكون على الخريطة العالمية لما له من خصوصية شديدة زى ما حضرتك ذكرت بعض المنتجات الجميلة اللى ربنا حبى بها هذا البلد شكرا لحضرتك وتمنياتنا بالتوفيق فى الخطط الموضوعة للهيئة وكذلك لمصحلة الكيمياء ومصلحة الرقابة الصناعية دكتور هانى بركات شرفنا بحضرتك
محمد المغربى : شكرا دكتورهانى وشكرا لمشاهدينا الكرام وأعتقد إن بعد حلقة النهاردة كلنا هتختلف نظرتنا واحنا ماشيين فى شارع رمسيس لمبنى يعنى بعد السنترال مكتوب عليه مصلحة الكيمياء كلنا هنعرف أد إيه هذا المبنى له دور فى الحفاظ على الصناعة الوطنية وأيضا فى الحفاظ على صحتنا وعلى أطفالنا
ريهام إبراهيم: وأهم شئ الثقة للمنتج المصرى
محمد المغربى : صحيح تصبحوا على خير
ريهام إبراهيم : شكرا لكم