اختراق

عمرو الليثي: مساء الخير منذ 40 عاما ومنذ اعلان وفاته في 28 سبتمبرعام 1970 كان السؤال الاهم هل مات الرئيس عبد الناصر طبيعيا ام قتل وكلما مرالوقت زاد السؤال اصرارا على الوصول الى اجابة واضحة وتدفقت المعلومات والشهادات من كل اتجاه وانتشرت الشائعات والاجتهادات حول موت الزعيم الا ان تضخم الملف زاد من غموضه وزاد من حيرة المنتظرين للاجابة ، ومهما قرانا وسمعنا وشاهدنا نعود ونسال نفس السؤال مرة هل مات عبد الناصر ميتة طبيعية ام قتل ورغم ان الاغتيال مجرد احتمال الا انه نال من البحث والمناقشة ما يفوق امكانية حدوثه واصبح لدينا عشرات السيناريوهات التي يؤكد كل منها انه هو الواقع وانه كان حاضرا داخل منزل الرئيس اثناء وفاته معا نفتح اليوم الملف الغامض ونطرح السؤال الصعب لعلنا نقترب من اجابة ربما تكون هي الخاتمة وتغلق الملف للابد فاذا كان الرئيس جمال عبد الناصر قد اغتيل فمن يقف وراء اغتياله هل قتلته تفاحة لبنانية مسمومة ام قتله طبيب التدليك عندما سرب السم الى قدمه ام قتله احدهم من مساعديه لحساب المخابرات الإسرائيلية اوالأمريكية هل كان للمخابرات السوفيتية دور في اغتياله، ما مدى تورط الاطباء في إعطاءه ادوية ادت لوفاته بسبب مرض السكر، لماذا اختلفت رواية الاستاذ محمد حسنين هيكل حول طريقة وفاة الرئيس جمال عبد الناصر، لماذا شكك الدكتور رفاعي كامل في طريقة علاج الرئيس مؤكدا ان قطعة سكر كانت كافية لانقاذه ، لماذا رفض علي صبري والسادات والشافعي تشريح جثة عبد الناصر ولماذا صرخ كبير أمناء الرئاسة عندما علم بخبر وفاة الرئيس قائلا مين اللي قتله ماذا حدث لجثة عبد الناصر وهي في تلاجة مطبخ الرئاسة لمدة 3 ايام .. للإجابة على تلك التساؤلات تابعونا بعد هذا الفاصل
فاصل
عمرو الليثي: في سبتمبر عام 1970 وقع صدام بين الجيش الاردني والفلسطيني مما دعا الرئيس جمال عبد الناصر لعقد اجتماع قمة طارئ للزعماء العرب بهدف وقف القتال بين الطرفين وبعد نجاح مهمة عبد الناصر في احتواء الازمة الناشئة بين الملك حسين والرئيس ياسر عرفات انتهى المؤتمر وبدأت الوفود العربية المشاركة في العودة لبلادها وكان عبد الناصر حريصا على اصطحاب الحكام العرب .
فاصل
السيد / سامي شرف- مدير مكتب الرئيس جمال عبد الناصر: عمل لغاية 27 سبتمبرعمل ليل نهار زائد مجهود بقى متراكم 18 سنة مجهود لا يتحمله جبال.
مصطفى بكري- الكاتب الصحفي: استمر على مدى اسبوع مقيم في فندق هيلتون النيل يتابع ويتصل ويحاول على قدر المستطاع ان يتوصل الى حل من خلال الوصول الى اجندات مختلفة للاتفاق على هذا الحل بين الفلسطينين وبين الاردنيين الى ان كللت جهوده بالنجاح.
منى عبد الناصر- كريمة الرئيس الراحل جمال عبد الناصر: والدي كان جه يوم 27 قبل الوفاة بيوم من الهيلتون وبات وقال انا عايز اجي ابات في البيت وبات في البيت وبعدين صبح كان بيودع رئيس ورا رئيس.
أ/ضياء الدين داوود- عضو اللجنة المركزية للاتحاد الاشتراكي: الريس الحقيقة رغم التعب الذي كان بيعانيه في ذلك ذلك الحين اصر على انه يوصل كل رؤساء المؤتمر في المطار وفضل في المطار يودعهم واحد تلو ة الاخر لغاية ماجه وداع امير الكويت.....
محمود صلاح- كاتب صحفي: بعد ما انتهى الرئيس جمال عبد الناصر من توديع امير الكويت وهو واقف تحت الطيارة حس بالم في صدره وبدا يتصبب عرق غزير وشعر بتعب وطلب ان هما يجيبوله السيارة اللي اتجهت بيه لبيته .
عمرو الليثي: بدات رحلة نهاية الزعيم وهو في طريق عودته لمنزله في منشية البكري حيث ازداد عليه الالم والعرق وبدا طبيبه المرافق له بتدليك قلبه وقام بالضغط عليه عشرات المرات حتى وصل الى منزله وما ان جاءت الساعة الخامسة والربع حتى كان الرئيس جمال عبد الناصر قد لفظ انفاسه الاخيرة .
هدى عبد الناصر- كريمة الرئيس الراحل جمال عبد الناصر: يوم الرحيل دخل علينا احنا كنا بنستناه على السفرة فدخل علينا قالنا اتغدوا انتوا انا تعبان.
عمرو الليثي: الساعة كام دخل عليكم ؟
هدى عبد الناصر: حوالي الساعة 4.. بعد ما وصل امير الكويت رجع وكان تعبان هو كان عادته بعد المؤتمرات دي يبقى تعبان فكان يخش ينام الضهر ينام بقى 3 ساعات حاجة كده فقال انا مش هتغدى حتى انا اتغديت وروحت بيتي على اساس انه هيخش ينام .
عمرو الليثي: لما قالكم مش هتغدى اتغدوا انتوا هل كان ظاهر عليه أي مظاهر ارهاق ؟
هدى عبد الناصر: اه كان تعبان جدا .
منى عبد الناصر : دخل لقيته دخل من بره قال انا تعبان انا مجهد وبعدين قالي روحي هاتيلي حاجة حلوة فرحت جبتله شوكليت زي كراميلة كده ودخلتله وقعدت وبعدين قاللي اطلبي الدكتور الصاوي كلمت السكرتارية وجه الدكتورالصاوي على طول يعني مكانش بياخد 10 دقايق .
د/ الصاوي حبيب- الطبيب الخاص للرئيس جمال عبد الناصر: لقيت السيدة تحية قالت لي انا شفته جاي تعبان واديته كباية عصير دخلت فلقيته ممدد في الفراش متنبه تماما لكن فيه عرق لافت للنظر في الكشف الطبي واطرافه باردة وبرودة الاطراف دي بتيجي مع الصدمة القلبية كعلامة من علاماتها والنبض سريع جدا وفي نفس الوقت ضعيف جدا وفي الحال ادركت خطورة الموقف وهرعت الى التليفون وطلبت الدكتور منصور والدكتور زكي الرامزي.
مصطفى بكري- الكاتب الصحفي : ابلغ عدد من المسئولين سامي شرف، شعراوي جمعة ،محمد فوزي، محمد احمد.. قالهم الرئيس تعبان فالكل جه يجري يشوف ايه الحكاية .
عمرو الليثي: كيف شخص الحالة ؟
د/ الصاوي حبيب: ازمة قلبية تسببت في جلطة في الشريان التاجي سببت الصدمة القلبية .
منى عبد الناصر- كريمة الرئيس الراحل جمال عبد الناصر: مفهمتش كان ساعتها اقدر اقول عليه يعني كنت شايفة كل حاجة قدامي اللي فهمت ماما ان هو فيه خطر انا مفهمتش ان فيه خطر خالص....بخش وبقعد وبعدين قالولي اطلعي انت وماما وبعدين لقيت ماما طالعة تقولي اقري قران وانا برضه مفهمتش يعني ايه اللي بيحصل مفهمتش على الاطلاق.
محمود صلاح:المهمة كانت صعبة جدا مجموعة الاطباء اجتمعوا حوالين الرئيس جمال عبد الناصر وهو نايم في السرير وحاولوا انقاذ حياته واستخدموا الاسعافات الاولية استخدموا جهاز الاكسجين استخدموا اجهزة الصدمة الكهربائية عشان تنشط القلب كل اللي كانوا يعرفوه ..كان شبح كارثة في بيت الرئيس.
د/ الصاوي حبيب: بعد ما حسيت كان الدكتور منصورعاوز يروح الجبهة واتكلموا شوية في الاخر قال انا عايز اسمع نشرة اخبار الساعة الخامسة على ما اعتقد وقام اعتدل في الفراش.
منى عبد الناصر : قعدت برضه في كرسي في اوضة النوم وكانت الدكاترة حواليه وقالوا هو كويس لقيته كان مستني خبر مستنيه في البي بي سي مش عارفة ايه اللي كان مستنيه
مصطفى بكري: عبد الناصر فتح الراديو بايده فحب يسمع نشرة الاخبار من البي بي سي فلقى غالبية النشرة كانت تتحدث عن المناورة التي كانت تقيمها الولايات المتحدة مع الاسطول السادس الامريكي في البحر المتوسط بغرض البعث برسالة الى جمال عبد الناصر بأننا موجودون هنا طبعا عبد الناصر علق ساخرا في هذا الوقت فقال والله دا ريتشارد نيكسون خد النشرة لحسابه وقعد يستعرض بالاسطول السادس احنا ما يهمناش حاجة .
منى عبد الناصر : هو دايما كان يكلمني بلغة المذكر يعني ما يكلمنيش على اني مؤنث ابدا من كتر ماكنت بتشاقى مع اخواتي فكلمني وقالي اندهيلي الدكتور تاني.
د/ الصاوي حبيب :قلت له سيادتك مستريح قاللي انا مستريح ياصاوي وانتهى .
عمرو الليثي: وتوفى ؟
د/ الصاوي حبيب:اه بصيت لقيت وشه..قعدنا نعمله التنفس الصناعي .
عمرو الليثي: وتدليك للقلب؟
د/ الصاوي حبيب: اه طبعا يعني لمدة حوالي تلت ساعة .
منى عبد الناصر : دخلت لقيتهم بيحاولوا يعملوا تدليك للقلب ماما عرفت ان بابا اتوفى وقالت لي جمال راح وقعدت تعيط انا برضه ساعتها عادي ماكنتش لم اتصور انه مات ....
د/ الصاوي حبيب: وخرجت من الاوضة ومش عارف مين اللي كان بره وقلت له مفيش فايدة
محمود صلاح :كل الاطباء ادركوا ان محاولاتهم لن تجدي وان روح الرئيس جمال عبد الناصر فارقت الجثمان وتوفى الرئيس جمال عبد الناصر وبدا الدكاترة يبعدوا واحد واحد يبعدوا عن السرير وعلى باب اوضة النوم منصور فايز مقدرش يتحمل وانفجر في البكاء ودموعه فجرت دموع كل اللي موجودين في الوقت دا
منى عبد الناصر : جريت انا بقى كلمت هدى قلتلها تعالي ياهدى وكلمت خالد وقلتلهم دوروا على عبد الحكيم وحكيم اخويا كان في البحرية قلتلهم هاتوا اخواتي كانوا لسه ما اعلنوش وفاته جت هدى وجم كلهم وبس قالولنا انه اتوفى دخل خالد وطلع قال افهمي يامنى خلاص
محمود صلاح: اندفعت السيدة تحية عبد الناصر الى الغرفة ومسكت ايد الرئيس عبد الناصر تقبلها بالدموع واولاده هدى عبد الناصر ومنى وخالد وعبد الحكيم دخلوا في نفس اللحظات دي .
عمرو الليثي: اوصفي لي المشهد؟
هدى عبد الناصر: لا مش عايزة ..مؤلم ..بلاش.. يعني.. اعفيني.
منى عبد الناصر: هما قعدوا يشوفوا هيعملوا ايه معاه وفضلنا احنا قاعدين معاه وهما بقى تولوا شئون الدولة .
هدى عبد الناصر: انعقد اجتماع تحت عندنا في البيت وبعدين قالولنا بسرعة لازم ننقله قبل ما نعلن بيشوفوا ازاي هيعلنوا الخبر وكده فطبعا صحبنا جثمانه الى قصر القبة .
عمرو الليثي: في نفس الليلة ؟
هدى عبد الناصر: في ساعتها قبل الاعلان لانه كان متوقعين ان الشوارع هتتسد وكده فكان بسرعة قصرالقبة فيه مكان مجهز لهذه الحالات فصاحبناه ورحنا معاه بالعربية بتاعته ورحنا معاه لغاية القصر ودي كانت اخر مرة شفناه فيه حتى اخويا لما جه من اسكندرية مقدرش يشوفه .
منى عبد الناصر : زي كل الناس في النهاية تسوى ايه..هتقابل ربك وبعدين حطوه في العربية وراحوا بيه قصر القبة .
محمود صلاح: وجت السيدة تحية عبد الناصر وقالت انا بوصي دلوقت اني لما اتوفى لازم ادفن الى جواره الحقيقة الكلام اثر في كل اللي موجودين وكل الحاضرين انفجروا في البكاء في نفس اللحظات اللي دخل فيها البيت عربية اسعاف الخاصة بالرئيس عبد الناصر ودي كانت هيركبها لاول مرة واخر مرة لانه ركبها جثمان .
عمرو الليثي: الكاتب الكبير محمد حسنين هيكل ادلى ب4 شهادات مختلفة حول وفاة الرئيس عبد الناصر على فترات زمنية متباعدة في الاولى اكد ان الرئيس احس باعراض النوبة القلبية وهي الم في الصدر والتعرق بغزارة ودار حوار بين الرئيس جمال عبد الناصر والسيدة حرمه تحية والدكتور الصاوي حبيب حيث قال انه يشعر ان الامه بسبب نقص السكر وهنا عرضت السيدة تحية تقديم عصير واختار الدكتور الصاوي حبيب عصير البرتقال كما اغفل الاستاذ هيكل ذكر اسم الدكتور رفاعي كامل وهو الطبيب الوحيد الذي طعن في تشخيص حالة الازمة التي تعرض لها الرئيس عبد الناصر وقال ايضا ان حالة عبد الناصر كانت تتدهور باستمرار اثناء عودته من المطار وان الدكتور الصاوي حبيب كان يقوم بتدليك القلب ويضغط على الصدر عشرات المرات فهل هذا يعني ان قلب عبد الناصر توقف عن النبض في طريق عودته من المطار الى منزله ...... ما رأيك في رأي الاستاذ محمد حسنين هيكل الذي يقول فيه بالنص الرئيس "احس باعراض نوبة قلبية والم في الصدر".. وفيه رواية تانية قالها الاستاذ هيكل قال "ان الرئيس احس بالدقائق الاخيرة من وداعه لامير الكويت بانه متعب اكثر مما يحتمل وانه شعر بالدوار" ..تقييمك لهذا الراي وخصوصا ان الاستاذ هيكل اغفل في الرواية الثانية الدوار وهو معروف عنه الدقة الشديدة
مصطفى بكري: يعني هذا هو اعتقد ماحدث بشكل او باخر انه عبد الناصر تعب في مطار القاهرة وشعر بالفعل بحالة من الدوار قال هاتولي العربية فاقتربت سيارة منه بالكاد كل الشهود الذين حضروا قالوا انه بالكاد ركب السيارة وعندما وصل البيت كان يبدو الاعياء الشديد عليه كذلك النوبة القلبية حدثت بتقدير كل الاطباء وبالكشوفات التي جرت على عبد الناصر .
عمرو الليثي: ليس كل الاطباء؟
مصطفى بكري: يعني على الاقل الكونسلتو 4 ومعاهم الدكتور الصاوي حبيب اللي هما حضروا .
د/حمدي السيد- احد الاطباء المعالجين للرئيس عبد الناصر: الراجل كان طالع وطالع على رجليه وطلع على فوق ونزل من السرير وبدا ينام ويولع الراديو كل دا يدل ان انا انسان مش ميت ولا مصاب وبعدين جاءت النوبة توقف القلب وتمت في لحظات .
عمرو الليثي: تقديرك في كلام الاستاذ هيكل لان الاستاذ هيكل له اكثر من رواية عندما قال ان الرئيس شعر بالالم بسبب نقص السكر وان السيدة حرمه قدمت له العصير ثم اغفل الاستاذ هيكل هذه الشهادة بالكامل في حديثه مع الاستاذ صلاح منتصر .
مصطفى بكري: عبد الناصر كان عنده سكر ووارد ان تاتيه نوبة سكر وهو ماشي لكن انا بقول ان الدكتور منصور فايز نفى ان يكون عبد الناصر مات بغيبوبة سكر ومن ثم اذا كان نقص السكر ياتي لاي حد في أي وقت لكن حقيقة ما حدث هو ان عبد الناصر اصيب بازمة قلبية تانية .
د/ الصاوي حبيب: احنا طبعا لما كان يبقى ماشي او راكب او رايح مشوار او معاه اقراص الجلوكوز بياخدها عند اللزوم لما يبتدي يحس باعراض سكر.
ا/ضياء الدين داوود: اعتقد ان الرواية دي فيها تحريف لانه ازمة السكر ما تؤديش لالم تؤدي الى انه الواحد يدوخ او يجيله نوع من الغيبوبة اللي هي غيبوبة السكر والدوخان انما ما تجيش الم دا ما اعلمه يعني من سطحيات المعلومات الصحية ..اللي اعلمه بقى يقينا انه يوم ما مات ماحصلش الم كان مش حافظ التوازن لكثرة المجهود اللي اداه ودخل في دوامة ازمة قلبية فالأزمة القلبية خلفت عنده بعض الظواهر اللي لوحظت في ذلك الحين .
مصطفى عبد الغني- الكاتب الصحفي: الاعراض كلها واحدة اذا كانت دي او دي ففي النهاية بتؤدي الى المصير اللي انتهى اليه الزعيم وهنا لا تهمنا اذا الاستاذ قال بشكلين او بشكل واحد لان النهاية كانت واحدة .
عمرو الليثي: الاستاذ هيكل بيقول انه اثناء فترة عودة الرئيس عبد الناصر المطار كان الدكتور الصاوي حبيب كان يقوم بتدليك القلب ويضغط على الصدر عشرات المرات في حين ان هيكل في شهادته الثانية قال انه في حوالي الساعة الخامسة مساء بدا الامل يقوى والنبض ينتظم وضربات القلب تعود الى الطبيعي أي الروايتين صح...؟
هدى عبد الناصر: لا انا عايزة اقولك حاجة مش ممكن يكون الدكتور الصاوي حبيب دلك القلب وهو في المطار لان هو مشي عادي قدامنا ودخل وطلع فوق عادي فعملية تدليك القلب دى لما جت له النوبة القلبية الاخيرة وهو راقد في السرير دي اللي حاولوا يعملوه فيها ولم تفلح.
عمرو الليثي: يقول الاستاذ هيكل في روايته الثانية ان الدكتور صاوي حبيب كان يقوم بتدليك قلب عبد الناصر ويضغط على صدره عشرات المرات في حين قال الاستاذ هيكل ان الصاوي حبيب وبالنص يجهل ابجدية الطب واخطأ في التعامل مع حالة عبد الناصر .
مصطفى بكري: لكن الرواية التي يؤكد عليها كل الشهود كان يقوم بعملية تدليك قلب جمال عبد الناصر امام الجميع وامام الاخرين وحتى ان محمد فوزي كان في هذا الوقت يقف في قلق شديد جدا ويقولهم اعملوا حاجة اعملوا حاجة ويقوم الصاوي حبيب بتدليك قلب جمال عبد الناصر ولا اظن ان مسالة تدليك القلب تحتاج يعني الى تخصص معين او غيره مسالة متعارف عليها فكون الاستاذ هيكل صنف او وصف الدكتور صاوي حبيب بانه يجهل ابجديات الطب اعتقد هذه وجهة نظر الاستاذ هيكل وقد تكون لها مبرراتها لكن انا تصور ان شخصا يجهل ابجديات الطب كان يمكن ان يكون ملازما لجمال عبد الناصر .
عمرو الليثي: تعتقدي ان الدكتور صاوي حبيب اخطا في التعامل مع الحالة الطبية للرئيس عبد الناصر؟
هدى عبد الناصر: لا بالعكس .
عمرو الليثي: لان هناك راي يقول ان حالة عبد الناصر كانت غيبوبة سكر ولم تكن ازمة قلبية .
هدى عبد الناصر: لا لا لا ..لم يخطئ بالعكس هو اللي اكتشف الازمة القلبية الاولى كان الصاوي حبيب .
أ/مصطفى عبد الغني- الكاتب الصحفي: لا نستطيع ان نزعم انه كان فيه مؤامرة من بعض الاطباء لعبد الناصر احنا بنشوف ان عبد الناصر لعب دور شديد جدا وتعب قوي قوي قوي فلجا الى الطبيب في تخصصه وغير تخصصه في اللحظة الحاسمة لكن لا نستطيع ان نتهم احد يعني .
عمرو الليثي: بيقول هيكل ان الرئيس استدار وفتح الراديو الذي بجانب سريره في حين ان حالة المصاب بالجلطة القلبية تمنعه ولا تمكن المريض من اللف والدوران او الاستدارة او حتى الحركة
هدى عبد الناصر: لا اصل هقولك حاجة هو كان جهازالراديو جنبه كده يعني مش محتاج استدارة وكان حاطط ترابيزة وجهاز الراديو لانه كان على طول بيستخدمه ...
ا/ضياء الدين داوود: هو فعلا فتح الراديو لسبب مهم ويمكن كان معروف ايامها ولا زالت ذاكرتي تحتفظ بيها وهو انه الريس كان يتخوف وهذه كانت مشكلة من المشاكل ان يعتدي احد على الملك حسين في اثناء عودته او يغتاله لانه كان فيه حنق شديد جدا على الملك حسين في ذلك اليوم وفي الايام اللاحقة والسابقة وخاصة من الفلسطينيين
عمرو الليثي: هل مريض القلب يستطيع ان هو يستدير وان هو يفتح الراديو ويقعد علشان يسمع الراديو وبعدين يقفل الراديو ولا ما يقدرش؟
أ.د/احمد السعيد يونس- لواء طبيب بالقوات المسلحة سابقا: معتقدش انه يقدر خصوصا انه الازمة القلبية آلامها رهيبة بحيث ان كل تفكيره امتى هتفك ولو خد حقنة مورفين هيبقى مدروخ ونايم على روحه ولا عايز يسمع راديو ولا عايز يشوف حاجة كل امله في الله ان هو ينام
د/ الصاوي حبيب: 25 % من مرضى السكر الذين يصابون بجلطة في الشريان التاجي لا يشعرون باي الم.
عمرو الليثي: ليه يافندم؟
د/ الصاوي حبيب: لانه بيبقى عندهم تاثير السكر على الجهاز العصبي ثمة ان ربع المرضى السكر ما يحسوش بالالم دا مش بس ربع مرضى السكر كمان برضه كبار السن ما بيحسوش فممكن تجيله من غير الم.
عمرو الليثي: هل المصاب بازمة قلبية يمكنه ان يتحرك ويلف ؟
منى عبد الناصر : لا لا لا ما اتحركش دا هو راقد وتخش برضه البيت لما هيتعمل متحف الراديو لسه قاعد، اوضته هي اللي لسه قاعدة اوضة نومه والاقلام راصصها هو كان يرص الاقلام كده والراديو كده.
عمرو الليثي: ما اتحركش يعني ؟
منى عبد الناصر : لا لا لا .
عمرو الليثي: في روايته الرابعة قدم الاستاذ حسنين هيكل تفسيرا اكثر وضوحا من الروايات الاخرى كما جاء في سلسلة الحوارات التي اجراها معه الكاتب الصحفي الكبير صلاح منتصر رئيس تحرير مجلة اكتوبر المصرية على مدى 3 اعداد وصدر اخرها في 19 يونيو عام1988اسقط الاستاذ هيكل كل اسماء الاطباء الذين احاطوا بالرئيس جمال عبد الناصر في يوم وفاته ولم يستبق منهم الا واحدا هو الدكتور منصور فايز كما تحدث ولاول مرة عن الشكوك التي دارت حول علاج ووفاة الرئيس جمال عبد الناصر ؟
احمد حمروش- عضو في تنظيم الضباط الاحرار: الاطباء اللي كانوا موجودين كلهم كانوا حوالين جمال عبد الناصر كلهم كان هدفهم انقاذه من التعب اللي هو فيه لكن ارادة ربنا اكبر واقوى ودا قدر لا سبيل الى راده..
عمرو الليثي: ترتيب مجئ الاطباء الى البيت اوصفيه كده بالترتيب مين اللي جه الاول ثم التاني ثم التالت؟
منى عبد الناصر: الدكتور الصاوي وبعدين الدكتور منصور حسن وبعدين لما طلب الدكتور في اسكندرية بعت جوز بنته اللي هو الدكتور الرملي كل الدكاترة اللي تقريبا كانت بتعالجه جت .
مصطفى بكري: على كل الاحوال كل الروايات تقول ان من حضروا 4 وان مندوب في رياسة الجمهورية هو الذي اتصل بالاخرين وان اول الذين كانوا متواجدين وملازم لجمال عبد الناصر هو الصاوي حبيب وان الصاوي حبيب هو الذي اشار بضرورة حضور الاطباء الاربعة الاخرين .
د/حمدي السيد: وكان فيه طبيب احنا مدربينه كان اسمه دكتور طه عبد العزيز ومعاه جهاز بتاع صدمات كهربية كان مفروض ان هو وظيفته ان هو يتدخل لو القلب اتوقف او ارتعش او شئ من هذا القبيل ويوم ماحصل المشكلة او الحالة الاخيرة بتاعة الريس كان واقف على الباب برة واقف مع الجهاز منتظر ان حد يدعوه ويخش لو حصل مشكلة ..الاطباء اللي كانوا متواجدين مع الرئيس في هذا الوقت يعني من كتر اللخبطة اللي حصلت والتوتر اللي حصل والوفاة اللي حصلت بشكل مفاجئ نسيوا ان فيه واحد برة معاه جهاز ممكن لو القلب وقف في الدقائق الاولى صدمة الكهربا ممكن تعيد القلب الى مساره مرة اخرى ما افتكروش الا بعد ما فات تلت ساعة او نص ساعة ..دخل الطبيب بالجهاز بتاعه وادى صدمات للرئيس انما كان الوقت طبعا فات .
عمرو الليثي: طب تفتكر ليه الدكتور طه عبد العزيز رفض ان يوقع على التقرير الطبي لوفاة عبد الناصر ؟
مصطفى بكري: اما انه لم يكن حاضرا لان فيه تضارب حول رواية حضوره من عدمه واما انه لم يكن واثقا ولكن انا اعتقد ان غالبية من كانوا موجودين لا احد يشك فيهم كلهم لهم علاقة بجمال عبد الناصر ومتواجدين معه بشكل مستمر اكدوا مسالة الازمة القلبية .
ا/ضياء الدين داوود: لا استطيع ايضا ان استبعد انه حصل ارتباك لانه لما الريس يجيله ازمة قلبية ويشرف على الوفاة وكل المسؤولين موجودين من اطباء وغير اطباء بالقطع يحدث ارتباك شديد جدا يصعب التصرف السليم فيه في الوقت المناسب ويصعب ايضا انفراد بعض الافراد دون الاخرين بالموقف في هذا اليوم فهو حصل ارتباك يعني في البيت العادي لما يكون فيه مريض يجيله ازمة يجيله اغماء بيعمل ارتباك للبيت كله فهو حصل ارتباك فعلا .
مصطفى عبد الغني: ليست مصادفة ان يرحل عبد الناصر في سنة 70.. لا دا هو رحل رحيل يشبه القتل المتعمد اذا كان ذلك مقصودا من القوى الخارجية والقوات الرجعية كانت كتير قوي في العالم العربي او توتر غير مقصود داخليا من بعض الاطباء لكن عبد الناصر كان ضحية لوعيه الشديد في هذه الفترة لا يهمني اني اذكر فلان وفلان وفلان وفلان انما هي عبد الناصر في النهاية رحل ...
عمرو الليثي: بعد ان تم حقنه بالانسولين جلس الرئيس عبد الناصر في الصباح على المائدة وتناول نصف تفاحة طبقا لاقوال السيدة تحية حرم الرئيس والدكتور رفاعي كامل وطبقا لاقوال الاستاذ هيكل انه تناول تفاحة واحدة من صندوق تفاح جاء به الوفد اللبناني الى مؤتمر القاهرة بعد ساعتين أي في الساعة الحادية عشرة تقريبا بدات المتاعب تظهر على الرئيس عبد الناصر وكل الذين تحدثوا اليه تليفونيا او مواجهة وكل الذين شاهدوه شعروا بان الرئيس يعاني من متاعب حقيقية والرئيس نفسه لم يستطع ان يخفي تعبه من اين حصل مطبخ الرئيس عبد الناصر على هذه التفاحة ..؟
محمد امين- مساعد الشئون الادارية برئاسة الجمهورية سابقا: كنا ماشيين وراه في أي حتة في اكله في شربه ومعانا افراد الامن كنا بنحضر الحاجة كلها وناخدها ونطلع بيها من مشروبات او ماكولات او أي حاجة كان في اسكندرية في أي مؤتمر في أي حاجة .
ا/ضياء الدين داوود: اعرف ان كان فيه رقابة دقيقة جدا طبية وصحية ورقابة على المشاركين واللي بيخشوا البيت واللي بيشاركوا في اعداد الطعام وخلافه طبعا كمان فيه توجس من امكانية اعداء جمال عبد الناصر وخاصة في البلاد العربية انما دا ادعى انه يبقى فيه كثير من الحذر وكثير من الاحتياط وكثير من الملاحظة ومن المراقبة ومكانتش العملية سهلة بهذا الشكل يعني .
محمد امين: كنا بناكل من الاكل وهو بيتطبخ..الطباخ بياكل في الناحيتين الاتنين التذوق والامان وبعدين كنا أي رحلة بنطلع ..انا اخر رحلة طلعتها مع السودان كنا واخدين الاكل بتاعنا وشربنا من هنا لغاية هناك والطباخين وكله مفيش حاجة بتعدي .
د/ الصاوي حبيب: كانوا بيجيبوله الاكل منين..؟ بيجيبوه الاكل من السوق يعني ينزل الواحد يشتري له أي اكل من أي سوق، الدوا بتاعه بيجي منين..؟ من الاجزاخانة عادي ..غير كده وكده لما يبقى رايح احتفال بيقدموا لمون او عصير برتقان كان بيبقى السفرجي بتاعه معاه العصير ومعاه الحاجة بتاعته بيتقدم للكل بس اللي بيتقدم له هي بتاعته اللي معمولة في البيت .
محمد امين: كان المهندس الزراعي يجيبله الاكل وكله من برة مكانش حد يعرف ان الحاجات دي لسيادة الريس الله يرحمه .. الدكتور صلاح جبر اللي كان بيكشف عليها ..
احمد حمروش:كان مسئول عن طعامه طبعا الاسرة وكان بياكل بناء على تعليمات الاطباء وهو كان بيعمل تحليل تقريبا شبه يومي وامر طبيعي جدا ان عبد الناصر ليس من هواة الاكل يعني مفيش الشهية الدائمة اللي تخليه يخرج عن اوامر الاطباء كان بيستعين باوامر الاطباء وبينفذ اللي هما عايزينه.
عمرو الليثي: كيف كان ياكل الرئيس عبد الناصر وماذا كان ياكل؟
منى عبد الناصر : هو طبعا كان بياكل الاكل الطبيعي العادي ولما جاله السكر كان بياكل المسموح له .
عمرو الليثي: يعني كان حريص في اكله انه يتجنب الحاجات اللي ممكن ترفع السكر ؟
منى عبد الناصر : بالظبط وعنده قوة ارادة .
عمرو الليثي: من هو المنوط بشراء مستلزمات المنزل وكيف يتم شراءها؟
منى عبد الناصر : كان فيه ناس عسكريين اللي كانوا بيشتروا مستلزمات الاكمل بس احنا كنا بناكل ماهو الغدا دا كلنا كنا قاعدين .
عمروالليثي: طب هل كان فيه رقابة على المطبخ بتاع الرئيس يعني كان فيه رقابة من جهة ما بتراقب الاكل بيتم طهيه ازاي المكونات .. خاصة معروف ان الريس عبد الناصر كان مهدد بالاغتيال اكتر من مرة ؟
منى عبد الناصر : اه وكان فيه مؤامرات لوضع السم في الاكل ودا شيء طبيعي كل رؤساء الجمهورية بتتحطلهم سم.
عمرو الليثي: كام مرة حصل هذا الموضوع ؟
منى عبد الناصر : لا دي افتكر انها مرة .
عمرو الليثي: امتى؟
منى عبد الناصر : لا مفتكرشش تواريخ بس هو كان في خلال ال13 سنة في الاواخر .
عمرو الليثي: يعني كان فيه محاولة لدس السم في اكل الريس ؟
منى عبد الناصر : اه.
عمرو الليثي: في اكل في البيت ولا برة البيت ؟
منى عبد الناصر : في اكل في البيت هو عمره ما كل برة البيت ولكن مكانش فيه وجبة مكلناش فيها سوا يعني الوجبة بيبقى احنا قاعدين كلنا محدش عيي.
عمرو الليثي: السيد محمد احمد سكرتير عبد الناصر والذي كان مرافقا له طوال مدة عقد مؤتمر القمة بفندق الهيلتون اكد ان الوفد اللبناني لم يحمل معه للرئيس صندوق تفاح بل لم يحمل له اي هدية على الاطلاق وفي الواقع فان نفي السيد محمد احمد يمكن ان يكون نفيا منطقيا فكيف يحضر الوفد اللبناني على عجل لمؤتمر يناقش مذبحة الفلسطينيين في الاردن ويحمل معه صندوقا مليئا بالتفاح ويقول محمد احمد ايضا انه كانت لديه تعليمات واضحة وصريحة من الرئيس عبد الناصر بعدم قبول أي هدايا من أي وفد وخاصة الهدايا اللبنانية وبالتالي فلا يمكن ان تكون هذه التفاحة التي تناولها الرئيس مصدرها الوفد اللبناني .
ا/ضياء الدين داوود: استبعد هذا تماما اولا لم يكن للرئيس جمال عبد الناصر اعداء في الامة العربية اطلاقا خالص حتى اعداؤه اللي كانوا شخصيين زي بعض الرؤساء المعاصرين كانوا يقدروه ويحترموه ويحافظوا على حياته جدا وانا حضرت احاديث لكثيرين منهم من مختلف الدول العربية وكانوا بيقدروا الرئيس ويحرصوا عليه غاية الحرص ..مختلفين معاه في قضايا كثيرة زي القضايا اللي كان بيتفرد بيها جمال عبد الناصر واللي بيواجه بيها العالم لكن في نفس الوقت كانوا محترمين جمال عبد الناصر حريصين عليه جدا بيقدروا كلامه ما يعارضوش في حاجة الا قليل
احمد حمروش: انا رايي ان هذه اشاعات خبيثة وان احضار سبت فواكه امر طبيعي جدا وعلينا ان نتوقف عن محاولة اثارة الفرقة بين العرب بمثل هذه الاشاعات .
عمرو الليثي: ما مدى صحة ان الرئيس جمال عبد الناصر تناول يوم وفاته تفاحة ارسلها له الوفد اللبناني وان هذه التفاحة كانت مسمومة ؟
مصطفى بكري: دي رواية قيلت ولكن يعني لا اظن ان التفاح الذي كان مقدما في هذا الوقت ونحن فى مؤتمر.
عمرو الليثي: لا هو المنطقي الوفد اللبناني هيجي معاه تفاح.
مصطفى بكري: اه ويدخل ويقول للريس خد التفاح دا يعني شيء غير منطقي علينا ان نحترم عقول الناس لانه ليس هكذا يجري اغتيال قيادات بوزن جمال عبد الناصر ليس بهذه السذاجة مش قدام الناس خد تفاحة يا ريس فياكلها فيحدث له السم لو كان حدث كان مات عبد الناصر في وقتها بشكل او بآخر
مصطفى عبد الغني: نحن نعلم انه في نهاية حياته كان بيهتم جدا بأكل معين نوع من الجبنة والخبز لانه كان بيعاني من مرض السكر فكان امامه اشياء كثيرة جدا من الأكلات الفخمة جدا وحتى هيكل
يمكن من الاشياء اللي قالها في الفترة الاخيرة خالصقبل رحيل جمال عبد الناصر انه كان نازل معاه في فندق ضخم جدا اللي كان فيه اللقاء بين الزعماء العرب الملك حسين وامير الكويت وما إلى ذلك وقال للرئيس جمال عبد الناصر ياريس انت بتاكل ايه قاله لا انا باكل عيش وجبنة بس قاله طيب ماتاكل...قاله لا مقدرش اكل الحاجات دي ثم اني دي اشياء لا تنتمي للطبقة بتاعتي فقاله مهم قوي يبقى فيه شئ من التغيير لكن جمال عبد الناصر كان واعي جدا فكريا للرسالة بتاعته وفي نفس الوقت كان واعي جدا للحياة اللي بيعيشها و نستطيع ان نقول ان حياته في الفترات الاخيرة كانت حياة بسيطة جدا جدا جدا طبعا بتعود لمرضه لكن ايضا بتعود لشخصيته عبد الناصر كان شخصية بسيطة جدا وكان ينتمي للجماهير اكتر ...
عمرو الليثي: التفاحة اللي كلها الرئيس جمال عبد الناصر هل تعتقدي انه تم دس السم في تلك التفاحة ؟
هدى عبد الناصر: اولا انا والدي مكانش بياكل تفاح ومكناش بنشتري تفاح فانا بعتقد ان الكلام دا كان غير تقليدي .
عمرو الليثي: بيقال ان الريس عبد الناصر تناول نص تفاحة طبقا لاقوال الهانم السيدة تحية للدكتور رفاعي كامل هذه التفاحة من صندوق تفاح احضره الوفد اللبناني وذلك طبقا لاقوال السيد حسنين هيكل وبعد ساعتين من اكل التفاحة بدا التعب يظهر على الرئيس وقيل ان هذه التفاحة ربما تكون مسمومة هل لك تعقيب؟
منى عبد الناصر: واذا كانت لو كان فيه صندوق جاي من لبنان فكلنا كلنا منه وبعدين انت هتاكل تفاحة وبنتك لا...
عمرو الليثي: يقول المهندس جمال الحسيني والذي كان مشرفا على عملية شراء الخضروات والفواكه وتخزينها في بيت الرئيس جمال عبد الناصر انه لم يتلق صندوقا من التفاح اللبناني خلال فترة عقد المؤتمر أي في الفترة من 23 سبتمبر حتى 27 سبتمبر سنة 1970 كما اكد انه لم يذهب مع الرئيس جمال عبد الناصر أي طبيب في سيارته اثناء عودته والسؤال لماذا لم يذهب أي طبيب مع الرئيس جمال عبد الناصر والسؤال لماذا لم يذهب أي طبيب مع الرئيس جمال عبد الناصر اثناء توديعه الملوك والرؤساء العرب على الرغم من معرفتهم بانه قد يتعرض للتعب الشديد في أي لحظة ولماذا لم يتم نقل الرئيس للمستشفى حيث تكون رعايته متاحة بشكل افضل بدلا من الذهاب الى المنزل ؟
احمد حمروش:لانه تصور انها نوبة تعب وانها ستزول لما يروح البيت يعني مكانش حد متصور اطلاقا انه هتنتهي الحياة عند هذا الموقف يعني .
ا/ضياء الدين داوود: بالنسبة للمستشفى هواليت كان مجهز تجهيز طبي كويس جدا بالنسبة له يعني كل الاسعافات الاولية متوفرة في البيت بسهولة والدكاترة كانواى موجودين وطبيب خاص وخلافه ولذلك مكانش فيه ، خطورة الحاجة التانية ان الحالة دي جت في ثواني يعني ما يلحقش حتى حد يطلع وحد ينزل لدرجة انه كان فيخه جزء من اللي كانوا موجودين في الدور الارضي ما لحقوش يطلعوا فوق في الدور التاني اللي كان فيه الرئيس فالظروف المضطربة دي والتصرفات اللي بتتم كرد فعل لهذه الظروف المضطربة لا يحكمها شئ واحد يحكمها عواطف ويحكمها انسانيات ويحكمها اضطراقب نفسي انزعاج حاجات كتير .
عمرو الليثي: محدش فكرانه هو ينقله المستشفى ؟
منى عبد الناصر : دا اللي حصل انا شخصيا مفكرتش ولا حاجة لان الموضوع كان سريع سريع والموضوع كله كان خمسة وخمسة كان خلص كان اتوفى ..لا محدش قال مستشفى ولا حتى ما شفتش دخلت عربية الاسعاف ولا حاجة
أ.د/احمد السعيد يونس : لو كان وصل الى مستشفى وخد العلاج بتاعه اولا كان التشخيص هيتم لانه فور دخوله العناية المركزة كان هيتركب المحاليل وبعدين جهاز رسم القلب بيبين في ساعتها على المونيتور الازمة القلبية اه ولاّ لا وكان هيبقى فيه علاج انما محصلش.
عمرو الليثي: لماذا لم تقم سيادتك بنقل الرئيس جمال عبد الناصر فورا الى غرفة العنايىة المركزة وهل نقله الى العناية المركزة كان سوف يساهم في علاجه او محاولة انقاذه ؟
د/ الصاوي حبيب: انا عايز اقول انه مكانش فيه عنايات مركزة نمرة اتنين 50% من اللي بيموت من الشريان التاجي بيموت قبل ما يخش المستشفى كمان الوفاة من جلطة الشريان التاجي ومريض السكر تصل الى 4 اضعاف النسبة في المرضى الذي لا يعانون من السكر والعناية المركزة كانت لاتجدي في الازمة القلبية لانها بتبقى عضلة القلب مش قادرة على اداء عملها .
مصطفى بكري: اعتقد انه الارتباك الشديد الذي حدث وحالة التعب الشديدة التي فاجات الجميع والوقت الزمني القصير ما بين شعور عبد الناصر بالالم وما بين وفاته فجاة اعتقد ذلك اربك الجميع وجعلهم بسرعة البرق يقولون سنتحرك من الداخل الغرفة التي ينام فيها عبد الناصر وليس هناك داعي لنقله خوفا على حياته ولذلك جيئ بالكونسلتو حتى يستطيع بالفعل ان يجد العلاج المناسب وكان ممكن نقله لو استمر جمال عبد الناصر بنفس الحالة ولكن جمال عبد الناصر فاجئ الجميع ومات باسرع مما توقع الجميع ...نواصل الجزء الثاني في الحلقة القادمة