اتجاهات

السبت *7/4/2012
حنان منصور : سيداتى وسادتى السلام عليكم ورحمة الله دى حلقة جديدة من برنامج اتجاهات احنا النهارده هنتكلم عن اللى اتكلمنا عليه فى حلقة الاثنين الماضى ، إيه الموضوع اللى هنتكلم فيه هو موضوع تناولته إحدى القنوات الخاصة حول مزاعم بالفساد فى الجمارك هذا الأمردفع نقابة العاملين بالجمارك إن هم يتقدموا ببلاغ للنائب العام طبعا انطلاقا من تليفزيون الشعب بقواعد المهنية والموضوعية احنا استضفنا فى الحلقة السابقة حلقة يوم الاثنين عدد من مقدمى البلاغ وسعينا ايضا لاستضافة من تحدثوا عن تلك الاتهامات وكانوا معنا على طول الهاتف سؤالا بسؤال فى نهاية حلقة الاثنين الماضى نوهنا عن استكمال الحلقة اليوم الأربعاء ووعدنا مسئولى النقابة المستقلة اللى تحدثوا معنا فى الهاتف الاثنين الماضى وعدونا بالحضور غير إننا فوجئنا باتصال هاتفى آخر منهم بيعتذروا فيه عن الحضور وبيطلبوا مننا إن يكون التواصل أيضا من خلال الهاتف ونحن فى انتظار مداخلاتهم عن قضية الفساد فى الجمارك وهى الحلقة الثانية بنستكملها النهارده معنا فى حلقة الليلة الأستاذ حسنين شبانة رئيس الإدارة المركزية لمكافحة التهرب الجمركى ، والأستاذ محمد على سيد أحمد مدير عام الشئون القانونية بمصلحة الجمارك أهلا وسهلا أستاذ حسنين وأستاذ محمد نستكمل حلقة الاثنين اللى فات أستاذ حسنين تابعها إيه تعليقك عليها ؟
أ/ حسنين شبانة: والله الحلقة كانت كويسة بتكشف الحقائق اللى موجودة فى الرد على الاتهامات اللى كانت موجودة وقالها الزملاء أو بعض الزملاء اللى كانوا موجودين مع الأخ وائل الإبراشى وأنا فعلا اتصلت به وقلت له الكلام ده غير حقيقى وغير منطقى والبرنامج بتاعك مش مفتوح عشان يوجه اتهامات اللى عنده اتهام يتفضل مشكورا بالمستندات إلى السيد النائب العام وتبدأ إجراءات فيها التحقيق لا نقعد نشهر بالناس ونقعد نعمل عملية تشهير ده أمر غير مطلوب لأن دى مصلحة سيادية وبتتبع وزارة سيادية ولها قياداتها ولها أساسياتها ولها مبادئها ولها قوانينها وما احناش عايزين زعزعة فى هذا الأمر إطلاقا يعنى لإن الفترة دى مطلوب فيها الاستقرار مش مطلوب زعزعة ونقعد نشارك فى بعض الطرق
حنان منصور : أو يعنى هو مطلوب كمان إظهار الحقائق
أ/حسنين شبانة: الحقيقة سعادتك موجودة كاملة من الألف إلى الياء ولا تستر على فساد لا تستر على فساد وحطى كلمة لا تستر على فساد تحتها 100 خط واحنا مازلنا مصرين اللى عنده مستند ضد أى مسئول يتفضل به مباشرة وده الكلام اللى قاله السيد رئيس المصلحة والسيد الوزير مباشرة على السيد النائب العام احنا مش هنخاف من أى تهديد لإن الحقائق ظاهرة وواضحة 24 قيراط
حنان منصور: أستاذ محمد يعنى التقدم بهذا البلاغ إلى النائب العام يعنى ماذا يعنى أو ماذا تم التوصل إليه هذا البلاغ ؟
أ/حسنين شبانة: أنا هقول لحضرتك احنا ليه اتقدمنا بالبلاغ أصلا لما فوجئنا بالحلقة بتاعت يوم 12 ، 12-3 إن بعض الزملاء وهم زملاء أعزاء يعنى راحوا طبعا للأستاذ وائل الإبراشى فى برنامج الحقيقة احنا نتقبل أى نقد ونتقبل أى حاجة ممكن نرد عليها لكن يوصل الأمر إلى إننا نتهم مصلحة الفساد ومساعدة المهربين أظن صعب جدا علينا فى وسط المجتمع فى وسط اقاربنا وأهلينا لدرجة إن تليفونات كثيرة جدا جاءت لنا فقدوا الثقة فينا احنا عندنا متعاملين مع الجمارك عدد كيبر جدا لما يفاجأ على الهواء إن كل العاملين فى مصلحة الجمارك فاسدين ومهربين
حنان منصور: ما الذى أوصل هذا الموضوع إلى هذا ؟
أ/ حسنين شبانة: هقول لحضرتك هو فيه حالات قليلة اللى أثاروها 10 ، 15 ، 17 احنا 14500 موظف هل 14 لو هنفترض صحتهم 14500 موظف يتهموا بالفساد عشان 14
حنان منصور: التعميم لا يصح
أ/ حسنين شبانة: لا يصح
حنان منصور: طب أنا عندى سؤال ؟
أ/ محمد على: أنا هستأذن سعادتك فى جزئية برضه المسألة من مسألة 14 ألف حجم العمل فى مصلحة الجمارك كام هنتعامل مثلا ممكن أكثر من 10 مليون راكب فى السنة ما بين سفر ووصول حركة المطارات بتسأل عن الجمارك طب إذا كان 10 مليون راكب معاهم كام مشكلة على مدار السنة ده راكب بس طيب لو اتعاملنا على الحاويات وحالة الصادر والوارد عندنا كام 100 ألف بيان جمركى على مدار السنة
حنان منصور: يعنى مثلا يا أستاذ حسنين حسب الكلام اللى بنسمعه عن إن مثلا فيه تسرب إشعاعى فى أجهزة الفحص اللى بدأ استخدامها فى المنافذ الجمركية سنة 1998
أ/ محمد على: أنا هرد على السؤال
حنان منصور: اتفضل
أ/ محمد على: أولا احنا لما المصلحة بدأت نظام الكشف بالأشعة طلبت متخصصين من أساتذة المتخصصين فى الأشعة واتعاقدت مع أستاذ متخصص خبير متخصص من جامعة الأزهر فى هذا الأمر ده أولا ، ثانيا اتعمل ضوابط للأخ الزميل اللى هيقعد على جهاز الأشعة من حيث المؤهل ومن حيث المدة الزمنية هيقعد أد إيه والاستخدام أدام الجهاز هيبقى استخداماته ازاى ، المؤهل عالى اشترط إنه يكون حاصل على بكالوريوس علوم قسم كيمياء أو فيزياء أو
حنان منصور: من الذى وضع هذه الضوابط ؟
أ/ محمد على: المصلحة بالتنسيق مع الدولة يعنى اللى هيتعين فى قسم الأشعة يكون مؤهل عالى بكالوريوس علوم كيمياء أو فيزياء إذن ده قدم مستنداته أو ورقه عشان يتعين على هذه الوظيفة على إنه يشتغل إخصائى فى قسم الأشعة المصلحة عملت معاه إيه نمرة 1 هو بيقعد لمدة ساعة على جهاز صغيرة ، نمرة 2 بيتحط قلم بيتحط عنده هنا عشان يضبط الإشعاع لازم يركبوا القلم ده ، نمرة 3 فيه بدلة واقية لهم ، نمرة 4 بتدى له حافز إضافى عن المرتب اللى بياخده ، نمرة 5 فيه كشف دورى كل 6 شهور فإذن النهارده مصلحة الجمارك وضعت هذه الضوابط أى خلل هيحصل منين
حنان منصور: احنا معانا مداخلة تليفونية الأستاذ محمد فتحى أهلا وسهلا
أ / محمد فتحى: مساء الخير يا فندم
حنان منصور: أهلا وسهلا تعرفنا بنفسك
أ/ محمد فتحى: محمد فتحى مساء الخير يا فندم أهلا بحضرتك يا أستاذة حنان بحب أرحب بأستاذ محمد على وأستاذ حسنين شبانة ، أنا أحب بس أوضح حاجة صغيرة بس للسادة الأفاضل أولا أحب بس أسأل أستاذ محمد على وأستاذ حسنين شبانة سؤالين بس قبل ما أعلق على الموضوع الفنى أول حاجة الأستاذ محمد على والأستاذ حسنين شبانة مع احترامى الكامل لهم أستاذ محمد على حضرتك متخصص فى علم الفيزياء ، متخصص فى حاجة اسمها أجهزة أشعة وأستاذ حسنين شبانة أستاذ محمد على رجل قانون محترم جدا وأنا أعرفه شخصيا لكن هو غير متخصص فى أجهزة الأشعة دى حاجة ، ولا له علاقة بالفيزياء ولا له علاقة باستلام الأجهزة من أمريكا الكلام اللى قاله أستاذ حسنين شبانة دلوقتى إن احنا مستلمين أقلمة قياس الكلام ده مش مضبوط يا أستاذ احنا عندنا نص أجهزة القياس مش شغال والنص الثانى ما معهمش وده كله موجود بالمستندات يا أستاذ أنا معايا مستندات ومعايا كل حاجة بتؤكد هذا الكلام لما جاء لى الأستاذ وائل الإبراشى وكلمنى عشان أنا اتهمت المرة اللى فاتت
حنان منصور: يعنى تتفضل بالسؤال يا أستاذ فتحى يعنى أنا اتكلمت فى بداية الحلقة وقلت إن احنا محتاجين طلبنا فعلا فى البرنامج إن حد منكم ييجى ما جيتش اعتذرت ليه
أ/ محمد فتحى: ما فيش حد دعانى يا أستاذة أنا بثبت حاجة على الهواء ما حدش جاءنى فى البرنامج ولا من قيادة مصلحة الجمارك ووجه لى الدعوة للحضور لسيادتك وأنا بقول لحضرتك إنى أنا مستعد آجى أدام الأستاذ محمد على والأستاذ حسنين شبانة
حنان منصور: الأستاذ علاء مسعد المنسق العام هو الذى تقدم بالاعتذار نيابة عنكم
أ/ محمد فتحى: ما حدش قال لى أنا فى اسكندرية يا أستاذة حنان ماحدش قال لى أنا مش بتكلم فى موضوع النقابة يا أستاذة حنان أنا بتكلم على الصلاحية فى جهاز الأشعة بعيدا عن النقابة أنا مش بتكلم فى النقابة دلوقتى الكلام بتاع الأستاذ حسنين شبانة غير صحيح تماما احنا ما عندناش مرايل المرايل دى واخدينها بعد حادث تسرب إشعاعى فى ميناءشرق التفريعة بورسعيد وأنا شاهد عيان عليها وحاضر الواقعة من أولها لآخرها ما عندناش رصاص أول رصاص اتعمل عندنا كان عام 2008 ، ما عندناش ظاهرة موظف مخروم مش صحيح فيه ناس تعرضت لقيمة عالمية ضعف 50 قيمة عالمية 50 ميكروسيفر أجهزة إشعاعية كفيلة إن هى تموت مش إنسان تموت فيل كل ده حاصل عندنا فى المصلحة معايا جميع المستندات وهم فعلا الأساتذة مع احترامى الكامل عارفين تماما ومقتنعين تماما إن فيه فساد فى مصلحة الجمارك يواجهونى ويحولونى للنائب العام بمستنداتى بأوراقى وأنا مستعد للشهادة أدام النائب العام لكن المشكلة فيه تأثير غير عادى من قيادات المصلحة على التكتم على الملفات اللى معايا وعلى المستندات اللى معايا والنيابة ووقف الدنيا أنا مش عارف لصالح مين أنا معايا مستندات قوية جدا يا أستاذة حنان تدين جميع اللى موجودين فى الملف ده أدام الأستاذ محمد على وأدام الأستاذ حسنين شبانة وأنا مستعد للشهادة النائب العام يتقدم شخصيا وأنا مستعد للشهادة
حنان منصور: شكرا يا أستاذ فتحى وصلت رسالتك شكرا جزيلا
أ/ محمد على: أنا هعلق بس حاجة صغيرة
حنان منصور: اتفضل
أ/حسنين شبانة: هعلق على الأستاذ محمد فتحى هو زميل وابن زميل عزيز قوى الكلام اللى بيقوله ممكن يبقى صح بس احنا عاوزين نقول حاجة الأجهزة من 98 ، 99 ما ظهرش الإشعاع إلا النهارده بعد كام سنة 14 سنة اشمعنى النهارده هو كان مكلف كان هيطلع ضمن مجموعة طالعة الصين دورة تدريبية واستبعد فى آخر لحظة من بعد ما استبعد اللى حصل بقى بدأ الهجوم طب كان فين الفترة دى كلها هو ماشى متعين فى سنة 2007 أو 2006 ما ظهرش البلاوى بتاعت الأجهزة إلا الشهر ده أو الشهرين دول
حنان منصور: يعنى إذن أنت ترجعها إلى أسباب شخصية
أ/ حسنين شبانة: إلى أسباب شخصية ، ثانى حاجة هو الأستاذ محمد فتحى نفسه فى شهر 12 تقريبا راح عمل بلاغ فى نيابة سيدى جابر فى النيابة العامة وواخد10970 / 2011 والنيابة العامة صدر قرارها بالحفظ فى 4-1-2012 لو كان الكلام يبقى أنا بشكك فى النيابة العامة إذا كان النيابة العامة حفظته بدون أساس يبقى منه للنيابة العامة دى نمرة واحد ، نمرة اثنين اللى أنا بقصده راح الأمن القومى ، راح الرقابة الإدارية ، راح لمباحث أمن الدولة راح لكل الجهات اللى فى الدنيا طب الجهات دى كلها بنشكك فى إنها متسترة على المخالفة
حنان منصور: طب هنسمع مداخلة تليفونية وتعليق آخر من الأستاذ أحمد جمال إبراهيم مصلحة جمارك القاهرة حدث عطل نستكمل الحديث
أ/محمد على: أنا برد على الأخ لإن اللى أنا اتكلمت عنه
حنان منصور: هو معاه مستندات وبيقول إنه هيتقدم
أ/محمد على: ما يتقدم حد هيمنعه إنه يتقدم مين اللى هيمنعه ما يتقدم دى أولا ، ثانيا الكلام اللى أنا قلته مطار القاهرة وموجودين فى مطار القاهرة بالتحديد كمان على الأكثر عندهم القلم أيوة عندهم القلم فعلا يتحط القلم على هنا فعلا ، فيه كشف دورى ؟ فيه كشف دورى فيه ميزة مادية لهم للكل لكل من يعمل بأجهزة الكشف بالأشعة بياخد مرتب شهر أوفر غير زمايله
حنان منصور: يعنى يا أستاذ حسنين معنى ده إن ما أثير حول قضية الفحص الإشعاعى لأسباب شخصية ولا علاقة لها بالحقيقة الموضوعية اللى بنبحث عنها ؟
أ/ حسنين شبانة: لو كان فيه حقيقة ما كانش فيه حد سكت عنها إطلاقا
حنان منصور: طب نتحول لسؤال آخر برضه بيتوارد وبنسمعه عن موضوع كشوف البركة زى كشوف زمان وإنها لأسماء معينة ولا تتغير منذ عشرات السنين ؟
أ/ محمد على: أنا عايز أرد على هذا السؤال
حنان منصور: اتفضل
أ/ محمد على: يعنى النهارده احنا ازاى هنساوى الموظف اللى بيشتغل والموظف اللى بيؤدى العمل الطبيعى والموظف اللى بيدى عمل متميز والموظف اللى بيقدر يتواجد فى العمل أد وقت العمل مرتين ثلاثة وأنا أمام سعادتك أنا سايب زملاء فى مصلحة الجمارك النهارده بقى لهم 3 أيام متواصلين يكادوا يكونوا بيقعدوا لغاية الساعة 12 بالليل من الزملاء من مصلحة الجمارك غير الضبط موجودين هل النهارده لو حصل إن السيد رئيس المصلحة إدى الناس دى مكافأة رمزية هل هذه المكافأة الرمزية
حنان منصور: هل هى مكافأة رمزية فعلا ؟
أ/ محمد على: يعنى ازاى
حنان منصور: فيه مداخلة هاتفية من الأستاذ أهلا وسهلا أستاذ علاء مسعد عضو النقابة المستقلة فى مصلحة الجمارك
أ/ علاء مسعد: آلو سلام عليكم
حنان منصور: أستاذ علاء مسعد معانا
أ/علاء مسعد: سلام عليكم
حنان منصور: وعليكم السلام ورحمة الله وبركاته
أ/علاء مسعد: ازيك يا أستاذة
حنان منصور: أهلا وسهلا اتفضل
أ/علاء مسعد: ازيك يا أستاذ محمد وازيك يا أستاذ حسنين
أ/ محمد على: أهلا ازيك
أ/علاء مسعد: حضرتك يا فندم احنا عايزين نوضح بس حاجة واحدة وأنا إجابتى هتكون واضحة وصريحة ومختصرة أولا مصلحة الجمارك زيها زى أى مصلحة حكومية فى الدولة قد يشوبها بعض القلة المنحرفة طبعا العديد من الموضوعات التى أثيرت فى الحقيقة من ملفات الفساد سببها الكثير من المحسوبية والفساد الإدارى والمصالح الشخصية من أى تسهيل يقام به أى مقام شخصية
أ/ محمد على: مش سامعين صوتك
حنان منصور: ممكن توطى التليفزيون شوية لإن الصوت مش واضح
أ/ محمد على: هو بيقول إيه
حنان منصور: وطى التليفزيون شوية إذا سمحت
أ/علاء مسعد: الصوت واضح كده يا فندم
حنان منصور: أيوة يا فندم
أ/ علاء مسعد: حضرتك أنا بقول إن مصلحة الجمارك زيها زى أى مصلحة أو قطاع من قطاعات الدولة يشوبها بعض القلة المنحرفة على الفساد وطبعا العديد من الموضوعات التى أثيرت القضايا للفساد تدل على وجود الكثير من المحسوبية والفساد الإدارى والمصالح الشخصية لإن أى تسهيل يقام به يقام به لمصالح ومنافع شخصية ويساعد على إهدار المال العام وهذا يوحى بعدم النية للإصلاح ولكن الجميع يرفض التشهير أو الإساءة إلى المصلحة أو العاملين بها لإنهم أشخاص شرفاء ومحترمين ولكن يوجد بعض القلة الفاسدة فهذا يفهم منه الإساءة للجميع ويا فندم احنا كنقابة مستقلة هدفنا واضح ومحدد وهو إصلاح ما تم إفساده مفسدين ورد الحقوق لأصحابها ومحاسبة المخطئين لإن ده بيسبب شعور للزملاء والعاملين بالظلم الواقع عليهم
حنان منصور: بالتأكيد شكرا أستاذ علاء
أ/ حسنين شبانة: هو الكلام ده كلام عادى هو سامعنى يا علاء الكلام ده كلام عام وممكن يكون مكتوب كلام مرسل انت تقول لى الفساد فى المكان الفلانى وتقول لى ميزة فى المكان الفلانى وتقول لى فلان بيقبض كذا وفلا بياخد كذا أنا أرد عليك لكن عدم التعبير لإنه كلام الناس لما تسمعه ممكن تشكك فى نزاهة مصلحة الجمارك مصلحة الجمارك مش كده اللى عايز تذكره يا علاء أذكره محدد عشان نقدر نرد عليك
أ/ علاء مسعد: طلبنا أكثر من مرة التحاورمع القيادات لتوصيل وجهة نظرنا وآراءنا وأفكارنا وفى الآخر بعد ما تقدمنا للإعلام بملفات الفساد سيادة رئيس المصلحة بتعليمات من وزير المالية لإحالة جميع ملفات الفساد إلى النائب العام فبالتالى يا فندم خلى الورق ياخد مجراه والنائب العام هو اللى يقول هو
أ/ محمد على: يبقى انت يا علاء ما تتكلمش طالما أحيلت للنائب العام عشان ما حصلش تشهير بحد دى حاجة ، الحاجة الثانية وانتوا موجودين أنا نزلت عشان أتكلم معاكم بناءً على توجيهات من السيد رئيس المصلحة وانتوا رافضين تقعدوا معانا ما هو متاح من قرارات هيصدرها على الفور وما هو غير متاح هيعرضها على الفور على السيد الوزير انتوا رفضتوا تقعدوا معانا وواجهتونا بحاجات لم نكن نتوقعها على الإطلاق انت كنت موجود يا علاء
أ/ علاء مسعد: يا فندم احنا رفضنا مقابلة الوزير لوقائع للعاملين وزير المالية وعدنا إن خلال يوم أو يومين هتكون طلباتنا مجابة وأنا فى انتظار وعد السيد الوزير لنا
أ/ محمد على: احنا مش بننفذ طلباتكم احنا بنرد على أى اتهامات
أ/ علاء مسعد: يا فندم من ضمن الطلبات اللى كانت مطروحة أدام سيادة الوزير كانت ملفات الفساد حتى مندوب من المجلس العسكرى كان قاعد ولم ملفات الفساد كلها يا فندم
أ/ محمد على: يا أستاذ علاء احنا هنريح دماغنا خالص من القصة دى كل الكلام اللى بيقوله الأستاذ علاء مقيد بقضية 319 لسنة 2011 حصر أموال عامة عليا ومقيدة برقم128 لسنة 2011 حصر تحقيق أموال عامة عليا اللى هى كشوف البركة ، الفلوس اللى بتتصرف مش عارف لإيه كل اللى هو موجودة فين يعنى كل اللى هو مهمل موجودة
حنان منصور: أنا عايزة أسألك بمااننا عايزين نتكلم كلام محدد برضه موضوع قضية مستلزمات طب الأسنان ؟
أ/ حسنين شبانة: أنا عايز قبل ما ننتقل لعملية طب الأسنان النهارده جميع الأجهزة الرقابية وعلى رأسها الرقابة الإدارية والكل سامعنى دلوقتى حققت وكتبت فى هذه الأمور يبقى إذا كان هذا الأمر والأمر النهارده مرفوع شعاره من قبل كده مش من النهارده ولا قبل النقابة المستقلة ولا قبل جميع النقابات لا تستر على فساد فى مصلحة الجمارك أى واحد أخطأ بيتحاسب أى مخطئ يتحاسب يعنى لمصلحة مين لمصلحة مين إننا نتستر على فساد يستحيل التستر على فساد وبعدين أنا لما أتستر على فساد طب ما هو هيتم الإبلاغ بها رقابيا طب رقابيا ما هى هتيجى تحقق معايا طب وليه أنا من الأول قلت وقلنا وكلنا قلنا وجميع القيادات قالت اللى عنده مستندات أوحاجة يتفضل للتحقيقات
حنان منصور: ما ردتش على يا أستاذ حسنين
أ/ حسنين شبانة: مستلزمات طب الأسنان على سبيل المثال الموضوع ده كان شهادة 1920 فى 15-3-2008 مش النهارده ولا الشهر ده القصة إن جاءت مستلزمات طب أسنان فى قرية البضائع اللى بيكشفهم شك فى 17 طرد إن هم شبه مستعملين وبالتالى ما ينفعش إن احنا نفرج عن حاجة مستعملة فراح عامل شهادة جزئية للباقى السليم أفرج عنه هم بيقولوا إيه فيه لم تعرض على الجهات الرقابية
حنان منصور: والحقيقة أنها عرضت
أ/ محمد على: لو فيه كاميرا على الجهات الرقابية قالت لا مانع من استخراج السياسات وآدى لجنة السياسات قالت أوافق على الإفراج فى تاريخ 12-3-2008 فمعرش هل دى التأشيرة والختم بتاع السياسات الدوائية مزورة وبالتالى طلع عليها إذن الإفراج يعنى السياسات الدوائية هى اللى تملك أن تفرج أو تمنع الإفراج مش احنا إلا إذا كنا احنا بقى اللى سربناها لمصلحة الراجل أى سلعة لها شروط فحص هى اللى منوط بها الإفراج من عدمه إفراج يا جمارك نفرج بنفرج ما تفرجش يا جمارك ما نفرجش
حنان منصور: طيب أستاذ حسنين مكافأة المزادات برضه على سبيل المثال بتطلع مليون أو نص مليون ؟
أ/ حسنين شبانة: فيلم مكافأة المزادات ده كان فى فترة سابقة من 3 أو 4 سنين أولا مصلحة الجمارك بتعمل مزاد على المستوى ككل بيشتغل فى التصنيف والتلطيط والتثمين والحصرعدد كبير جدا من العاملين فى مصلحة الجمارك وبعد كده بينتقل عملية المزادات إلى هيئة مبيعات الحكومة يبقى هيئة مبيعات الحكومة تشترك مع مصلحة الجمارك وتتولى عملية البيع طب إذا كان النهارده بياخدوا نسبة من مبيعات البيت ولا تتجاوز نسبة 1 أو 2 %
حنان منصور: طب أستاذ حسنين احنا معانا مداخلة هاتفية من الأستاذ أحمد فرج سعودى رئيس مصلحة الجمارك أهلا وسهلا
أ/ أحمد فرج: أهلا يا فندم أهلا بك يا أستاذة حنان
حنان منصور: لديك تعليق على ما استمعت إليه ؟
أ/ أحمد فرج: آه طبعا الحقيقة يا أستاذة حنان أنا أحب أوضح خطورة التعميم فى كل شئ تتخيلى حضرتك إن مصلحة الجمارك يتم فيها ما يزيد عن أكثر من مليون عملية خلال العام من كافة العمليات الجمركية ، هناك بعض الأخطاء أو بعض السلبيات تحدث فى بعض المنافذ أو فى بعض المواقع وده شئ وارد المهم إن احنا نتعلم منها ونصححها وناخد الإجراءات القانونية فحضرتك إذا كان هناك بعض السلبيات أو بعض المشاكل اللى حصلت وزملاءنا تقدموا ببلاغات تثبت وجود مخالفات طبعا بتتخذ الإجراءات القانونية فورا للتحقيق داخل المصلحة وإذا استلزم الأمر تحويلها لجهات التحقيق الخارجية لا نتوانى فى هذا ده فيما عرض من مخالفات إذا كان حضرتك بتتكلمى على موضوع المزاد ، موضوع المزادات دى كانت مكافأة قررها وزير المالية بنفسه وهو اللى كان بيحدد بعض الأرقام وبعض القيادات وبعض الأرقام الأخرى كانت بتحدد وتوزع على كافة المشتركين فى أعمال الفساد وده إجراء قانونى وبتتم مراجعته من الوحدة المالية الموجودة فى مصلحة الجمارك قبل الصرف وبعد الصرف والجهاز المركزى للمحاسبات والجهات الرقابية بتقوم بالمراجعة ودى عن أعمال سنوات سابقة قديمة مش من النهارده
حنان منصور: أستاذ أحمد فرج سعودى رئيس مصلحة الجمارك بنشكرك على هذه المداخلة ونعود إلى الاستديو بعد أن استمعنا إلى تعليق الأستاذ فرج سعودى يعنى برضه من ضمن الكلام اللى الواحد بيسمعه إن مثلا فيه آلاف من كيلوات من زيت الزيتون مثلا بيتم الإفراج عنها تحت اسم استعمال شخصى حتى لا يتم دفع الضرائب عليها أو الجمارك عليها ؟
أ/ محمد على: فيه واقعتين اثنين واقعة فى نويبع ودى بألف كيلو كانت باسم أسامة الشريف والموضوع اتعرض على 20 لجنة وكلها وافقت وبعد كده حولناها النيابة الإدارية قلنا يمكن الموضوع فيه غلط رغم إن اللجان وافقت كل اللجان حولناها للنيابة الإدارية فى الثور وحفظت القضية وبعتت لنا نتيجة التصرف فيها الواقعة الثانية اللى هو بيقصدوها 404 كيلو فى قرية البضائع أفرج عنها هى فيها خطأ شق خطأ إن الأول دخل التجارى بعد كده حاول يعملها استعمال شخصى وعلى ضوءها رحنا محولين الموضوع للنيابة الإدارية قبل ما يطلعوا على البرنامج ب4 شهور يعنى إذن ما حدش
حنان منصور: يعنى عايز تقول يا أستاذ على إن مفيش تستر ؟
أ/ محمد على: مفيش تستر
حنان منصور: طب يا أستاذ حسنين برضه عايزة أقول قطع غيارسيارات اتضبطت فى مطار القاهرة 6 طرود بتاريخ 19-1-2011 إيه حقيقتها ؟
أ/ حسنين شبانة: القصة مع أستاذ محمد
أ/محمد على: هقول لحضرتك ال6 طرد علشان أجيب التواريخ بالضبط
حنان منصور: ما هى كلها أمثلة أو نماذج
أ/ حسنين شبانة: آدى زيت الزيتون ، موضوع قطع الغيار مش كده قطع الغيار كانت الشهادة 2550 باسم عمر عمر جاية أصلا مكتوب كل السندات إن هى أمتعة شخصية ففيه موظفة اللى هى مأمورة حركة قامت كشفت وعملت استمارة وقالت إنها أمتعة شخصية قبل ما تطلع من الباب موظف الجمارك شافها لقى الكراتين نفسها ما اتفتحتش ما هو معنى إنه يلاقى الكراتين ما اتفتحتش يبقى إذن شافتها ازاى أمتعة شخصية فشكلنا لجنة ومن ضمنها الأستاذ رفعت هاشم اللى طلع قال هو اللى كان فيها وراحوا فتحوا لقوها كلها قطع غيار واتعمل محضر ضبط واتعرض على التصالحات وصاحب الشركة خد غرامة مثل القيمة والموظفة اللى أخطأت راحت النيابة الإدارية وأخدت جزاء 10 أيام الكلام ده كان فى 2009 وللا 2010
حنان منصور: يعنى برضه تم اتخاذ إجراء ولم يتم التستر ؟
أ/حسنين شبانة: لا يمكن
حنان منصور: طب معنا مداخلة تليفونية أحمد إسماعيل أستاذ أحمد إسماعيل رئيس النقابة المستقلة لجمارك القاهرة أستاذ أحمد إسماعيل يتفضل
أ/ أحمد إسماعيل: أنا بس هتكلم فى نقطتين هبدأ من النقطة الأخرانية كلام الأستاذ أحمد فرج السعودى رئيس مصلحة الجمارك وسيادته لما تكلم قال الزملاء اللى تقدموا ببلاغات أنا بس هقارن ما بين تصريح الأستاذ أحمد فرج سعودى وسط الزملاء حتى لو كان على خلاف معاهم أو كانوا أصغر من السن إن هم زملاء وبعض القيادات اللى طلعت فى الحلقة اللى فاتت وحاولت توجه لهم وتشير لهم بأصابع الاتهام وتقلل من مجهودهم أو دورهم أو نواياهم يعنى أنا شايف إن ده مثال جيد من الأستاذ أحمد فرج السعودى إن هو حتى لما تحدث عن الزملاء أو هم من وجهة نظره أو من وجهة نظر القيادات الموجودة مع حضرتك دلوقتى أساؤوا له لكن هو لما خاطبهم خاطبهم على إنهم زملاء له فى مصلحة الجمارك ، النقطة الثانية يا فندم إن الأستاذ حسنين شبانة لما اتكلم
حنان منصور: بس وطى التليفزيون إذا سمحت يا أستاذ أحمد
أ/ أحمد إسماعيل: أنا مش مشغل التليفزيون أصلا النقطة الثانية يا فندم من كلام الأستاذ حسنين شبانة إن الموظف اللى بيشتغل لازم يكافأ والموظف اللى ما بيتشغلش لا يساوى بالموظف اللى بيشتغل أنا بس عاوز أنوه عن نقطة واحدة وهى مشكلة العاملين بتفتيش الركاب بالمطارات يعانوا بالتهميش وعدم التقدير لإن هم بيتشغلوا بنظام الورديات إذا كنت أنا بشتغل فى قرية البضائع عندى ميزة اللى بيتشغل فى البرج عنده ميزة اللى فى تفتيش الركاب ما عندوش أى ميزة بل بالعكس بيعانوا من تدخل السلطة
حنان منصور: وصلت الرسالة يا أستاذ أحمد
أ/ حسنين شبانة: هرد على سيادتك يا أخ أحمد انت بتقول الإخوة اللى قاعدين فى المطارات ما عندهمش أى ميزة أولا مطار القاهرة بيشتغل فعلا 24 ساعة أولا مطار القاهرة بيتصرف له زى رسمى كل البدل الخاصة بهم 24 قيراط وهم والعاملين بمصلحة الجمارك فى المطارات دى أول حاجة ، الحاجة الثانية بقى لهم فترة كبيرة جدا بيصرفوا بدل سهر مبلغ بحد أدنى أنا أعرف من 350 ل 500 جنيه ده للفرد الواحد أنا ما باخدوش ورجال أى موقع ثانى ما بياخدوش ويطبق هذا على العاملين فى الورادى كميزة من مميزاته إذا كان انت بتحصل على مرتب قد يصل إلى مرتب شهر او أكثر من شهر أو مرتب شهر بحد أدنى من 350 ل 500 جنيه أوفر فوق ما بتحصل عليه مصلحة الجمارك طب هنجيب لك إيه أكثر من كده
حنان منصور: طب أنا عايزاك يا أستاذ حسنين ترد على الاتهام زى مثلا كشف بدل طبيعة عمل الحاسب الآلى
أ/ حسنين شبانة: آه هقول لحضرتك على الحاسب الآلى إيه الحاسب الآلى ، الحاسب الآلى أولا المكافأة بتاعته حوالى نص شهر ، نص للعاملين وللمعاونين ربع أمر لا يذكر يعنى لو واحد لسة متعين امبارح بياخد له حوالى 60 أو 70 جنيه فى الشهر ده المكافأة اللى بيتكلموا عنها لأن أصلا الأجهزة دى هو بيقعد يشتغل ويتعامل مع الأجهزة دى طوال مدة وأثناء العمل يعنى 6 ، 7 ساعات قاعد على الجهاز فمش أقل من إن هو بياخد هذا العمل ، هذه المكافأة طب واحد غيره قاعد على مكتبه طبيعة العمل بتختلف وإذا كان طبيعة العمل ده أصعب من أى مكان من طبيعة عمل ثانى احنا بنديه له هذا عشان نرغبه فى المكان يعنى ممكن يطلب نقله من مكانه
حنان منصور: طب حضرتك اتكلمت عن المكافآت أن تستمع إلى مداخلة تليفونية الآن من أحد العاملين بالجمارك الأستاذ مجدى جلال
أ/ مجدى جلال: مجدى جلال نائب رئيس نقابة جنوب سيناء والله بس يا فندم أنا لى سؤال لحضرتك هل حضرتك البرنامج مدفوع الأجر ولا لا ؟
حنان منصور: أى عمل بأجر يا أستاذ مجدى
أ/ محمد على: احنا دافعين هتدينا حاجة ، هناخد منكم حاجة هيدفع حاجة
أ/ مجدى جلال: بعد إذن حضرتك هو بس فيه سؤال الأستاذ أحمد إسماعيل اللى اتكلم دلوقتى هو يقصد الإهانات اللى تعرض لها مفتشى الركاب فى المطارات وخصوصا مطار القاهرة اللى بيتعرضوا لها من الشرطة والجهات اللى هى المفروض أصلا هى جهات معاونة للجمارك والتدخلات السافرة فى شئون الجمارك مما أدى إلى إهانة مأمور الجمرك فى عمله ودى احنا بنعانى منها من أسبوع أو أسبوعين من تدخل هذه الجهات ، ثانيا كان فيه بس الزميل الأستاذ محمد على كان قال فى الحلقة السابقة إن المحضر اللى تم تحريره فى قسم محرم بك هو حضرتك المحضر ده اللى حرره فرد من أفراد النقابة المستقلة وحضرتك الفرد ده كان فى دائرة الاختصاص الشاكى ، الشاكى دائرة اختصاصه فى محل إقامته فى الشكوى ده سليم قانونا أما إذا كان فيه رفع دعوى قضائية هو بيكون فى محل إقامة المشكو فى حقه وليس الشاكى وهذا كلام قانونى 100 % ، ثانيا حضرتك أنا بأطالب السيد الزميل محمد على بإنه هو يقول لنا رقم المحضر اللى توجهوا به للنائب العام ضد برنامج الحقيقة
حنان منصور: أستاذ محمد على اتفضل رد آه
أ/ محمد على: أنا فيه جزئين هرد عليهم هو فيه زميل طبعا الزميل العزيز الأستاذ أحمد الراوى معانا فى اسكندرية هو مقيم فى محرم بك بعد ما العاملين كلهم استنكروا وعلقوا يفط فى كل مكان من التضرر من اللى قاله الأستاذ وائل الإبراشى فوجئنا إن هو عمل محضر فى قسم محرم بك بيعمل محضر بشخصه بمحرم بك هو أنا لما أعمل محضر ضد حضرتك أعمله فين عندى فى اسكندرية هناك جنب السكن بتاعى وللا أعمله فى دائرة عمل حضرتك وللا إقامة حضرتك أنا مش عاوز أدخل فى تفاصيل لإن هتبقى وحشة قوى أنا النهارده ممكن آخد فرد إدارى للنائب العام وبنقيم دعوة ضد الأستاذ وائل الإبراشى عند النائب العام هناك هياخد حفظ إدارى لما نيجى نقيم هنا يقوم يدفع إن هو اتعمل محضر واتحفظ يقوم يعفى الأستاذ وائل الإبراشى فى المرة الثانية لإن سبق الفصل فيها من النيابة العامة فأنا بقول اللى عاوز يعمل محضر فى مدينة الإعلام موجودة ، 6 أكتوبر موجودة ، مقر إقامة الأستاذ وائل الإبراشى موجود يعنى إذا كنا جادين وعايزين نعمل إنما ما اعملوش فى المكان اللى أنا قاعد فيه
حنان منصور: يعنى يمكن ده محتاج لوعى
أ/ محمد على: نمرة اثنين بيتكلم على الجزئية الثانية بيقول قل لى رقم المحضر اللى انتوا عملتوه للنائب العام أما البرنامج أنا عاوز حضرتك اللى تردى
أ/ حسنين شبانة: احنا عملنا البرنامج ده ليه على أى أساس منين جاى التكليف منين معلش يعنى من النائب العام البرنامج ده مش احنا اللى اتحايلنا عليكم أو انتوا اللى اتصلتم بنا ده تكليف من النائب العام لوزير الإعلام وموجود وشفناه عند الأستاذ عبد العزيز بناء على تكليف النائب العام لوزير الإعلام بناء على المذكرة اللى عاملاها النقابة العامة
حنان منصور: أنا عايزة أسأل حضرتك هل هناك استهداف من وجهة نظرك يعنى بصفة دائمة للأجهزة وللجهات السيادية ؟
أ/ محمد على: طبعا
حنان منصور: يعنى لماذا ؟
أ/ محمد على : طبعا والله لدرجة إن احنا أنفسنا الجو العمل أصبح النهارده بقى فيه تشكك الموظفين نفسهم والمصلحة العامة بقى فيه تشكك النهارده انت مفيش جو هادئ للعمل وبعدين لمصلحة مين إن احنا نعمل كل يوم والثانى الهيجان اللى موجود ما قلنا احنا ارتفع الشعار
حنان منصور: هذا الاستهداف سببه إيه يا أستاذ حسنين ؟
أ/ حسنين شبانة: أنا لغاية النهارده فى رأيى إنه مصالح شخصية
أ/ محمد على: لا أنا هستأذن حضرتك
حنان منصور: مصالح شخصية لإن لم يعد لدينا وقت
أ/محمد على: معلش هستأذن حضرتك
حنان منصور: اتفضل
أ/ محمد على: أنا بقول عليه إن هو مخطط ، هقول لحضرتك ليه مصلحة الضرائب العامة فيها نفس الأسلوب والإضرابات والمشاكل دى ، الضرائب العقارية ، فيها نفس النظام ، ضرائب المبيعات فيها نفس النظام ، الجمارك فيها نفس النظام لو حضرتك سمعتى إذاعة لندن يوم حرائق ضرائب قصر النيل الساعة 2 قالت لم يبق فى مصلحة الجمارك إلا المصالح السيادية
حنان منصور: لم يعد لدينا وقت واحنا بنشكر حضراتكم جدا ولكن لم يعد لدينا وقت انتهى لكن فيه أشياء كثيرة جدا تم توضيحها من قبل ضيوفنا تم الاستماع إليها أيضا من خلال المداخلات التليفونية احنا بنرجو ألا يحدث هذا الخلط وألا يحدث تعميم وأن يتحقق كل من يتقدم نخلى هدفنا مصر بعيدا عن المخططات ، بعيدا عن الاستهدافات بعيدا عن المصالح الشخصية نشكركم سيداتى سادتى فى نهاية هذه الحلقة من اتجاهات ونشكر ضيوفنا والسلام عليكم ورحمة الله