اتجاهات

الاربعاء /31/8/2011
رشا مجدي: مشاهدينا الكرام وأهلا بكم مع حلقة جديدة من إتجاهات يوم الأحد أنا بأتكلم علي الساعات الماضية إنعقدت في إسرائيل جلسة محاكمة ثلاثة من الأطفال المصريين الأطفال دول من بدو سيناء أعمارهم لا تتجاوز 15 عام إعتقلتهم القوات الإسرائيلية دا كان في 14 يوليو الماضي وسجنتهم وقدمتهم للمحاكمه بتهمة إنهم إجتازوا الحدود خلال قيامهم ببيع علب سجائر ومعسِّل وإن الحجة إن علب السجائر والمعسل بيباع في مصرأرخص من إسرائيل .. للمرة الثالثة قررت المحكمة الإسرائيلية في جلسة اليوم أو في جلسة الأحد إعتقالهم الي الثامن عشر من الشهر القادم أى شهر سبتمبر .. يال حمرة الخجل مَن يزعمون أنهم واحة ديمقراطية تجردوا من كل معاني الإنسانية إنتهكوا أبسط مبادئ القانون الدولي وحقوق الأطفال لو تتذكروا لو تابعتونا علي مدي الخميس والجمعة الماضيين في برنامج مصرأولا كانت قضية الأطفال الثلاثة المعتقلين موجودة ومطروحة بقوة والحقيقة إن الصحافة أبدت بعد الخميس والجمعة إهتمام بالغ بهذه القضية كانت الملاحظة اللي شدت إنتباهنا هو إن أهالي الأطفال الثلاثة رفضوا الحديث وحتي إنهم يظهروا أي صورلأبنائهم لما سألناهم طيب ليه قالوا إن إحنا لا نأمن غدر هؤلاء بأبنائنا – هم خايفين علي أولادهم مش عايزين أي حاجة يظهروها وخايفين من الإنتقام من الأطفال الثلاثة – طبعا إحنا ممكن نتفهم هذه المخاوف إلا أننا أكدنا لهم أن هذه المخاوف المفروض إن لم يعد لها وجود بعد الثورة وإن الأطفال الثلاثة ليسوا أبناءهم فقط بل هم في هذه اللحطة أبناء مصركلها وإن الأيام جت خليكوا تتأكدوا من ذلك – تعالوا نشوف الحلقتين السابقتين فيهم إيه
فاصل
علي الشاشة قصاصات من الجرائد " تعليقات علي الأطفال المسجونين في السجون الإسرائيلية
شقيق أحد السجناء : سننظم وقفة أمام محافظ شمال سيناء لإجبار الخارجية علي الإهتما بأبنائنا
السجين مساعي بريكان من سجن " كنسيعوت" نعيش عاله علي المعتقليم الفلسطينيين
عبد الفتاح : المصريون يهربون في مراكب الموت الي إيطاليا ونحن لا نجد غير إسرائيل
مذيعة :يال العارإسرائيل تعتقل وتقدم أطفالاً مصريين للمحاكمة بإعتبارهم أعداء وفقاً لقانون كان قد صدرعام 54 " مشهد لعائلة بدوية بداخل ساحة واسعة " ثم قصاصات من الجرائد في المصري اليوم " 100 سجين مصري في السجون الإسرائيليه يطالبون"العسكري"وشرف " بصفقة تبادل للإفراج عنهم "
تعليق من مراسلة : دية العيلة الوحيدة اللي كانت متعاونة معانا وإتكلمت معانا بإستفاضة حتي حكوا لي عن شكل المعاملة في السجون الإسرائيلية كان إزَّاي خاصةً إن قبيلة السواركة من أكثر القبائل البدوية اللي بتتعامل بإمتهان أو من أكثر القبائل المستهدفة لدي الجانب الإسرائيلي
المذيعة : معانا داليا النمري عشان تقول لنا الإستعدادات لهذه المحاكمة
داليا النمري : إسرائيل وزعت اليهم ثلاث تهم التهمة الأولي هي التسلل إلي إسرائيل والتهمة الثانية كانت التآمرعلي إرتكاب جرم وهو التسلل والتهمة الثالية كان تهريب بضائع كان بحوزة هؤلاء الأطفال كيس معسل
"المصري اليوم " والدة السجين ياسر مرعي : إبني إختفي 3 سنوات ومكالمة هاتفية من غزه أكدت لي أنه مسجون ..
ضيف في برنامج مصر أولا : إسرائيل دائما مش فير في أي لعبه بتلعبها
فاصل
رشا مجدي: علي ضوء جلسة المحاكمة التي إنعقدت خلال الساعات القليلة الماضية للأطفال الثلاثة فبرنامج إتجاهات بيتابع معكم وقائع ما جري يسعدنا أن يكون معنا في هذه الحلقة الأستاذ حافظ أبو سعده عضو المجلس القومي لحقوق الإنسان .. أستاذ حافظ بنرحب بحضرتك لكن إسمح لنا قبل ما نبدأ الحوار نتعرف من خلال هذا التقرير علي ما جري في جلسة المحاكمه يوم الأحد
فاصل " صورة لدار القضاء بئر السبع "
داليا النمري : جلسة إستثنائية عقدتها المحكمة الإسرائيلية للنظر في قضية المصريين الثلاثة والذين تتهمهم بالتسلل إليها بهدف تهريب بضاعة هي عبارة عن كيس معسل وسجائر – الثلاثة المتهمين بحسب القانون أطفال لا تتجاوز أعمارهم الخامسة عشر إنفضَّت المحكمة وقد قررالقاضي تمديد إعتقالهم الي 18 من الشهرالقادم حيث ستعقد جلسةٌ أخري للنظر في قضيتهم وإعطاء فرصة للمحامين الإدعاء العام للتوصل الي إتفاقٍ وسط .. هيئة الدفاع العام المكونه من أربعة محامين تم توكيلهم من قِبل دولة إسرائيل بالقضيه رفضوا التعليق علي مجرياتها .
مذيعة : عشرات المصريين خضعوا لمثل هذه المحاكمة علي مدي سنوات طوال منها مَن قضي حكمة ومنهم من ينتظر وهؤلاء الأطفال ليسوا إستثناءاً ومدة محكوميتهم قد تتراوح ما بين أشهر الي أكثر من سنه
داليا النمري : ويتبع في السجون الإسرائيلية حوالي ثمانية وسبعين مواطناً مصرياً ما بين تهم أمنية وجنائية العديد منهم تم إعتقالهم بتهمة التسلل.
طلب الصانع العضو العربي بالكينست الإسرائيلي: كنا نتحدث عن القاصرين الذين قاموا بعمل صبياني يجب أن يكون الإجراء إعادتهم الي جمهورية مصرفي حالات كثيرعندما يكون اليهود في حالات من السياقة وتجاوز الحدود بدون أن تكون لديهم النية للقيام بأي عمل أمني فيجب إتخاذ والتعاطي مع هذه القضية كقضية عادية لكن ما يحدث الآن إسرائيل تحاول تضخيم هذه القضية وأعطاها بعد سياسي أكبر من حجمها الطبيعى ومحاولة إبتزاز مواقف سياسية من جمهورية مصر العربية خلفية الموقف المصري الواضح الرافض للممارسات الإسرائيلية وكل ما يخص محاولة تصعيد مع حماس ومع قطاع غزة
داليا النمري : وتدَّعي السلطات الإسرائيلية بأن القضاء لديها مستقل عن مجريات السياسة وأنه لا يمكن أن يتم التساهل أو التشديد من العقوبة بناءاً علي إعتبارات سياسية كألأزمة الدبلوماسية الحاصلة حالياً بين مصر وإسرائيل من مدينة بئر السبع داليا النمري لبرنامج إتجاهات
رشا مجدي: أستاذ حافظ أنا حآخد من أخر جملة من مراسلتنا داليا النمري بتقول إن الإدعاءات الإسرائيلية إن إسرائيل بتقول إن القضاء لديها مستقل عن السياسة إيه رأي حضرتك في هذا القول
أ/ حافظ أبو سعده : دا طبعا زعم كاذب زي زعم واحة الديمقراطية اللي حضرتك أشرت إليه – طبعا هي ليست دولة ديمقراطية هي دولة عنصرية بالأساس تعامل المواطنين عندها بتصنيف مواطن درجة أولي ودرجة ثانية ودرجة ثالثة وعندها إنتهاكات جسيمة – القضاء الإسرائيلي نفسه عليه إنتهاكات شديدة جداً يعني من القضاء القليل في العالم اللي بررالتعزيب ودية من المسائل اللي إحنا إشتغلنا عليها علي المستوي الدولي إن محكمة عليا في إسرائيل قالت أيوه يجوز للظباط أن يستخدموا قدراً من التعذيب مع الفلسطينيين مش مع اليهود
رشا مجدي: حدد
أ/ حافظ أبو سعده : آه طبعا لإن هو بتعامل في منطقة إحتلال فإذن فكرة القضاء المستقل لأ طبعا مش قضاء مستقل – القضاء المستقل أطفال وقفا لإتفاقية حقوق الطفل الماده 39 إن دول لا يعاملوا معاملة الكبار ولا يودعوا في السجون ولا يتحطوا في أماكن آمنة ولا يجرموا زي أعمالهم يعني ده رجل لا يمكن يبقي متآمر – يعني إيه متأمر – هو حتي لا يملك أهلية التآمر
رشا مجدي: ما هو ده اللي أنا عايزة أسألك فيه يا أستاذ حافظ دلوقت أطفال
أ/ حافظ أبو سعده : وبعدين عايزة أقول لحضرتك حاجة مهمة جدأ مئات الحالات وأنا مسئول عن هذا الكلام – مئات الإسرائيليين دخلوا سواء بلانشات المياه الإقليمية المصرية وقبضت عليهم السلطات المصرية ثم بعد أن ثبت حسن نيتهم إنهم مش جايين في أعمال تجسس أو لأعمال عدائية ضد مصر تم الإفراج عنهم وتسليمهم لإسرائيل – ناس دخلوا من طابا ثم دخلوا مناطق محظور عليهم دخولها في الأراضي المصرية تم تسليمهم لإسرائيل – ناس دخلوا من علي الحدود آخرهم صحفي بن شخصية إيرائيلية مهمة جاية من الأريتريين والأفارقه في رحلة الدخول الي الي سيناء تهريباً ثم حاول عبورالحدود ودخل الأراضي المصرية وتم تسليمه إذن هذه حالة بتحصل طالما إنه مافيش إرتكاب جريمة محددة ضد البلد بيحصل إنه طبعا بيسلم مع التنبيه إنه ما يتكررش هذا العمل ثاني أو كذا
رشا مجدي: طيب إيه التبرير بقى إن 3 أطفال كل اللي عملوه إن هم حتي لو دخلوا بطريقة غير شرعية الي داخل إسرائيل لمجرد إنه بيبيع علب سجائر ومعسل إن القضيه تتأجل لثالث مرة !
أ/ حافظ أبو سعده : لأ دا نوع من الضغط علي مصر ونوع من إبتزاز الحكومة المصرية وبيحاولوا يوصلوا رسالة وطبعاً للأسف وضعهم علي مستوي حتي الدولي حيبقي مش إنهم بيستخدموا شيئ أطفال للغط علي الدولة المصرية علشان تغيرمواقفها سواء فيما يخص مثلا فتح المعابر مع الفلسطينيين أو تسهيل الحياة للفلسطينيين في ظل الحصارالمخالف للقانون الدولي اللي بتقوم به إسرائيل فدة مفهومة المسألة أو الضغط في مواجهة قضية التجسس اللي ظبطتها مصر مع إسرائيل – فيه أكثر من قضية مؤخراً تم ضبطهم بما يقول بشكل واضح أن إسرائيل لديها نوايا عدوانية ضد مصر وبالتالي هي تريد أن تجمع أكبرقدر من المعلومات تجسس علي شبكة إتصالات بتاعتنا وبالتالي هي تأخذ هذه القضية للضغط علشان الجواسيس اللي عندنا أو الموقف السياسي المصري ديه مفهومه ومعروفه وبالتالي مكشوفة للرأي العام لكنها كمان بنقول لازم تعرف إسرائيل أن هذا يسيئ جداً من الإيمدج بتاعها في المجتمع الدولي وداخل مصر سواء تكوين الرأي العام المصري ضد هذه المؤسسات الإسرائيلية إللي بتنتهك حقوق الإنسان دا بيؤكد تمام إن نواياهم نحو السلام مش صحيحة
رشا مجدي: نوايا عدوانية أنا ممكن أقول إن المواطن المصري أبتدي يجيي له حالة شيزوفرينيا بعض الشيئ – مش فيه إتفاقية كامب ديفيد وعمالين نتكلم عن الإتفاقية – سيبنا من الشق العسكري اللي هومحل جدل الآن في الإتفاقية لكن هذه الإتفاقية وفيه مصانع معمولة مع الإتفاقية ديه للكويز وا وا الي آخره هل هي جارة عدوانية أو جارة بتحاول تطبيع السلام أم ماذا يعني أنا مش فاهمة !
أ/ حافظ أبو سعده : آه صح ده الرسالة اللي إحنا مش قادرين نستوعبها إنه علي مدي ال 30 سنة الماضية في ظل النظام القديم هوفي الحقيقة قدَّم لهم من التسهيلات ومن التطبيع معاهم ما كان يجب أن يتم التعامل مع مصر بشكل مختلف تماماً لكن يبدوا إن هم بتعاملوا معانا علي إن إحنا أعداء وأنا بس دية نقطة مهمة جداً إن هم برضه يقول لك إزَّاي الرأي العام في مصرمعادي لينا لأ ما هو ده عداء مواجه لعداء هو النهارده إنت لما تحاكم الأطفال المصريين بقانون بإن هم جايين من منطقة عدو يعني من حدود عدو هو بيعتبر إن الحدود المصرية حدود عدو طيب إنت عايز الشعب المصري يتعامل معاك علي أي أساس علي إنك عدو فهم في الحقيقه بصدروا العدوانيه لينا وبالتالي في إتفاقية السلام هم بتعاملوا معاها علي إنها هدنه طيب ده مش يخلي الشعب المصري يتساءل ويطالب حكومته وضغط علي الحكومة المصرية ويقول لها نلغي دخول الإسرائيليين لسيناء .. هو إحنا من ساعة ما دخلوا سيناء مش كل عمليات العنف المسلح وتهريب السلاح وتهريب المخدرات بتيجي لنا من خلال الدخول المجاني لطابا بالبطاقة الشخصية أو بجواز السفرالشخصي بدون تأشيرة ما هي دية نقطة محتاجين فيها واقفة لإن لازم الحكومة المصرية جزء من مراجعة كامب ديفيد إن إحنا نسيطرعلي كل حدودنا بما في ذلك إلغاء التسهيلات المقدمة للإسرائيليين نتيجة الأوضاع الأمنية الصعبة في سيناء لإن إحنا دلوقت بييجي لنا سلاح بييجي لنا عصابات تهريب شوفنا ناس أعتدوا علي أماكن الجند المصريين سواء أمن مركزي أو أقسام شرطة وكمان العملية اللي حصلت في إيلات بتقول إن المسلحين والأسلحة والمتفجرات جاية من جوه إسرائيل يعني مش جاية من سيناء لأ ديه جاية من جوه إسرائيل ففي الحقيقة ديه العدوانية اللي تم التعامل بها مع الأطفال والقبض عليهم إحتجازهم في السجن وإصدارالأمر بإستمرارالإعتقال هذه رسالة للمجتمع المصري ومصرقادر إنه يرد عليها بشكل واضح إنك دولة عنصرية وإنك محتلة وأن قوة أحتلال وأننا لن نقبل هذا الإحتلال وسنعمل علي دعم السلطة الفلسطينية والشعب الفلسطيني وأول شيئ في هذا الأمر سبتمبر القادم علي الحكومة المصرية أنها تدعِّم مطلب الحكومة الفلسطينية في طلب الإستقلال والإعتماد في الأمم المتحدة كدولة مستقلة وأن تأخذ مقعداً دائما في الجمعية العامة للأمم المتحده فده الرد اللي لازم نعمله إحنا علي مواجهة هذه العنصرية الإسرائيلية
رشا مجدي: طيب أنا حأرجع للأطفال الثلاثة المعتقلين داخل إسرائيل يعني حضرتك من خلال التقريراللي شاهدناه يعني أنا أشك إن هؤلاء الأطفال لديهم محاكمة عادلة خصوصاً إن المحامين اللي أوكلتهم إسرائيل رفضوا حتي التعليق أو الحديث مع الناس إزَّاي نضمن علي الأقل إن يبقي فيه محاكمة عادله ليهم – يعني من كلام حضرتك إستشعرت إن هؤلاء الأطفال بيُعاملوا في قضية أمن قومي إسرائيلي وليست قضية بيبيعوا معسل وسجائر
أ/ حافظ أبو سعده : لأ أنا تقديري إن المحاكمة مهزلة بصراحه إنت بتتكلمي إن المحاكمة عادلة علي إيه ناس معاهم علبة سجائر يعني مفهومة ديه بتحصل في كل حدود الدنيا معروف كل الحدود بين الدول فيه المناطق اللي السكان فيها متعايشين الدخول والخروج ليس – طالما إن مش بقصد إرتكاب جريمة ولا بقصد إرتكاب أي عمل عدواني ضد الدولة ما بيعتبرش جريمة اللي يتم الوقوف عندها طبعا بيتم التعامل مع السلطات المعنية وتسليمهم ليها علي أعتبار يبقي فيه معاملة بالمثل زي ما إحنا بأقول أنا فيه حالات كتير جداً بتدخل الأراضي المصرية سواء بالمياه الإقليمية أو الأراضي المصرية وبنعيد تسليمهم لإسرائيل فهم لما يتعاملوا علي إن ديه قضية جنائية يحاكموا قدَّم محكمة بهذا الشكل وبهذا الإصرار علي توجية إتهاجام جنائية مضحكة – يعني طيب تآمروا لإرتكاب جريمة إيه هي بقى الجريمة ما هو برضه مش مفهوم – يعني هل فيه تفجير فيه تجسس فيه جمع معلومات فيه كذا مش ممكن يكون – يعني ده في الحقيقة شيئ من الهزل اللي بيحاولوا يصوروه في صورة جديه عشان نتكلم بشكل موضوعي عايزين محاكمة عادلة ومنصفة لأ مش صحيح هذه ليست فيها محاكمة ليست هناك إتهامات حقيقية دا في نوع من إنتهاك حقوق هؤلاء الأطفال وتعريضهم لمخاطر– هم بينتهكوا حقوق الأطفال ديه وقفاً لإتفاقيه دولية
رشا مجدي: إحنا ما عندناش القدرة إن إحنا نبعت محامين من هنا – يعني هل لينا هذا الحق إن إحنا نبعت محامين؟
أ/حافظ أبو سعده : لا ..لأ إحنا ممكن نوكل محامين من هناك – أصل ديه فيها المعاملة بالمثل – والتطبيع – ونقابة المحامين بتمنع التطبيع مع إسرائيل بأي شكل من الأشكال لكن إحنا فيه عرب فلسطين اللي موجود عرب 48 ما إحنا عملنا ده قبل كده لو تتذكري ال 6 الشباب الطلبة اللي عبروا الحدود وتم القبض عليهم إحنا وكلنا كمنظمه مصرية وكلنا هناك عدد من المحامين العرب وعلنا لهم توكيلات ووزارة الخارجيه ساعدتنا في إستخراج التوكيلات ليهم وأرسلنا التوكيلات وإشتغلوا معاهم ولم يُحاكموا
رشا مجدي: ولم يُحاكموا
أ/ حافظ أبو سعده : لم يُحاكموا يعني حضروا معاهم أول التحقيقات ثم بعد الضغط الجماهيري الشعب المصري وضغط المنظمات وحصل إتصالات ما بين الحكومه المصرية وما بين الجهات الأخري وحصل افراج عنهم بعد ذلك ورجعوا مصر بعد ما فيش أكثر من 15 يوم يعني إذن حتي في المسائل المشابهة ما حصلش محاكمه لا عندنا حصل محاكمه للذين تم توقيفهم لعبورهم الحدود بشكل غير قانوني ولا يجب أن يكون علي الطرف الثاني نفس القصه طالما دول بالذات أطفال لا يمكن إن إحنا نتصور إن هم في دورمشهود أو جريمه أرتكبت أو تلبس أو كذا
رشا مجدي: ما أعرفش ليه جيه في دماغي إن ديه ممكن تبقي ورقة ضغط خاصةً بعد الثوره يمكن كام واحد إسرائيلي إسرائيلي تم القبض عليه يعني كان بيصور أماكم وحضرتك عارف القضية المشهورة
أ/ حافظ أبو سعده : آه .. آه
رشا مجدي: هل ممكن ديه تكون رقة ضغط دا قصاد ده مثلا ؟
أ/ حافظ أبو سعده : بس طبعا دا شيئ مختلف الجاسوس دا عمل عدواني متعمد لما بتعتي جاسوس ورجل ضابط في الجيش الإسرائيلي
رشا مجدي: وبيصور
أ/ حافظ أبو سعده : وبيصور بصراحة ما فيش تبرير لأي صورة له لا فيه تبرير للصور وهو مع الولاد في الجامع كأنه بيدي درس لناس ولا فيه منطق للصورة قدام قسم الأزبكية وهو فيه حالة تجمهر وإشتباك الشاب اللي إعتدي علي مأمور القسم والناس تجمهرت ضده أو لإنه يبقي موجود في ثورة التحرير مع الشباب في الثورة ولا علي قهوة الحرية في باب اللوق يعني كل الصور في الحقيقة كانت بتقول إن فيه نشاط ما تجسسي بيتم وبالتالي ده يُحاكم دا راجل عسكري ومرتبة في الجيش الإسرائيلي وحتي هذه اللحظة أثناء القبض عليه كان لسه في الجيش وصورة علي الويب سايت بتاعه كان موجود وهو بيلبس الزي وكان بيحارب في لبنان وبيعرف لغه عربية كويس يعني كل مواصفات الجاسوس في الحقيقة ومع ذلك المحاكمة العادلة منصفة متوفرة له وهو بيحاكم هنا قدام القضاء المصري ومن حقه يبقي عنده محامين والتهم بتاعته يقدر يرد عليها إذا ثبت براءته بيفرج عنه إنما دول أطفال في الحقيقة ومنطقة حدودية مفتوحة خدي بالك المنطقة الحدودية بيننا وبين إسرائيل من طابا لغاية قبل رفح دية منطقة مفتوحة تقريبا يعني هي منطقة جبلية ومنطقة فيها وضع جغرافي شوية معقد بس فيه ضروب وفيه مناطق عارفنها البدو في الطرفين وبتستخدم من البدو في الطرفين وبالتالي لا يجب التعامل مع الموضوع بهذا الشكل إلا إذا كان هناك نية لخلق مشكلة مع مصر أو محاولة مساومة مع مصرعلي قضايا زي ما حضرتك قلتِ قضية الجاسوس – قضية الناس اللي إتقبض عليهم مؤخراً فيه أكثر من جاسوس فيه 3 جواسيس مقبوض عليهم بتاع الإتصالات وبتاع الصور
رشا مجدي: بالظبط .. إستاذ حافظ إسمح لي الموضوع لسة ساخن إن إحنا نستكمل في حلقة الغد إن شاء الله يعني نستكمل هذا الحوار أنا بأشكرك شكراً جزيلا ومشاهدينا الكرام في حلقة الغد إن شاء الله من إتجاهات سوف نستكمل مع حضراتكم هذه القضية المثارة الآن علي الرأي العام المصري شكرا لكن الي اللقاء