اتجاهات

هالة ابو علم :الاستاذ هانى عزيز امين عام جمعية محبى مصر
استاذ هانى عزيز : باحييكى وبشكرك على المداخلة وباعتذر ان انا ما اقدرتش اجى الاستديو لظروف قهرية فعلا يعنى
هالة ابو علم : استاذ هانى يعنى حضرتك اجتمعت مع مجموعة من المسيحيين المقيمين فى الخارج ومن خلال ايضا لقاءكم بالمجلس العسكرى وهذا اللقاء اسفر عن عدة نقاط هامة حضرتك تقول لنا ايه اهم النقاط اللى اسفرعنها هذا اللقاء ومن وجهة نظر حضرتك ليه هى مهمة
استاذ هانى عزيز :الحقيقة كان موجود فى اللقاء الاول الاخ مدحت اجازة ومعه الزملاء وكان اللقاء مدهش جدا جدا يمكن لاول مرة هما يقعدوا والمؤسسة العسكرية ايه صدقها وشفافيتها وقدرتها على انها تحمى مصر فى اصعب ظروفها وويعرفوااد بعد هذا اللقاء وكان موجود رجل دين معروف للجميع ابونا متيان نصر بعدها كان هناك لقاء اخر للاخ كميل حليم لانه ما حضرش اللقاء الاولانى حضر اللقاء الثانى بعدها على طول مباشرتا مع شريحة كبيرة جدا مع الحقوقيين والمهتمين بالشان المسيحى القبطى من داخل مصر وخارج مصر وكان عددهم كبير كان المطلوب انه اكبر شريحة عندها فهم بمشكل المسيحيين فى مصر تيجى وتقعد تتكلم والمجلس فاتح ذراعية لكل من الجلسة يعنى حوالى 6 ساعات تقريبا واسفرت عن حوالى 23 توصية تقدم بعد صياغتها صياغة جيده يعنى هو ده اتناقش مع اعضاء المجلس وكان موجود اللواء محمود حجازى هو رئيس هيئة تنظيم الادارة وفى نفس الوقت عضو المجلس العسكرى وكان موجود اللواء طارق المهدى فى المرة الاخيرة والمرة الاولانية كان منضم اللواء اسماعيل عتمان مع اللوا محمود حجازى
هالة ابو علم : ايه اهم النقط التى شايف حضرتك انهااتحققت من خلال اللقاء ده تقول لنا عليها كده
استاذ هانى عزيز : اللقاء الاولانى كان مطلب خروج 18 شاب من ماسبيرو الحقيقة انا شخصيا سمعت من ناس كثيرة قوى انهم مظلومين لابونا ميشيل تعرض انه هما مظلومين حتى كل الحاضرين يعنى اكدوا هذه المعلومة
هالة ابو علم : يعنى اول مطلب يا استاذ هانى خروج 18
استاذ هانى عزيز : من دم 147 مصرى
استاذ هانى عزيز : 18 مسيحى ضمن 147مصرى وعايز اقول يعنى انه ميشيل ما صدقش على هذا الحكم او اترد علية انما هو بروح الابوه ما صدقش على هذا الحكم لما تقدمنا زى ما قلنا لحضرتك
هالة ابو علم : ايوا طب المطلب الثانى
استاذ هانى عزيز :صدر بيان من المجلس العسكرى باعادة الاجراءات باعادة كافة الاجراءات ان وصل شباب ماسبيرو مغلوطا ان هو اعادة محاكمات ده اللى وصل انما هى فعلا يعنى اعادة اجراءات ومن يثبت
هالة ابو علم : طيب النقطة الثانية ياستاذ هانى
استاذ هانى عزيز : اكمل الجزئية دى ومن يثبت فعلا مش مدان هيخرج فورا ده كان يعنى نهاية البيان وانهم بيخطائوا ولادهم نقط كثيرة اللى هى طبعا تفعيل دور البناء العبادة وقلنا اتناقشنا ازاى وممكن يحصل ايه مش زى مثلا احنا انهاردة عندنا الرقم القومى وعندنا السجل العينى فاصبح معروف فى كل شارع فى كام مسيحى وكام مسلم ومش عايزين نقف نقول مسيحى ومسلم انما يبقى بالاحتياج العددى طالما ان ربنا ادانا علم جديد انا احنا نعرف انا مش عايز اقول تفاصيل عشان ما اخشش فى وقت الضيوف انما انا بعت للبرنامج ال23 توصية تقريبا ارجوا انكوا انتوا تعرضوها عشان مااخدش وقت ضيوفك فى الاستديو
هالة ابو علم : اشكرك شكرا جزيلا استاذ هانى عزيز :
استاذ هانى عزيز : وانا يعنى بردوا اعتذر انا انا ماجتش لظروف قهرية وتحياتى للاخ والصديق مسعد ابو ليلة
هالة ابو علم : اشكرك استاذ هانى عزيز ونحن نعلم تما ما الدور الكبير اللى بتقوم به فى التقريب بين وجهات النظر بين الاخوة المسيحيين
والمسلمين وهم بكل تاكيد اخوة فى وطن واحد انا هرجع لك يا استاذ مدحت مرة ثانية وهقولك يعنى الاستاذ هانى عزيز اتكلم عن بعض النقاط المهمة جدا بالنسبة مثلا لتفعيل قانون دور العبادة هل لك وجهة نظر بخصوص هذا الموضوع وانت شايف استجابة المجلس الاعلى للقوات المسلحة لهذا الموضوع واستجابة ايضا رئيس مجلس الوزراء دكتور عصام شرف
مدحت قلادة : هو احنا بصراحة كنا قابلنا الدكتور عصام شرف فى شهر مارس وقابلنا المجلس العسكرى فى الفترة دى وطبعا زى ما قال وذكر الاستاذ هانى كان فى عدد من الطلبات وديناها واحققت واحدة ولكن فى لسة حاجات تريد يعنى تهدى من نفوس الاقباط على سبيل المثال احنا قابلنا كمان وزير الحكم المحلى
هالة ابو علم : طب مفيش كمان قرارات اتخذت فى هذا الصدد مثلا اعتقد ان قرات فى الجرائد كده ان الدكتور عصام شرف مثلا اعلن البدء فى فتح 6 كنائس مثلا
مدحت قلادة : كلام حضرتك جميل ولكن عايز اقول لحضرتك يعنى فى البدء لم يتم فتحهم يعنى بردوا
هالة ابو علم : يعنى اخذ القرار يعنى اخذ قرار
مدحت قلادة : ما فى قرارات حضرتك تخذت لعدد كبير جدا جدا تيجى موظف الادارة المحلية يعطل كل حاجة يعنى عايزين نشوف حاجة على ارض الواقع ثانى حاجة احنا قابلنا وزير الحكم المحلى وطلبنا منه اللى هو اللواء محسن النعمانى قابلناه بردوا وقعدنا مع اللوا العيسوى ساعتين واتكلمنا بكل صراحة ووضوح وانهاردة صدر قرار قلنا له احنا محتاجين على الاقل لنفوس بعض الاقباط اللى هى حاسة بالاجحاف والظلم ليها ان هى اول حاجة 3 كنائس بس من عدد 200 كنيسة ما بين 200 الى 300 كنيسة فيهم مشاكل لان السيد اللوا العيسوى قال لك يفضل كل وزارة تحمل مشاكلها فحول هذه المشاكل لوزارة التنمية العمرانية اللى هى فيها اللواء محسن نعمانى وقلنا ياريت بسرعة اولوية الكنائس اللى هى تهدى نفوس الاقباط اللى هى كنيسة مطرانية مغاغة كنيسة العدرا عين شمس وكنيسة العمرانية واحنا فى النشرة انهاردة بصراحة سمعنا ان مطرانية مغاغة تم التصريح بها لكن محتاجين نشوفها فعلا هل ملكت بدؤا فيها والا لأ وحضرتك احنا هذه ليس مطالبات يعنى احنا قلنا طلبات والزيبانى قال طلبات ولكن هذه ليس طلبات هى حقوق
حقوق مواطنة كريمة
هالة ابو علم : بردوا مهم جدا ان انا اسمع سيادة المهندس كميل حليم حضرتك حضرت يعنى هذا اللقاء اللى تم
كميل حليم : لأ مكنتش انا عملت لقاء صغير جدا مع المجلس الاعلى محتاج معاهم انا كنت عايز اكمل اقول العوائق اللى ادام الثورة الطائفية حاجة واحده بس لازم نحافظ على الثورة اللى عملناها دى لازم نبص على الحاجات اللى تتصلح الطائفية دى لازم تتصلح وحش جدا اننا فى مصر هنا ننشغل بها وما نعملش حاجة ثانية وده اللى كان لما حطوا المادة الثانية فى الدستورالمصرى حطوها بغرض ان الناس تنشغل بمناقشة المادة الثانية وما يبصوش على ال 239 مادة لية ان هما كلهم اساس تاخر مصر تاخر مصر
هالة ابو علم : زى ايه ؟
كميل حليم : يعنى مثلا
هالة ابو علم : يعنى انى مادة فى الدستور اللى انت شايف انها ممكن تتسبب فى الطائفية
كميل حليم : كل الدستور المصرى سلطات رئيس الجمهورية مدة رئيس الجمهورية مش اتغيرت العلاقة حجم مجلس الشعب حجم مجلس الشورى وظائف الجلسين دول العلاقة بين الرئيس مجلس الشعب يعنى كلها ده
هالة ابو علم : حضرتك طب التفاصيل حضرتك فسر لى دى احنا عندنا فى مصر حضرتك بتقول سايب مصر سنة 68 عمرنا ما كنا بنتكلم على مسيحى ومسلم وتغيير المادة الثانية فى الدستور عمرنا ما حتى خدنا بالنا من الحاجات دى ايه اللى حصل
كميل حليم : بس احنا مكناش مسموحين نتكلم فى حاجة خالص احنامكناش مسموحين نتكلم فى سياسة مكناش مسموحين ان احنا
هالة ابو علم : السياسة ملهاش دعوة بالطائفية هنا يعنى انا باتكلم عن الطائفية مكنتش موجوده فى مصر عمرنا ما اتكلمنا على الحاجات دى
كميل حليم : خالص
هالة ابو علم : يعنى احنا انهاردة يمكن احنا بنتكلم على مادة ثانية
كميل حليم : انا ما باتكلمش على مادة ثانية انا باقول المادة الثانية بتشغلنا من عمل دستورا مصرى يخلينا ندخل فى الحضارة والعالمية احنا دلوقتى بلد منفصلة من العالم منفصلة من العالم فى الطائفية فى الاقتصاد بتعنا اقتصاد منهار لا يصلح لاى مستثمر يجى هنا مفيش شركة عالمية جاءت فحت فى مصر
هالة ابو علم : طب ايه اللى نقدر نعملة علشان نخرج من عنق الزجاجة
كميل حليم : الطائفية لابد ان تنحل وبعدين محدش هيحلها ليه الاقباط مش هيحلوا الطائفية الطائفية لازم تنحل بالسياسة بتاعت الدولة والاغلبية المصرية المسلمة اللى هما
هالة ابو علم : سياسة الدولة احنا سمعنا نقط الافراج عن 18 مثلا من المقبوض عليهم فى احداث ماسبيرو تفعيل قانون دور العبادة ايه ثانى يا افندم يعنى قل لى على كذا نقطة كده مطلوبة من الدولة تعملها علشان تحل مسالة الطائفية
كميل حليم : هى اساسها المساواة ومعاملة الناس ااااااا وبعدين لازم نوقف القوى الخارجية اللى بتهيج انا باقول ان الشعب المصرى شعب معندوش طائفية بس فيه بيطلع لك ناس مش مصريين يطلعوا بعد المسجد يطلعوا يقولوا احنا هنشيل البابا وهندخل جوا الاديرة المصرية اللى طالعة على الفاضى ما ده كلة بيهيج الافعال فلازم نوقف القوى اللى بتشجع الطائفية
هالة ابو علم : ده هياخد وقت
كميل حليم : احنا معندناش وقت مصر معندهاش وقت سياسيا واقتصاديا واجتماعيا الوقت راح
هالة ابو علم : افرض حضرتك ان مسالة اطائفية هتاخذ وقت سواء بخطاب جديد حديث خطاب دينى سواء خطاب دينى مسيحى او اسلامى طيب هنعمل ايه بردوا عشان نبتدى ماهوما توقفش الطائفية احنا بردوا لازم نشتغل نعمل ايه
كميل حليم : الطائفية لازم لازم يحصل فيها تغيير جذرى فى المعاملات الاجتماعية يعنى من النظام لازم يحصل فيه ممكن يوم الجمعة نطلع ونروح فئة فئة لا تمثل الشعب المصرى
هالة ابو علم : بالضبط لان اللى بيحمى بيوت المسيحيين هما المسلمين واللى كانوا بيحفظوا المسلمين وهما بيصلوا فى ميدان التحرير كانوا مسيحيين
كميل حليم : ده كلام مضبوط بس فى عندنا قوة خارجية والا قوة ضعيفة
هالة ابو علم : استاذ مدحت كنت عاوز تقول حاجة
مدحت قلادة : انا وجهة نظرى الطائفية تنتهى بدولة القانون والعدالة الناجزه لو فى عدالة ناجزة وفى سرعة قوانين عارفة حضرتك لو فى حكم الجناه فى قرية سول ما وصلنا الى امبابة
دى عشان ثانى حاجة يتم انهاء الجلسات العرفية تماما ثالث حاجة عايز اقول لحضرتك ان احنا كنا جايين فعلا متفوقين وقابلنا المجلس العسكرى وتحدثنا بكل صراحة فى عدد كبير من الامور وقلنا ان مصرد لوقتى محتاجة كل مليم مش قرش كل مليم يخش عشان مصر تنهض فعشان مصر تنهض لازم اول حاجة تبقى فى دولة قانون ولازم فى عدالة ناجزه لازم فى انهاء والقضاء على المجالس العرفية اللى هى مازالت للاسف تمارس بعد الثورة وده شئ مشين جدا جدا ثالث حاجة هما وضحوا لينا حاجة مهمة جدا عن المجلس العسكرى وقال واحنا وثقنا فى كلامهم حينما قالوا ان مصر بحزم كما تحدثوا معنا قالوا ان هما لم ولن تسير فى اتجاه دولة دينية وده احنامطمنين بس نتمنى نتمنى ان الكلام ده نراه على ارض الواقع فى عدالة ناجزة ضد منتهجى حقوق الاخر
هالة ابو علم : يعنى احنا بنرحب بالاستاذه الدكتورة منى مكرم عبيد عضو مجلس امناء الثورة اهلا بيكى يا دكتورة منى
منى مكرم عبيد: اهلا بيكى يا ستى
هالة ابو علم : اهلا بيكى دكتورة منى احنا يعنى كشعب مصرى بنواجه معضلة شديدة جدا احنا عايزين نبتدى ندى عايزين مصر تطلع عايزين مصر تتقدم احنا عندنا طبعا مطالب كثيرة جدا خصوصا مطالب خاصة بالاجور يعنى المطالب الفئوية المطالب الفئوية ما بتهداش احداث الفتنة الطائفية ما بتبطلش الامن بيرجع ولكن الامن بيرجع ولكن ببطء شديد بعض الشئ ولكن يعنى احنا شفنا امبارح تخريج دفعة من كلية الشرطة علشان المساهمة فى استتباب الامن فى مصر ازاى نقدر نوازن بين منظومة الامن ومنظومة الاقتصاد عشان نشوف مصر مرة ثانية بتوضع على مصاف الدول الكبرى لان هى تستحق هذه المكانه بالفعل
منى مكرم عبيد: احنا دلوقتى الحقيقة بتكلم اكثر على اللى حصل فى امبابة عشان ده يعنى نتيجة الكبت ونتيجة النظام الفاسد اللى كنا بنعيش فيه لمدة 30 سنة ده كلة بيطلع دلوقتى كل حاجة بتطلع دلوقتى ولكن محدش يقدر يتجاهل مشاعر الغضب اللى فى صدور الاقباط منذ سنوات مش انهارده بسبب الحوادث اللى بتحصل والاعتداء عليهم ولم تواجههم ولا ماضيا ولا حاضرا برد فعلى رسمى وشعبى عادل وحازم وكانت التحقيقات التى يعلن عنها بعد كل حادثة وبعد الحادثة دى بردوا تختفى بمرور الوقت وتطوى صفحة الجريمة بدون حساب او عقاب ولاشك ان التعامل مع حرق كنيسة امبابة باعتبارها زى ما بيقولوا من تدبير الثورة المضادة هو اصرار الحقيقة على تمديد تجاهل مشكلة الاقباط فا تكريس هذا وتكريس مشاعرهم فى الغضب هما بيعتقدوا انهارده ان النظام السياسى سابقا وحاليا يتعامل مع الاعتداءات التى يتعرضون لها بغموض التحقيقات وتسامح غير مفهوم وغير مبرر
هالة ابو علم : لكن يا دكتوره منى حضرتك مش شايفة القانون بياخذ مجراة فى القبض على مثيرى الشغب القبض على مثيرى الفتنة القبض على من قاموا باحداث امبابة تم القبض عليهم وتحويلهم فعلا للنيابة
منى مكرم عبيد: ايوا بس هو لابد انهارده من موقف تثبت فيه الحكومة ان حماية الاقباط هى جوهر حماية السلام الحالى يجب ان يشعر المسيحيين فى مصر انهم جزء اصيل من هذا الوطن ولابد من لجم تلك المشاعر مش كفاية نمسك الناس بعد ما الحريقة تحصل لجم الناس لجم تلك المشاعر المنحرفة والطارئة ضدهم وفى نفس الوقت جزء من حماية صورة الاسلام من التطرف والمتطرفين عشان كده انا انبسطت قوى من المليونية الحقيقة ده دليل على اهمية المشاركة المجتمعية الجاده بكل الادوات المتاحة
هالة ابو علم : طيب يعنى دكتور منى بردوا يعنى حضرتك ليكى حق فى كل اللى بتقولية اكيد طبعا وده حق
منى مكرم عبيد: الايجابى دلوقتى ان فى ارتفاع فى الوعى السياسى عند الجماهير على امتداد الجمهورية مش بس فى القاهرة والسويس والاسكندرية ضد الفتنة الطائفية فده كويس يعنى
هالة ابو علم : ايوا احنا بنتفق معاكى فى ان كل فرد بيعيش على ارض مصر من حقة تماما ان هو يشعر بالامن ويشعر ان الدولة بتحمية بيشعر ان الدولة حاسة بيه وبمشاكلة وان هى لازم توفر له كل الحلول الممكنة لكل هذه المشاكل لكن احنا بنتكلم يا دكتور منى هل ممكن ان احنا يعنى فى ظل هذه المشاكل الكبيرة والصعبة ممكن نطلع ادام خطوه يعنى ممكن نشتغل شوية ايه اللى ممكن نعملة يعنى ممكن نشتغل ونحل مشاكلنا لكن هل لازم الاول نحل المشاكل وبعدين نشتغل والا
منى مكرم عبيد: دى مش مشاكل
هالة ابو علم : والا ممكن نعمل الاثنين فى نفس الوقت
منى مكرم عبيد: دى مش مشاكل دى جريمة حصلت لازم يكون فى تحقيق لازم المجرم يحاسب ده فى الاول عشان ان نقف الجرائم اللى بتحصل ضد دور عباده اوضد مسيحيين اوضد ناس مختلفين فى الرأى الى اخرة عشان نعرف ايه نكمل
هالة ابو علم : يعنى حضرتك بتشوفى ان احنا الاول نحل المشاكل وبعد كده نشتغل
منى مكرم عبيد: مش مشاكل انا باقول مشكلة ما بقولش كل المشاكل اللى لازم تتحل لكن لما فى مشكلة بالوسع ده بالناحية يعنى دى جريمة مش مشكلة ما بنقلش نحل المشاكل احنا بنقول نعمل تحقيقات فى الجريمة واللى هما سبب هذه الجريمة لازم يتحاكموا بس
هالة ابو علم : يعنى طبعا ليكى كل الحق يا دكتورة منى ان تطلبى هذا الطلب اكيد طبعا انا باشكرك على مشاركتك معانا فى هذه الحلقة واتمنى ان فى خلال الفترة القادمة باذن الله ان يتم الاستجابة لكل الطلبات ويتم ايضا محاكمة كل من يتسبب فى ازاء او اهانة اى مصرى سواء كان مسيحى او مسلم هذا امر غير مقبول تماما على ارض التسامح وارض سماحة الاديان وارض الانبياء فاصل يقصير نعود بعده لنلتقى معكم من جديد
هالة ابو علم : اهلا بكم من جديد واتجاهات معنا المهندس كميل حليم رئيس التجمع القبطى الامريكى سؤال يعنى يهم الكثير ان هما يسالوة مبدأ استعداء الاخر يعنى او الاستقواء بالاخر يعنى ومسالة المسيحيين البعض منهم بيقول هنلجأ للخارج طالما مصر مش قادرة تحل مشاكلنا طالما مصر مش قادرة تقف جنبنا خلاص احنا نروح للخارج ونستقوى بالاخر هل المبدأ ده حضرتك شايفة مقبول
كميل حليم :ان المبدأ ده مش مقبول ده نكتة يعنى هقول لك يعنى احنا نتصور ان نطلب الجيش الامريكى يجى دلوقتى ويدخل امبابة نتصور كده العساكر الامريكانيين دخلين حوارى امبابة واحد ورا الثانى والدبابات الكبيرة اللى هى عرضها 50 متر تدخل فى حوارى امبابة وهتضرب مين يعنى تعمل يعنى مبدأ عملى مش ممكن ومش محتاج ونهايتة هتكون نهاية مؤسفة جدا للبلد هنبقى زى العراق يعنى وتتحول من حرب اهلية تتحول الى حرب بين الامريكان وبين مصر احنا عايزين حماية من مصر من الشعب المصرى اللى هو اثبت ان هو لو القوى الخارجية لما تدخل وتوقع بين المسيحيين والمسلميين مصر مفهاش مشكلة المشكلة عندنا احنا فى ايادى بتيجى من برة عشان تبوظ الثورة وبتدخل تعمل لحظات وحاجات تهيج شعور بعض الناس المتعصبين يقوموا بالكلام ده مش احنا السلافيين بطلعوا بالجماعة بيقولوا ايه بيقولوا كلام مصر كله بترفضة المسلمين والمسيحيين والمسلمين بيرفضوه قبل المسيحيين واحنا لما نقول ان السلفيين لما بيطلعوا من الجامع ويهجوا ده المسلمين ده ضغائن طبعا
هالة ابو علم : طبعا ده امر مرفوض بس حضرتك العنف والارهاب مسالة مرفوضة من المجتمع المصرى لان هو مجتمع اساسا قائم على التسامح عمر ما كان عندنا ارهاب او عنف من اى
عنصر من العناصروبالتالى المسائل دى مرفوضه تماما فى حوار فى اى انسان او اى شخص له مطلب معين ممكن يلجا لاسلوب حوار قانون يعنى لكن العنف والارهاب مسالة مرفوضة
كميل حليم : وبعدين الناس المتطرفين دول بعد ما هيخلصوا العمل هيطلعوا المسيحيين مش هيروح المسلمين ويورونا الامثلة بتعتهم كانوا عايزيم يروحوا يهدوا الاضرحة ويحرموا المسلمين من موالد ده كله كلام مرفوض فى مصر احنا عندنا الثقافة بتعتنا وعندنا التاريخ بتعنا ومش هنخلى الناس المتطرفين يدخلوا يعملوا زى احنا لا نحتاج ان حد من برة مصر يدخل وانا كنت فى واشنطن وقابلت ناس كثيره فى واشنطن ولا هما مهتمين باى احنا مشاكلنا لازم نحلها بنفسنا محدش هيحلها لنا
هالة ابو علم : طب استاذ مدحت معلش انا هسال بردوا سؤال اخر البعض عايز يعرف الاجابة عليه يعنى مسألة ان فى 14 قناة فضائية مملوكة لاقباط او مسيحيين يقيمون فى الخارج بعض هذه القنوات الفضائية يعنى بيطالب بعضها بطرد المسلمين مثلا من مصر وان هما يرحلوا الى الجزيرة العربية وده على فكرة بردوا هنلاقى بعض القنوات الفضائية الاسلامية بردوا اللى ليها بردوا مطالب بعض الشئ ايه رايك حضرتك فى الكلام اللى بيقال عبر الفضائيات يعنى وفى النهاية حتى هو لو كان مقبول او مرفوض لكن يمكن يجد صدى عند البعض يعنى ايه خطورة المسالة دى
مدحت قلادة : اولا انا هعلق على كلمة السؤال اللى وجهتية للاستاذ كميل حليم ان هو كنت فى مؤتمر لاحد القنوات التليفزيونية حينما تاتى اى دبابة اول من سيصد قذائف الدبابات بصدرة هم المصريين الاقباط والمسلمين معا دى بلا شك ثانى حاجة احنا ضد حاجة اسمها التدخل الاجنبى دى 100% ثالث حاجة بالنسبة للقنوات التليفزيونية حضرتك احنا طبعا ضد الاساءة للاديان شخصيا احنا ضد الاساءة دى لكن تخيلى بردوا حضرتك انا ارفض رغم انه كان بردوا ارفض لان ما حدث بردوا انا اسف للكلمة رد فعل رد فعل احد الشيوخ المحترمين فى القوات الفضائية يخرج ويقول هذا ليس كتابا مقدس وتلاقى ايه لما يجى حد يهاجمة تلاقى احد اعمدة الاسلاميين فى مصر يقول الراجل بتكلم بالمنطق عايز اقول لحضرتك احنا بنرفض هذا الحديث ونرفض فكرة الاديان الاديان ليس لها خطأ ولكن الخطأ فى التدين فى فهم الدين يقف احد شيوخ المسلمين هنا فى مصر منذ اسبوعين فى القنوات التليفزيونية ويقول نحن الاسلام يحمى المسيحيين طبعا الاسلام نحن الاسلام يحمي المسيحيين فهم اهل ذمة لنا قلت له الف شكرا ليك بس انا ارفض هذا الخطاب فنحن ليس اهل ذمة نحن مواطنين لنا نفس الحقوق كما لك انت ومن يضمن حقوق المصريين ليس الاسلام ولكن الدولة هذا ما نريد ان نؤكد علية
هالة ابو علم : يعنى حضرتك بتؤكد بردوا على فكرة الدولة المدنية وليس الدينية
مدحت قلادة : الدولة المدنية
هالة ابو علم : اه يعنى الدولة هى تضمن حقوق المواطنين سواء مسيحيين او مسلمين
مدحت قلادة : القوية القوية وزى ما قالت الاستاذه منى مكرم عبيد الدولة القوية بالعادلة الناجزه يعنى احناعايزين
هالة ابو علم : طيب يعنى هستاذنك يا استاذ مدحت وهنتحول للاستاذ سامح فوزى الباحث والكاتب الصحفى استاذ سامح اهلا بحضرتك معانا
الاستاذ سامح فوزى: اهلا بحضرتك
هالة ابو علم : استاذ سامح يعنى هل اللى عايز اناقشة مع حضرتك مسألة بتطلع بعض الخطابات والدعوات تدعو لتقسيم مصر ايه خطورة هذه الدعوات ايه خطورتها على وحدة النسيج الوطنى ايه خطورتها على الامن القومى ايه خطورتها على مصر المستقبل ايه خطورتها على مصر 25 يناير
سامح فوزى : يعنى دلوقتى احنا فى البداية احنا محتاجين نتفق على مر اساسى لانه ورد فى اكثر من نقطة حضرتك اثرتيها فى النقاش حول هذا الموضوع هناك فارق مابين اتجاه عام داخل المجتمع سواء ان كان من مسيحيين او مسلمين يتحدث حوالين قضايا هناك هوامش صوت هنا صوت هناك واحد متطرف هناواحد متطرف هناك المشكلة ان الاعلام بيلقى مزيدا من الضوء حول هؤلاء الاشخاص ويعلى من شان خطاباتهم لتصبح الخطاب الرئيسى انا عايز اسال حضرتك سؤال من الذى يطالب بالتدخل الاجنبى انا عايز اعرف اسماء هؤلاء الناس من الذى يطالب بتقسيم مصر ومن الذى طرح هذه الرؤية انا ما سمعتهاش قبل كده يعنى انا باحث فى شئون المؤتمر
هالة ابو علم : هى ذكرت فى الصحف يعنى هذه الاخبار اثيرت فى الصحف
سامح فوزى : مين اللى قالها ما هو انا بردوا يعنى ما احترامنا الشديد لما بنشر فى الصحف مين اللى قال هذا الكلام انا اخشى ان احنا نطرح كذبا ونصدق الكذبة دى ونعيش على هذا الموضوع اولا انتى بتتكلمى على دولة مركزية قوية موحدة منذ الالاف السنين لا تقبل هذا الانقسام التداخل الجغرافى والتداخل المصلحى والتداخل المعيشى بين كل مكوناتها لا يسمح بمثل هذا الانفصال حتى ولو كانت هناك خطة لهذا الانفصال فاذن احنا بنتكلم حوالين فرضية غير قائمة ونروجها واذا روجها احد اوذكرها احد يصبح فى عداد الموتورين فى وجهة نظرى انا
هالة ابو علم : ماهو ايوا يا افندم يعنى استاذ سامح دلوقتى هذه الدعوات بتطلع احنا لا نشكك فى وطنية اى مصرى مسيحى مسلم يقيم فى الداخل يقيم فى الخارج لا نشكك فى وطنيتة ولكن بردوا ما نقدرش ننكر لبعض المصريين المقيميين فى الخارج هما اللى اطلقوا هذه الدعوات حتى ولو كانوا قلة لكن هذه الدعوات ظهرت منهم ونشرت فى الصحف
سامح فوزى : نحن لسنا فى مجتمع ملائكى انت بتتحدثى عن شخص بعينة بيبعث ايميل هنا وهناك فا الناس بتلتقط هذا الايميل وتعتبره قضية احنا بنتكلم على اتجاه عام اولا المصريين فى الخارج سواء كانوا اقباط و مسلمين دول ناس اكثر وطنية مما نحن نتوقع وانا اعرفهم تلامست معهم كثيراوعايزين يشاركوا فى نهضة بلادهم وشاركوا قبل هذا فى نهضة بلدهم وعايزين يشاركوا فى التصويت فى الانتخابات عايزين يندمجوا ويرفعوا من شان هذا البلد على الصعيد الثقافى والسياسى والاقتصادى فا احنا لابد ان نحترم هذا دى اول حاجة دى نقطة النقطة الثانية
هالة ابو علم : بكل تاكيد طبعا فى كل مجتمع انت بتتكلمى على 85 مليون شخص اذا قبلت الدعوة من واحد هنا او واحد هناك يعنى انا دائما عندما نتحدث فى السياسة نتحدث عن الاتجاه الرئيسى او الاتجاه الموجود فهل هناك حزب فى المجتمع المصرى يطالب بهذا هل هناك جمعية اهلية بتطالب بهذا هل هناك تجمع هل هناك نقابة هل هناك كنيسة هل هناك مسجد اذن لا يوجد تنظيم يطرح مثل هذا الكلام اما شخص موتور لميت انهاردة الاشخاص دى احنا بنسمع انهارده كلام كثير فى اتجاهات كثير بنسمع عن واحد سلفى يقولك عايز اهد الاهرمات واهد ابو الهول بنسمع كلام على مواقع الانترنت وبنتفرج على قضايا مضحكة جدا لو احنا توقفنا اما مثل هذه القضايا يبقى احنا بنضيع وقتنا ونعطى وزنا لمثل هذه الاراء الاتجاه الرئيسى فى المجتمع المصرى اتجاه يريد دولة قانونية قائمة على المواطنة تعطى الحقوق والحريات للمواطنين
هالة ابو علم : استاذ سامح انا طبعا شاكرة لحضرتك ان انت ركزت على هذه النقط لكن السؤال الاساسى فى هذه الحلقة ازاى نبنى مصر قولى بقى حضرتك ازاى نبنى مصر
سامح فوزى : يعنى هو طبعا سؤال وجيه جدا اولا نبنى مصر يعنى احنا زى ما بيقولوا احنا لا نخترع العجلة يعنى هناك دول سبقتنا ولها انجازاتها المعروفة اولا بناء المجتمع المصرى بدولة قانونية حديثة اولا تقوم على حكم القانون الذى يقوم على المساواة وتطبيق القانون على كل المواطنين بصرف النظر عن اختلاف الجنس او اللون او الدين اوالعرق دوله تقوم على المساواه بين كل مواطنيها دولة تقوم على اتساع نطاق المشاركة والعدالة الاجتماعية للقطاعات الواسعة فى المجتمع ولكل المواطنين ودوله تقوم على المسألة والشفافية يدفع كل مسئول كشف حساب عما يقوم به من اعمال
هالة ابو علم : طب انا هسال حضرتك سؤال اخير قبل ما نختم المكالمة التليفونية معاك وحوارنا معاك لانه لم يتبقى لدينا الكثير من الوقت هسال حضرتك سؤال وارجو ان انت تجاوبنى عليه الدستور اولا والا انتخاب الرئيس اولا والا انتخاب برلمان اولا حضرتك رتب لى اولويات المرحلة اللى جاية لمصر دستور والا رئيس والا برلمان
سامح فوزى : اولا هناك مسار موضوع ان هناك اعلان دستورى ثم برلمان ثم دستور ثم انتخابات لكن انا مثلا واعتقد ان هناك كثيرين شاركونى من القوى الوطنية كنا نتمنى ان يوضع دستور يؤسس لمصر الجديدة بعد ثورة 25 يناير وتجرى على اساسة انتخابات برلمانية وانتخابات رئاسية ربما نتصور ان هذا مسار طبيعى لبناء مجتمع ديمقراطى حقيقى داخلى انشاء الله
هالة ابو علم : نعم اشكرك شكرا جزيلا استاذ سامح فوزى الباحث والكاتب الصحفى ونخرج مشاهدينا لهذا التقرير ونعود مرة اخرى نستكمل الحوار
فاصل
مواطن : احنا عشان نبنى مصر المفروض زى ما بنقول نبتدى نشتغل نبتدى نبعد عن السلبيات نبرز الايجابيات علشان ناخد تبقى ادمنا كمنهاج نمشى وراه نبعد عن الشائعات نبتدى يبقى لينا كبيير زى ما بيقولوا مجلس اعلى رئيس وزرا بدون ما نجرح فى كل حد فى دوت او فى دوت الناس دى عاوزه تشتغل واحنا وراها عشان نشتغل وهما يشتغلوا يبقى لازم نديهم فرصة
مواطن : نبنى مصر بتكاتفنا كلنا مسلمين ومسيحيين مثقفين وعمال وكل الفئات عشان نقدر نعمل نرجع للعمل ونعود كل حد ليه شغلة وكل حد له صنعة وكل حد لعملة فى اى مجال من المجالات
مواطنة : مش كل حاجة تحصل نلاقى مجموعه عاملة اعتصامات ونوقف الدنيا ونوقف الطرق ونوقف الطرق ونوقف الموظفين كل ده
مواطن : ناس اتظلمت كثير ماشى بس مش هتتحل بين يوم وليلة هى بس شوية وقت شوية صبر كل حاجة تبقى زى الفل بس كل واحد يشوف شغلة كل واحد يعمل اللى علية انشاء الله مصر تبقى زى الفل باذن الله
مواطن : نبقى ايد واحده مفيش حاجة اسمها مسلم ومسيحى احنا مسلمين واخواتنا بردوا مسيحيين نبنى مصر بالحب وبالخير
مواطن : كلنا نهتم بمصر ياجماعة مصر بتتهزم ولازم ان احنا نتعاون ونتكاتف مع بعضينا لازم الناس كل اشغالها تخلص فى عملها
فاصل
هالة ابو علم :لازم مصر تعود مرة ثانية بابناءها لازم مصر تعود مرة ثانية تنتج لازم مصر تعود مرة ثانية تصدر لازم مصر تعود مرة ثانية تتصدر المشهد السياسى فى منطقتها منطقة الشرق الاوسط فى المنطقة العربية فى المنطقة الافريقية كل ده مش هيجى بالساهل اللى جاى صعب لكن نقدر نبتدى والا ايه راي حضرتك مهندس كميل
كميل حليم : انا فى نقطة مهمة جدا عايز اقول عليها احنا قلت فى الاول الطائفية وخلاص مش هنتكلم فيها ثانى الموضوع الثانى موضوع الاقتصاد المصرى اللى هو من سنه 62 لحد انهاردة مشى بطريقة وصلنا لدرجة انه مصر دلوقتى فيها 15%ما بيشتغلوش و50% بيشتغلوا ببلاش بيشتغلوا بمرتبات تحسب فى اى اقتصاد عالمى ما بيخدوش مهيات يعنى الراجل اللى بياخد لحد 1500 جنية ده حوالى 250 دولار بيشتغل وبعدين بيشتغلوا ببلاش مفيش جمع ضرائب للبلد فا البلد
هالة ابو علم : انا عايز اسال حضرتك عشان ادمنا يعنى دقائق معدوده ايه اللى نقدر نعملة انتوا انتوا تقدروا تعملوا ايه برة تساعدوا مصر ازاى
كميل حليم : مصر لها حل واحد
هالة ابو علم : ايوا مصر اللى عايشين فيها انهاردة دى اتبنت سنه 1840 بالخديو اسماعيل بعد كده قامت الحرب العالمية الانجليز جم قامت الحرب العالمية الاولى والحرب العالمية الثانية وقامت الثورة وبعد كده ومفيش بنية فى البلد الاصلية فامصر دلوقتى عايزة بنية عايزة موانى عايزه طرق عايزة تحديد عايزة مدن جديدة عايز يتحط فيها قبل ما تقدر تنافس الصين تركيا والا حاجة اننا نعمل بنية بنية اساسية لمصر عشان نرفع المرتبات بتاعت الناس الى فى البلد هنا من 200 جنية ل 2000 دولار
هالة ابو علم : استاذ مدحت يعنى وجهة نظرك ورؤيتك للفترة اللى جاية ازاى تقدروا تساهموا فى بناء مصر الحديثة بعد 25 يناير
مدحت قلادة : احنا لهذا الامر جينا فعلا وعايز اقول لحضرتك ان فعلا بحثنا مع منظمات تنموية فى واحد جايب احد اعضاء الاتحاد جاى بمشروع اقول لحضرتك عشرات المليونات من مئات المليونات من الدولارات وراح قابل عدد من الاخوة اللى هو شركات المقاولات وفى واحد جاب مشروع بردوا SICALING متكلف حوالى 200 مليون دولارعايز اقول لحضرتك فعلا اذا كنا بنتكلم عن الطائفية او او احنا يهمنا دولة القانون احنا بنشتغل هقول لحضرتك ما بنتكلمش بس احنا بنعمل
هالة ابو علم : هل فى فكر حضرتكوا هل احنا محتاجين مؤتمر كبير للمسيحيين بلاش المسيحيين للمصريين المقيمين فى الخارج مؤتمر كبير يكون هدفة الاساسى هو يعنى بناء مصر مرة اخرى بناء مصر المستقبل كل واحد يقدر يساهم باية يعنى ممكن واحد يجيب مثلا دورات مجانية دراسية لابناء مصر مثلا المتفوقين فى ممكن يقيم مشروعات اعلامية يعنى الاعلام انهاردةواحنا بنتكلم علية محتاج علشان يقوم محتاج فلوس محتاج مادة محتاج اقتصاد ممكن يساهم فى مشروعات صناعية يعنى هل بتعتقدوا ان احنا محتاجين مؤتمر كبير يضم كل الافكار ويضم كل الرؤى المصريين الموجودين فى الخارج
كميل حليم : هقول لحضرتك بعد الثورة العالم كلة مش المصريين اللى فى الخارج ماسك دفاتر الشيكات والقلم وعايزين يدوا فلوس لمصر العالم الغربى كلة مصر الاعجاب بتاع العالم كلة وصل لدرجة الاتحاد الاوروبى عايز يدينا معونات فلازم تتعمل خطة لنباء مصر ده اللى احنا بنقول عليه وده هيكون فيه بلايين الدولارات ودى ممكن القروض ليها نوعين قروض اللى هى احنا بنعملها دلوقتى بناخذ فلوس علشان نشترى قمح دى مش كويسة القروض دى عايزين قروض نستثمر بيها بتجيب عائد فا العالم فيه القروض موجوده والفلوس موجودة بس لازم نعمل الخطة لبناء مصر عشان توصل تدخل فى العالم المتمدن احنا بلدنا مش مستعدة دلوقتى تنافس الصين تنافس كوريا تنافس تركيا لازم نمهد بلدنا تنافس احنا مش عايزين المصريين احنا عايزين فورد يجى يفتح مصنع هنا عايزين جنرال موتورز تيجى تفتح فى مصر ومش هيجوا لما مفيش تعندنا مينا معندنا ش كهرباء معندناش طرق معندناش ميه معندناش كبارى فبناء مصر اهم حاجة نجيب الخبرات المصرية لازم نبتدى نغير فى تفكيرنا نجيب الخبرات الاجنبية
هالة ابو علم : ايوا يعنى انا باشكرك جدا مهندس كميل حليم رئيس المجمع القبطى الامريكى وباشكر حضرتك الاستاذ مدحت قلاده رئيس اتحاد المنظمات القبطية باروبا وباشكر حضوركوا للبرنامج وباشكر وجودكوا معانا ومساهماتكم من اجل بناء مصر مرة ثانية مشاهدينا الكرام اشكركم على حسن المتابعة ونلتقى غدا فى اتجاهات الى اللقاء