عبد المنعم حسين يكتب: موت نبى

محتار يا ابنى بالأمانه
اعلمك حب الوطن
والحق ..
ولا لأ
واسيبك عايش كماله
اعلمك
ولا على ايد العسكر
ح تلقى الشهاده
أو تفضل عايش
موصوم بالخيانه
مهو حب الوطن مغامره
فى بلاد الحُكم الواحد
حكومات البطش السجانه
ولما يكتر الزيف
يبقى قول الحق إهانه
وف وسط الجهل
يبقى السهل
تمشى مع الرايجه
وتخبى الأمانه
والرايجه ظُلم
وظلام وعتامه
حب الوطن حلو
لكنه بيكره العقول الجبانه
قول الحق جميل
لكنه يعشق النور
اللى يكشف شقوق الحاره
هى مغامره
وسط حكومات البنادق
والزنزانه
هى مغامره
مش مؤامره
هى رساله
وأمانه
يحملها منا الأنقى
وما يقدر عليها إلا رُسل
مليها الخير
وحب الغير
وهبت نفسها للعزه والكرامه
لحياة العدل
كما أرادها ربنا
فى كل الرسالات
ولأى ديانه
اعلمك ولا كفانا
دم وتعذيب ومهانه
اظنك يا ابنى اتعلمت
وعرفت انك تموت نبى
ولا تعيش فى جَبَّانه
واهلاً بالشهاده
على ايد مرعوشه جبانه
ايد تخافك يوم الحق
تتوسل لك يوم القيامه