شباب بلطيم يتهم المجلس العسكرى وقيادات المحافظة بالتباطؤ لحل أزمة بلطيم

اتهم شباب بلطيم قيادات المحافظة والمجلس العسكرى بالتباطؤ فى حل المشكلة التى ظهرت بوادرها يوم الثلاثاء قبل الماضى منذ الاشتباكات بين أهالى بلطيم وقرية سوق التلات على خلفية اصطدام توكتوك بسيارة ميكروباص من قرية سوق التلات واشتعل الموقف سريعا ليخلف بعده ثلاثة قتلى وعشرات الجرحى وحالة احتقان وتوعد بين البلدين وفى شهادة من رجب البنا أمين حزب "الحرية والعدالة" بكفر الشيخ.
قال : قمنا بالاتصال بمحافظ كفر الشيخ، ومدير الأمن إلا أن كليهما لا يرد على كافة الاتصالات من الهيئة العليا بالحزب.
وأضاف: "حاولنا الاتصال بهم مرارًا وتكرارًا لاتخاذ أي إجراءات للسيطرة على الموقف ولكن لا توجد أي استجابة لوقف هذا الوضع المتدهور، مما دفعنا للاتصال بقيادة الحزب في القاهرة، وذلك لتدخل وزارة الداخلية مباشرة للقيام بمهامها في حفظ الأمن واستقرار الوضع".
وحمل حمدين الصباحى فى أحد تصريحاته المحافظ واللواء حسن الروينى قائد المنطقة الشمالية مسئولية الأحداث نتيجة تباطؤهما المتعمد فى إرسال قوات لحفظ الأمن ووأد الفتنة.
وفى شهادة لمحمد السادات أحد شباب بلطيم الشاهد على الاحداث يروى فيها مشاهدته لدور الشرطة المتخاذل والمتواطىء فقال يوم الحادث عرفت أن ناس كتير ماتت الغرب وأن فيه مواجهات بالذخيرة الحية بين سوق الثلاثاء وبلطيم كلمت الشباب وقابلونى ورحنا الغرب لقينا صوت رصاص حى مالى الدنيا من قبل ما نوصل وبنسأل قالولنا ان يتوع سوق التلات محتلين عمارة " عرفت انها بتاعتهم اصلاً " وقاعدين فوقها يضربوا نار فى كل اللى يظهر فى الشارع - الناس كانوا كتير جدا ورايحين للمستشفى علشان الإصابات اللى هناك قلنا نروح الأول نشوف ضرب النار وموقف الشرطة ايه دلوقتى خصوصا اننا عرفنا بإصابة المأمور "المحترم" حسام سعده وفوجئت لما وصلت المكان أن مفيش ولا عسكرى شرطة ولا عسكرى جيش كنا حوالى الساعة 2 ونص وقفنا شوية وضرب النار متقطع وكان فى شباب من بلطيم معاهم سلاح عادى " بيسموه فرد خرطوش " كل شويه فرقعات وشفت اتنين بيتشالوا داخلين المستشفى المهم رحنا ندور مع مجموعة من الشباب على بتوع الشرطة علشان نشوف هما بيعملوا ايه ولو نقدر نساعد فى فض الموقف وصلنالهم بأعجوبه بعد استدلال من الأهالى على مكانهم لقيناهم أبعد ناس عن موقع الحدث واقفين على أول الطريق الدائرى تقريباً وعربيات الأمن المركزى 6 عربيات واقفه والعساكر قاعده جواها وعلاء البراوى رئيس المباحث كل شويه ماسك التليفون ويروح فى جنب ويرجع تانى حاولنا نضغط عليهم بالشد والشتيمة اكتر من مرة وبكل برود كان بيوطى فى الأرض وخادنى على جنب قالى والله ما فى سلاح ولو فى سلاح كنت هتلاقينا واقفين ونجيبهم من رقبتهم وانتوا شفتوا اننا كنا شايلين ارواحنا على كفوفنا من امبارح علشان نطلع المخطوفين فى النهاية اصطدم مجموعة الشباب اللى واقفة معاهم بالشتيمة بدون رد ولقيتهم فجأة كل العربيات بتاع الأمن والمدرعة بيجروا لناحية البلد ففكرت ان قوات الجيش وصلت زى ما بيقولوا من ساعة ما رحت وقلنا كدا ان شاء الله الدماء اتحقنت وربنا فرجها من عنده - رجعنا لمكان الضرب لقيناهم مشوا بعد ضرب نار فى الهوا وطلعوا من على الطريق الدولى وانسحبوا من المكان وساعتها دخل الناس شققهم اللى فوق معرض عبدالتواب سويدان وولعوا فى المعرض وفضوا كل حاجه فى الشقتين اللى فوق المعرض وولعاو فيها وفى عربية ادام المعرض وفضل الحال على كدا لحد دلوقتى كل ما هو مملوك " أو شبه مملوك " لحد من سوق التلات فى بلطيم يدخل الناس يكسروا وينهبوا بدون تفكير.
جدير بالذكر أن الوضع في كلا من سوق التلات وبلطيم يجري فيه بوادر صلح بين البلدين وكان اللواء أحمد زكي عابدين محافظ كفر الشيخ التقي بكل طرف علي حده واستمع إليهم ووعدهم بتعقب الجناه ومثيري الشغب وتعويض أسرة كل متوفي خمسة الآلاف جنيه من صندوق الخدمات بالمحافظة وعمل حصر لكافة المصابين وصرف اعانات فورية لهم من التضامن الاجتماعي .
وأخبار غير مؤكد تشير إلى حضور الداعية الإسلامي محمد حسان والدكتور صفوت حجازي للصلح يوم الجمعه القادم إلا أن الخوف مازال يسيطر على البلدين وبلغت نسبة الحضور فى المدارس 5% خاصة مدارس الدبلومات الفنيه والثانويه العامه الموجودة فى بلطيم.
كما تماثل للشفاء عدد من المصابين وخرجوا من مستشفى بلطيم المركزى و مستشفى كفر الشيخ التى لم يعد بها سوى أربعة حالات أجريت عمليات عظام لاثنين منهم و قام المحافظ بتحويل عدد من الحالات الى مستشفى القوات المسلحه بالاسكندريه نظرا لاحتياجهم إلى رعاية صحية وأجهزة طبيه لا تتوفر بالمحافظة.