عبد المنعم حسين يكتب: فى أنهى زنجة

يا ترى
مستخبى فى أنهى زنجه ؟
وسط الصراصير فى المجارى
ولا بين الجرزان فى الزباله
ومتدارى بخَرقه
آيه وعبره
طرشك صوت الحق
عماك نور الثوره
حوطتك نسايم الحريه
وخنقتك خنْقَه
آه يا سنين الضلام
مهما دُمتى
فى عمر الشعوب لحظه
آه يا حكام الطغيان
مهما قويتم
عروشكم هشه
كما البعير
تقصمها قشه
اصل الشعوب تقومها كلمه
وحصون الظلم
تهدمها صرخه
وكلمة الحق ما يتقال لها لأ
وهى الحاكمه والطاغيه
ويا ترى انت فى انهى دار
ولا فى انهى زنجه