أماني سعيد محفوظ تكتب: هنا مقص وهنا مقص

هنا مقص وهنا مقص
راسي تقلت م الهموم ..
كل ساعة وكل يوم..
فيه جديد عليه بقوم
مره حرب..
مره ضرب..
مره ناس حالتها كرب
مِيت مظاهرة واعتصام..
جات لي حاله م الفصام
نار..مدافع..ارتطام..
خط فقر مالوش فطام
الغيوم فوق راسي تشتي..
وان مشيت علي طرف مشطي
ع العجين مالخبطوش
لطم نازل ع الوشوش..
قوللي مين عنك يحوُش
بختي ساكن فوقه بوم..
أصلي عاطل ف العموم
مهما أدرس من علوم..
الختام طابور بطالة
ع اللي زيي ميت مقالة..
غاوية تشتم لما تختم
مرة فينا وف الوزارة
تبقي الدنيا واسعة جداً..
فجأة تضيَق تبقى حارة
ناس تبات ع الرصيف..
أو تموت عشان رغيف
شئ مخيف إنك تدقق..
أو تحقق عيش خفيف
شفت ناس ف قصور بترمح..
غيرها عايش ف الكنيف
والظريف إن العلالي هيّه حال المليانين
والزبالة شكل حالة للي عايشين شقيانين
إنت فيهم تبقي مين؟
شخص تحت..
عيشته فحت..
ولّا مَيت موته بحت
كله عادي..
نهارنا نادي..
طظ فيّه وف ولادي
بُص بَص..
عيشه قَص..
كُلها كامله وسيب لي فص
هنا مقص وهنا مقص..
إحنا عرايس وبتترَص