الزومبي

مخنوقة وحاكتب بالعامية. مافيش نظام يتمتع بهذا الكم من التواطؤ العالمي لصالحه: عمال المحلة يضّربوا بالرصاص والضحايا يتحبسوا ومافيش مخلوق عبرنا، يقفلوا الحدود علي غزة، والعالم يدين إسرائيل وحماس وما يجيبوش سيرة مخالفة النظام المصري للقانون الدولي، مرسيدس تتفضح وتيجي لحد النظام المصري وتقول «اللي بين الراجل ومراته ما يطلعش بره»، يتخانقوا مع كل محيطنا وحيموتونا من العطش بمناكفتهم لخلق الله وما بقيناش عارفين أنهي حتة في البلد لسه ما اتباعتش وماحدش يقولهم حرام عليكوا الغلابة دول، افرض الشاري طردهم، حيروحوا فين طاه؟ يعيّدوا علي إسرائيل ويتهمونا بالعمالة.
مستر إكس مالوش نهاية، والعالم بيساندهم ضد الشعب: منظمة العفش الدولية، ومنظمات حروق اللسان، والأمم المنتحرة، وأوباما، وأوروبا. المصريين بايتين في الشارع عشان عيش من غير غموس، ودول بيرقعوا بالصوت علي المعارضة الإيرانية.
مالهم؟ عندهم انتخابات - مزورة ولّا صحيحة، احنا لاقيين؟ - وما عندهمش طوارئ، ونسبة الفقر 18% - يا عيني علينا اللي نسبة الفقر 45% ده احنا جمل - والأمية صفر، ونجاد حيمشي بعد أربع سنين، إيه البوليكة اللي عملوها دي؟ وفي النص راحوا شاتمينا، هو احنا بقينا ملطشة؟ معارض إيراني يقول في الجزيرة: احنا مش زي العرب احنا شعب ذكي، وواحد يكتب: نجاد والملالي عملاء للعرب والسنة، ويطلعوا في المظاهرات يشتموا فلسطين ولبنان، كل ده عشان ياخدوا وش عند الخواجات ويرضوا يساعدوهم؟ حد يراهن علي أوباما؟ ده عامل زي يوسف شعبان في فيلم «زقاق المدق»، طب آديه خلي بشادية، ونجاد قاعد علي قلبهم الأربع سنين.. أحسن، ده ذنبنا، عشان شتمونا واحنا صلاح قابيل الغلبان.
وياخويا كل اللي ما بيفتحوش بقهم علي بهدلتنا اتنحرروا قوي علي المعارضة الإيرانية، وكل اللي قعدوا يقولوا قضية فلسطين بتعطلنا، وياريتهم بيهببوا أي حاجة غير يثبطونا وختم المعونة الأمريكية معلم علي وشهم و... قفاهم، فضلوا هاتك يا شحتفة علي المعارضة الإيرانية، حتي الأنظمة العربية، وعلي رأسها النظام سيدنا وحبيبنا اللي العالم كله بيغطيه وهو نايم ويبوسه في جبينه ويعمل له كمادات لما يسخن، تضامنوا مع مطلب الإيرانيين، قال إيه.. بالحرية! إيه النفاق والادعاء ده؟
ماحدش بيتضامن معانا ليه؟ طالع لنا ديل ولاّ ودانا في قفانا؟ حتي الراجل اللي قلنا حينصفنا، ويلم الجهود اللي بالفعل مبذولة بقالها سنين، كل يوم والتاني مسافر وبيزورنا في الأجازات زي جواز المسيار. والنظام المصري زومبي. بيتخلق زي العنقاء.
كل القوي بتحبه، كل القوي حلوين، طبعا يا سيدي يا بخته، هو اللي زيه مين؟ أوباما قال عمرنا ما حنلاقي حليف زيه.
ومالناش حتة نروحها، كل ما نسافر يرجعونا زي مركوب مرزوق.
يكونش النظام معاه بسم الله الرحمن الرحيم؟ انصرف.. انصرف بأمر الله، لا تؤذيني ولا أأذيك. نعمل زي أوشين: التكال علي الله والاعتماد علي نفسنا، واوعي نعمل زي شادية في زقاق المدق، يوسف شعبان نصاب. عشان كده نازلة اعتصام 2 مايو للمطالبة بالحد الأدني للأجور إن شاء الله. نلم علي بعضنا. مالناش حد. مالناش حد أبدا، بس ربنا أحسن من الكل.