بالفيديو.. «مركز حقوقي» يبث فيديو لمواطن يروي تفاصيل اغتصابه وتعذيبه بمعسكرات الأمن المركزي

ضابط قال لنا: اللى هايعمل بلاغ مش هيشوف الأسفلت تاني.. وهنمشيك لو قلت انك من البلاك بلوك
نشر مركز النديم لتأهيل ضحايا العنف والتعذيب فيديو لشهادة أحد المواطنين يدعى أيمن مهنى، روي فيه تفاصيل تعذيبه بأحد معسكرات الأمن المركزي بالإسكندرية، وتعرضه للاغتصاب والتعذيب بالكهرباء داخل معسكرات الأمن المركزي، علي حد قوله.
ونقل المركز عن أيمن قوله إنه يوم الأحد 3 فبراير ذهب لدفع فاتورة الهاتف، وتصادف ذلك مع وجود مظاهرات للتضامن مع المواطن المسحول حمادة صابر بشارع 14 مايو، وحدث مطاردات بين الأمن والمتظاهرين، ومن خلفهم أشخاص يرتدون زي مدني ويحملون شوم ويضربون به من يقابلهم، مضيفًا وقبل أن أصل لفرع شركة الهاتف قاموا بضربه على رأسه مما أفقدني الوعي، وحينما أفق وجد الأشخاص الذين كانوا يرتدون زي مدني يلقوا به في إحدى مدرعات الأمن المركزي، ولم أدر حينها لماذا أخذونه .


وأضاف «حطّوني في قلب العربية والعسكري كان عاملني السلّم بتاعه، يضرب على المتظاهرين القنابل المسيلة وبعدها ينزل عليّا، لحد ما خلصت المظاهرات ربطوا إيديّا بقفيز بلاستيك وحطّوا في دماغي كيس أسود ومشفتش بعدها حاجة، وبدأوا يتفتشوني وأخدو موبايلي والفلوس اللي كانت معايا ، ولما النهار طلع علينا فوجئت أننا في معسكر أمن مركزي».

وتابع «في قلب المعسكر دخلنا أوضة زي الحجز بدأوا ساعتها يضربونا ويعذبونا ويشتمونا والواضح إن قيادات الأمن مفهّمين الجنود إننا كفّار لدرجة إن الأمن وهما بيضربونا وبيقولولنا يا كفرة مع وصلة من الشتائم القبيحة، وبالليل كان ضباط النوبنتجية بيعملوا علينا حفلة بدال ما يتفرجوا على التليفزيون، ياخدونا العساكر ويطلعونا ليهم متكتفين ويلبوسنا كيس أسود في دماغنا، مع مواصلة الشتائم».

مشددا «أحدهم قال لي: لو عاوز تمشي هنمشيك بس قول إنك تبع البلاك بوك وفي النيابة هيمشوك لأنك موظف، ولما رفضت زادت الإهانة وزاد معها الضرب، ووضعونا في أوضة رشوها ميّة ويوصلوا بيها تيار كهربي وبقينا نتنطط على قلب الأرض من الكهربا، وأساليب التعذيب كانت على نفس النسق والضباط كانوا بيشتمونا بألفاظ مسمعناهاش قبل كده، وكانوا بيصورونا في الأوضاع دي وكأننا مسخة، ويقولولنا خلّي الثورة تنفعكم».

و أوضح مهني أنه لا يستطيع أن يري وجهه لنجله بسبب ما حدث له وأنه لا يستطيع أن يواجهه وهو لم يأخذ حقه، وعلق متأثراً «أنا أهون عليّا أنضرب بالنار ولا يحصللي اللي حصل، وأتمني من ربنا إنا يعجل بعمري علشان مطولش في العذاب اللي أنا فيه، لأن اللي أنا فيه مش في حد ومحدش شاف اللي أنا شفته».

واضاف « كنا أربعة اللي خرجنا وهما اللي كانو بيتضربوا وبيطيعوا الأمر بمعنى أصح، وطبعاً فيه ناس كتير مخرجتش لدلوقتي بس أنا معرفش أنا كنت فين، وخرجونا الساعة 12 بالليل بعد ما لبسونا أكياس سودا في وشوشنا، وبعد ما العربية مشيت بينا مشوار اترمينا عند ترعة المحمودية، وإحنا في العربية الظابط قالنا لو حد قدّم أي بلاغ مش هيشوف الأسفلت تاني»، مجيباً عليه «أنا نفسي يكون الظابط ده سامعني دلوقتي، أنا مش عاوز أشوف الأسفلت تاني، أنا عاوز أسكن تربتي، حاول انك تعجلها وتسكّنّي تربتي ومتسيبنيش على قيد الحياة».

و استطرد ايمن إلى أنه بعد غيابه عن منزله اتصلت زوجته بالنجدة لمعرفه مكانه، ثم اتصلت مرة أخرى فقالوا لها إن زوجها مختلّ عقليا وأن عليها أن تبحث عنه في مستشفى المجانين، فيما كان أصدقاءه يخوّفونه بعد عودته من مقاضاة الحكومة وحذروه أنهم لن يتركوه، ملعقاً «أنا نفسي متسابش لكن يا تموّتوني يا تجيبولي حقّي علشان أعرف أرفع وشّي في وشّ ابني وياخدني قدوة ليه زي ما كان واخدني الأول».

و استكمل قائلا «كنا محجوزين في أوضة 3 أمتار في أربعة بداخلها ما يقرب من 40 شخص، وكنا بننام وإحنا واقفين من كتر الزنقة»، كاشفاً عن محاولته الانتحار بسبب ما تعرض له من تعذيب وذلك بقفزه من شرفة منزله إلا أن زوجته مع أهالي المنطقة نجحوا في تهدئته، مضيفاً «أنا مش عارف أعيش ولا أنام ولا آكل ولا أعمل أي حاجة واللي نفسي فيه حاجة واحدة يا تجيبولي حقّي يا تموّتوني، وفي كلا الحالتين هرتاح لو متّ هرتاح في تربتي واللي أنا شفته هيتدفن معايا، يا أما آخد حقي».

و اختتم كلامه قائلا «رغم إنه مهما يحصل مع الناس دي هحس إني مأخدش حقي منهم، ولكن ربنا فوق كل شئ، وحسبي الله وعنم الوكيل فيهم، ولو فيه فعلا قانون لسه موجود في البلد فأنا عاوز حقي بالقانون، والناس بتقول عيش حرية عدالة اجتماعية دلوقتي، وأنا بقول كرامة إنسانية، لأن الكرامة الإنسانية دلوقتي اغتصبت زي ما أنا اغتصبت».