ماهي ملهاش معنى تاني .. عشان اصدق ان محمد الجندي مات في حادثة عربية يبقى اكيد كان ماشي على دماغه مش رجليه زي البني ادمين .. ورغم اني ميفهمش في الطب الشرعي بس صاحب العقل يميز .. والمنظر اللي انا شفته ومحمد الجندي بين الحياة والموت في المستشفى يقول ان قطر اعمى ابن كلب فرم وشه .. ده اذا سلمنا ان الوفاة بسبب حادثة .. انما عربية شيك من العربيات الصغيرة الكميلة بتاعتنا تصدم الولد وتعمل فيه كده .. يبقى انتوا لامؤاخذة من كبيركم لصغيركم ناس مات ضميرها واندفن في خرابة وسخة اللي رايح واللي جي يفك زنقته فيها. سمعت امبارح كبير أطباء شرعيين سابقا تقريبا في معظم البرامج وشرح بالرسم ماذا يمكن ان يحدث للشخص إذا ما تعرض لحادث سيارة .. لو كان في مواجهتها يبقى كذا.. لو كان ضربته في ضهره يبقى كذا .. والعربية الصغيرة العادية الملاكي أو التاكسي غير الميكروباص غير النقل .. وبما ن محمد حسب التقرير اصطدم بعربية عادية يبقى كان لازم وبنسبة 85 % يجيله كسر مضاعف في الحوض والساقين ، وده محصلش ولا التقرير الشرعي ذكره.
الراجل الطبيب الشرعي سابقا كان بيتكلم على استحياء شديد .. ماهو شايف الدنيا بايظة ولا مؤاخذة " ... " شغّال ميت فل وعشرة .. فمش عايز يتورط في كلام اكتر من كده أحسن يقتلوه هو كمان ويقولوا عربية دهسته.
إنما ملخص كلام الراجل بالإشارة كده ان الجندي لا يمكن يكون مات بحادث سيارة .. ممكن من اى حاجة تانية ، إنما حادثة عربية لأ .
وهنا بقى لازم افتكر زي الكل ما افتكر خالد سعيد .. ولازم افتكر الراجل الدكتور ابو شعر ابيض وقلب اسود وضمير " شفتشي " اللي كان رئيس الطب الشرعي ايام خالد سعيد اللي اسمه السباعي احمد السباعي .. هذا النموذج العفن لطبيب أقسم اليمين وحنث به تحت ضغط الداخلية والسلطة .. ويمكن كمان مكنش فيه ضغط ولا نيلة .. بس هى رمشة عين يفهم منه السباعي افندي هما عايزين ايه وينفذ " زي المقطف " على طول .. هذا الطبيب معدوم الضمير والأخلاق أكد مليون في الميه ان خالد سعيد بلع لفافة البانجو .. بإصرار منقطع النظير لدرجة انه جعل واحد هادي جدا زي يسري فودة يخرج عن شعوره ، والافندي معاه في الاستوديو بيضحك ببلاهة الأغبياء وقفل الحلقة دون ان يشكره .. " ولو ساب نفسه يومها كان قام ضربه بالجزمة " .. او يتوجه للمشاهدين كعادته بالشكر لحسن الإصغاء والمتابعة. ، وفي الاخر تبان الحقيقة المرة اللي كل الوسخين عايزين يداروها .. ان خالد سعيد مات مقتول بافترا من أفراد شرطة كانت جزمته أشرف منهم كلهم .. وانتهى الأمر بإقالة السباعي احمد ، ولو ان هناك عدلا حقيقيا لتمت محاكمته وسجنه لكذبه وإخفائه للحقيقة.
ونفس السيناريو القذر عايزين يكرروه بحذافيره مع محمد الجندي .. والمرة دي عن طريق " واحد " كان قبل ان يصبح وزيرا للعدل رجلا .. وبعد الوزارة أصبح ولا حاجة.. الراجل ده مش حبطل أهاجمه حتى يستقيل من منصبه ، او يسلط عليا شوية صيع من بتوع الداخلية يهروني ضرب لحد ماموت ، وبعدين يقولوا ان التوك توك دهسه .. عم مكي " الله لا يستره " خرج وقال على الملأ ان الجندي حسب تقرير الطب الشرعي مات في حادثة .. واقسم بالله العظيم - والقسم لي - ان مكي يكذب ويعلم علم اليقين ان محمد الجندي اتعذب عذاب متعذبوش كافر في قبره .. ومع ذلك وببجاحة - جديدة عليه - يقولك حادثة عربية .. وتصريحه في حد ذاته كوزير للعدل - كما قال المستشار المحترم جدا أشرف البارودي في مداخلة مع إبراهيم عيسى - سقطة مروّعة ما كان يجب ان يقع فيها ، وكان الأجدر به ان ينأى بنفسه عنها .. وملهوش دعوة من أساسه .. ابعد يا راجل - والكلام لي - عن العك القذر ده .. اقعد في بيتكم .. او اعمل لك عمرة .. صلي واقرا قرآن كتير يمكن ربنا يغفر لك سقطاتك الكثيرة في هذه المدة القصيرة جدا التي توليت فيها منصب وزير العدل .. اخص ع الرجالة لمّا متبقاش رجالة.
عموما .. موضوع محمد الجندي مش حيفوت بسهولة كما يظن مرسي ووزير العدل ووزير الداخلية .. مادام محدش فيهم عايز يتعلم ومعندوش من الحنكة والذكاء انه يزوّق كدبته ويحلّيها بحيث ممكن نبلعها .. وواضح انهم نسيوا حكاية خالد سعيد اللي بموته أحيا نخوة الشباب والرجالة فقاموا بثورة .. لسه بيتعاملوا بنفس الأسلوب " الوسخ " بتاع نظام مبارك .. وواضح كده انهم مطمنين ع الأخر .. فالميدان مبقاش زي ماكان من سنتين .. ومن غبائهم فرحانين بالحكاية دي .. " مش عارفين يحشدوا ناس زي الأول .. يقصدونا احنا " .. وده يمكن صحيح .. بي معناه خطير جدا جدا .. مش معنى ان الناس بطلّت تنزل انها راضية عنك يا مرسي .. بالعكس دي قرفانة منك قرف لو اتوزع على بلاد العالم لفاض وكفّى .. وهنا الخطورة اللي انت مش حاسس بيها .. الناس بطلّت تنزل من اليأس .. واليأس لو اتكمن منهم يبقى نهايتك مش حتبقى زي نهاية مبارك .. " تنحي ومستشفى واستعطاف ومحاكمة وكلام فارغ من ده " .. نهايتك حتبقى زي القذافي .. شفت عملوا إيه في القذافي .. وحياة ولادك بص على الفيديو بتاع الزعيم الليبي وهو بيتجرجر من قفاه .. بص عليه وهو عايز يبوس الجزمة .. بس يسيبوه .. لكن هيهات هيهات .. مش هو اللي قالها بعلو صوته من أنتم ؟ .. فردوا عليه وخلّوه يعرف مين هما.
كل " جمعة " من دلوقتي لحد ما تمشى زي مبارك ، او زي القذافي " انت اللي حتحدد " .. الناس اللي مش كتيره حتخرج لك .. كانوا بيروحوا لك الاتحادية ، فعرفوا انك بطلّت تروح هناك .. فقرروا يروحوا لك قصر القبة.. يعني وراك وراك .. شفتش إصرار أكتر من كده عشان يوصلّوا لك رسالة .. وانت مش عارف تقرا .. واللي مش عارف يقرا يبقى متعلمش .. واللي متعلمش من صغره صعب يتعلم وهو فوق الستين .. " مش بيقولوا التعليم في الكبر كالنقش ع الحجر " .. ومادام يستحيل انك تتعلم .. يبقى إيه يا ريس مرسي ؟ .. يبقى تدّيها سكة .. اسمع كلامي .. المسالة مبقتش هزار .. وانت مش " حِمل " اللي اتعمل في القذافي .. اخلع يا مرسي قبل العيال ميخلعوك م الدنيا .. اليأس لو اتمكن من البني ادم .. بيبقى مش شايف غير حاجة واحدة بس .. " عليا وعلى اعدائي !
