عرض خاص ولفترة محدودة.. «الداخلية» تبدأ قبول طلبات المواطنين لشقق ووظائف «النهضة» والمقابل: تعرية وسحل

الأوكازيون السنوي الكبير لوزارة الداخلية يقدم:
- عزيزي الشاب.. أختي الشابة.. عايز تتجوز.. عايزة تتجوزي؟
-ايون
- عزيزي الشاب.. أختي الشابة.. عايز وظيفة.. عايزة وظيفة؟
- ايون
-طب إيه المشكلة؟
-الشقة والوظيفية
-محلولة وزارة الداخلية خلاص حلت مشكلتك
اشترك الآن في سحب وزارة الداخلية علي شقق «النهضة» ووظايف كمان، للمواطنين الشرفاء بس بتوع 25 مش بتوع 28«مفهومة»، وذلك إيمانا من الوزارة بدورها الرائد في أزمة البطالة والسكن.
-طيب بكام.
- ولاجنيه.
- طيب مفيش اي اوراق او حاجة مطلوبة مني.
-حاجة واحدة سهلة وبسيطة خلاص وبيحصلك اكتر منها كل يوم
-ايه يعني
-هنعريك ونسحل اللي جابوك، بس مافيش حاجة تانية،«مش هنجبلك راجل» وعد بجد مش وعد رئاسي.
*الشقق مساحات مختلفة والوظايف كمان بمرتبات مجزية جدا ودا طبعا يتوقف علي عدة عوامل أهمها:
1- هتتسحل كام متر.
2- هتتسحل بهدوم ولا بلبوص.
3-عدد الشلالايت اللي هتخدها اثناء السحل ومدي تجاوبك معاها.
4- انك طبعا تكون لابس خفيف عشان توفر وقتنا،« عشان تبقي فاهم يعني ».
-مش بس كدا.
*عرض لفترة محدودة اتسحل انت وفردين معاك ممكن تكسبوا شاليه في الساحل الشمالي.
سعر السحل ثابت اينما كنت، أؤمر انت يا قمر.
*تقدم الطلبات مبنى رئاسة الجمهوري علي صندوق بريد 56734
مع وزارة الداخلية حنشيلك على كفوف الراحة.
‏ * خبر صحفي مرفق للاعلان للتاكيد على جدية عرضنا اليكم.
قالت مصادر طبية بمستشفى الشرطة أن اللواء محمد إبراهيم، وزير الداخلية، اليوم السبت، اتصل هاتفيًا بالمتظاهر المسحول، حمادة صابر محمد علي، والذي تعرض للسحل أمام قصر الاتحادية، مساء أمس الجمعة.
واطمأن الوزير على صحة المصاب، وطالبه بقبول اعتذار الوزارة عن الحادث، كما أكد له أن الوزارة تتحمل رعايته الصحية، مبدياً استعداده لتوفير فرصة عمل له عقب شفاءه.
وقالت مصادر طبية بمستشفى الشرطة إن حالة المواطن مستقرة، وإن التقرير الطبي أشار إلى وجود سحلات بأماكن متفرقة بالجسم، والإصابة برش خرطوش في الفخذ الأيمن.