أيام رمضان غير باقي أيام السنة، كلنا بنبقى عايزين نعمل كل يوم أكل أحلى من اليوم اللي قبله، وعلشان ما تتعبيش في التفكير والاختيار، "بص وطل" هتقدّم لك كل يوم عزومة كاملة من العصير للسحور.. على سفرة النهارده هيكون موجود خشاف وسلطة لسان عصفور وشوربة الكريمة بالخضار وديك رومي، مع الخضار المقرومش وبافلوفا بالفواكه وعلى السحور بنقدّم لك عجة الباذنجان..
الخشاف الخشاف المقادير: 1⁄2 كيلو تمر مجفف 4 كوب عصير قمر الدين 2 ملعقة كبيرة سكر كوب تمر مجفف كوب مشمشية كوب قراصيا 1⁄2 كوب زبيب الطريقة: قطّعي التمر إلى نصفين، وقطّعي القراصيا والمشمية لقطع صغيرة وانقعيهم من الصبح في عصير قمر الدين والسكر، وعلى الفطار صُبّي الخشاف في كاسات التقديم وزينيه بالزبيب وأي مكسرات عندك.
سلطة اللسان عصفور سلطة اللسان عصفور المقادير: 1⁄4 كيلو لسان عصفور مسلوق ومصفّى ثمرة فلفل أخضر مقطّعة قطع صغيرة ثمرة فلفل أصفر مقطّعة قطع صغيرة ثمرة طماطم مقطّعة قطع صغيرة ثمرة خيار مقطّعة قطع صغيرة ملعقة نعناع مجفف ومطحون زيتون أسود مقطّع شرائح ملعقة كبيرة عصير ليمون 2 ملعقة زيت زيتون ملح وفلفل أسود ثمرة جزر مبشورة الطريقة: 1- اخلطي لسان العصفور مع الخضراوات المقطّعة وشرائح الزيتون، وعند التقديم تبّليها بالملح والفلفل والنعناع وزيت الزيتون.
شوربة الخضراوات بالكريمة شوربة الخضراوات بالكريمة المقادير: 2 ثمرة بطاطس مقطّعة مكعبات ثمرة بصل مقطّعة مكعبات ثمرة جزر مقطّعة مكعبات 1⁄2 كوب كرفس مفروم مكعب مرقة دجاج ملح وفلفل أسود 1⁄4 كوب كريمة 1⁄4 كوب زبدة 4 كوب ميه الطريقة: 1- شوّحي مكعبات الخضار في الزبدة على النار لمدة خمس دقايق، وبعد كده ضيفي مرقة الدجاج والميه، وسيبي الخليط يغلي لمدة نص ساعة. 2- ارفعي الشوربة من على النار وسيبيها تهدا شوية، وبعد كده اضربيها في الخلاط لغاية ما الخليط يتجانس تماما، وبعد كده رجّعيها تاني على النار. 3- ضيفي الكريمة على الشوربة وقلّبيها كويس، وبعد كده تبّليها بالملح والفلفل، وسيبيها على نار هادية لمدة 10 دقائق، وقدّميها سخنة.
ديك رومي مع الخضار المقرمش ديك رومي مع الخضار المقرمش المقادير: 1⁄2 كيلو صدور ديك رومي كوب جبنة شيدر أو رومي مبشورة 2 كوب بقسماط مطحون 2 ملعقة كبيرة زيت زيتون 1⁄4 كيلو بقدونس مفروم 1⁄4 كيلو بروكلي مقطّع 1⁄4 كيلو قرنبيط مقطّع 5 فص ثوم مقطع ملح وفلفل أسود كوب زيت نباتي الطريقة: 1- تبّلي صدور الديك الرومي بالتوم والملح والفلفل وزيت الزيتون، وسيبيهم في التتبيلة لمدة ساعة على الأقل. 2- اخلطي البقسماط مع الجبنة والملح والفلفل الأسود، واقسمي الخليط نصفين. 3- تبّلي القرنبيط والبروكلي والبقدونس بالنصف الأول من الخليط، وحمّريه في الزيت لحد ما يبقى الخضار مقرمش. 4- تبّلي صدور الديك الرومي بالنصف التانى من خليط البقسماط، وحمّريها في الزيت. 5- قدّمي صدور الديك الرومي مع الخضار المقرمش ساخنة.
البافلوفا بالفواكه البافلوفا بالفواكه مقادير المارنج: بياض 4 بيضات كوب سكر ناعم ملعقة صغيرة نشا ملعقة صغيرة خل 1⁄2 ملعقة عصير ليمون فانيليا مقادير الحشو: أي خليط فواكه مقطّعة (فراولة - تفاح - موز - مشمش) 2 كيس بودرة كريم شانتيه كوب لبن ساقع ملعقة كبيرة سكر الطريقة: 1- اخفقي بياض البيض بالمضرب الكهربي على سرعة متوسطة لغاية ما حجمه يزيد، وبعد كده ابدئي ضيفي السكر بالتدريج (ملعقة كبيرة في كل مرة) واخفقي البيض كويس لغاية ما يتجانس مع السكر، وتلاحظي إن المارينج بقى قوامه كثيف وهش، وبعد كده ضيفي النشا والخل وعصير الليمون، وقلّبيهم بهدوء. 2- جهّزي صينية وافردي فيها ورقة زبدة، وحطّي خليط المارينج في قمع الحلويات، وبعد كده ابدئي ارسمي بالمارينج دائرة صغيرة بس راعي إنها تبقى عالية وإن قاعدتها تبقى مقفولة علشان تعرفي تحطّي فيها الحشو بعد كده. 3- كرّري نفس الخطوة لغاية ما كمية المارينج تخلص، وبعد كده دخّلي الصينية في فرن ساخن وسيبيها لمدة ساعة تقريبا أو لحد ما تحسي إنه استوى وبقى لونه بمبي، وهتلاحظي كمان إنه بقى فيه تشققات خفيفة زي البسكويت الهش، بعد كده اطفي عليه وسيبيه في الفرن لغاية ما يبرد تماما، وبعدين طلّعيه قبل التقديم على طول. 4- لتحضير الحشو، اخفقي الكريم شانتيه مع اللبن والسكر لغاية ما حجمه يتضاعف ويبقى هش وبعد كده شيليه في الفريزر شوية، وبعدين طلّعيه وضيفي عليه الفواكه المقطّعة وقلّبيهم مع بعض كويس، وبعد كده حطّي الخليط ده في قوالب المارينج قبل التقديم على طول.
للسحور.. عجة الباذنجان للسحور.. عجة الباذنجان المقادير : 2 ثمرة باذنجان أسود ملعقة صغيرة بيكينج باودر 3 فص ثوم مفروم ثمرة بصل مفروم ملح وفلفل أسود بقدونس مفروم 1⁄2 كوب لبن زيت زيتون 4 بيضة الطريقة : 1- قشّري الباذنجان وقطّعيه شرائح رفيعة، وحُطّيه في ميه وملح لمدة ربع ساعة. 2- ادهني كل شريحة باذنجان بزيت الزيتون أو أي زيت نباتي، ورصّيه في صينية، ودخّليها الفرن لحد ما الباذنجان يبقى لونه دهبي، وبعد كده طلّعيه واهرسيه لغاية ما يبقى عبارة عن قطع صغيرة جدا. 3- شوّحي البصل والثوم في زيت الزيتون، وبعد كده ضيفي الباذنجان اللي جهّزتيه وقلّبيهم كويس على النار لغاية ما الخليط يتجانس، وبعد كده ارفعي الخليط من على النار وسيبيه يبرد شوية. 4- اخفقي البيض مع اللبن والبيكنج بودر باستخدام المضرب اليدوي، وضيفي عليهم الملح والفلفل الأسود، وبعدين ضيفي خليط البيض على خليط الباذنجان والبصل وقلّبيهم مع بعض كويس، وحطّي الخليط بعد كده في صينية الفرن ودخّليها في فرن ساخن لغاية ما العجة تستوي ووشها يحمرّ، وبعد كده طلّعيها وقدّميها. وبكده خلصت عزومة النهارده.. مستنيين تجرّبي وتقولي لنا إيه رأيك.. واستنينا بكره إن شاء الله مع عزومة جديدة.. نتمنى لكم صوما مقبولا وإفطارا شهيا بمشيئة الله.. سلام،،،