"سلطة الطماطم بالموتزاريلا" على طريقة "جوجو"

أنا حبيت أقدم لكم طريقة عمل سلطة الطماطم بالجبنة الموتزاريلا، على فكرة طعمها حلو أوي وأنا عن نفسي باموت فيها، وقلت يمكن تعجبكم أنتم كمان.
المقادير:
1/2 كيلو طماطم
300 جرام جبنة موتزاريلا
ملعقة نعناع ناشف
ثمرة بصل
ملعقه كمون
ذَرّة ملح وذَرّة فلفل
2 ملعقه ريحان مفروم
2 ملعقه نعناع أخضر مفروم
2 ملعقه زيت زيتون
2 ملعقة كبيرة خلّ
الطريقة:
1- أول حاجة هنجيب الطماطم وهنقطّعها شرائح كبيرة، وبعدين نجيب الجبنة الموتزاريلا، ونقطعها لشرائح، ونحطها على الطماطم ونسيبهم على جنب.
2- هنجيب طبق تاني ونحط فيه الخلّ والنعناع الناشف والكمون والملح والفلفل والزيت، ونجيب البصلة ونبشرها معاهم، وبعدين نحط عليهم النعناع والريحان المفرومين ونخلط ده كله مع بعضه بالملعقة، ونضيفهم على الطماطم والموتزاريلا.. وبالهنا والشفا.
هاستنى ردودكم علشان أعرف رأيكم، وأقول لكم على وصفات كتيرة عندي؛ بس أنا حبيت أبدأ بحاجة خفيفة على المعدة ولذيذة كمان.
في النهاية كل أسرة "قمر 14" بتشكر الأصدقاء اللي بعتوا لنا وصفاتهم الجامدة دي..
ويا ريت تجرّبوها فعلاً..
وفي انتظار آرائكم..
وكمان وصفاتكم الجامدة على لينك..
ورينا شطارتِك،،،