ديكور بيتك بطعم زينة رمضان

كل سنة وأنتم طيبين بمناسبة الشهر الكريم، الفوانيس وزينة رمضان هما أكتر حاجة بتحسّسنا بالبهجة والنكهة الخاصة بأيام الصيام..
النهارده هنقدّم لك خطوات وأفكار بسيطة تزيّني بيها بيتك علشان يكون له شكل مختلف في رمضان.
زيّني البيت بفوانيس رمضان
الفوانيس هي أكتر حاجة بتميّز احتفالات الشهر الكريم، ومهما كبرنا بتفضل فرحتنا بالفانوس ما تتوصفش، جرّبي معانا تعملي في بيتك فرع من الفوانيس.
الأدوات:
15 فانوس صغير
بكرة خيط دبارة
دبابيس مكتب أو أي مادة لاصقة
الطريقة:
1- هاتي كل فانوس واربطيه في الخيط بحيث إنك تكوّني حبل طويل نازل منه الفوانيس.
2- ثبّتي طرفي الخيط بالدبابيس أو المادة اللاصقة على المكان اللي عاوزة تعلقيه فيه، وعلى الأغلب بيكون في غرفة السفرة أو في البلكونة.
3- شغّلي الفوانيس قبل أذان المغرب، علشان تحصلي على شكل جمالي رائع.
قماش الخيامية لتزيين المنزل
قماش الخيامية أول ما بنشوفه على طول بنفتكر رمضان والقعدات الشرقي المصرية الجميلة، والفكرة اللي هنقدّمها بسيطة جدا، وبتدّي لبيتك جو شرقي رائع، ويا سلام مع المبخرة وفيها عطور المسك والعنبر، بيتك هيبقى ولا أروع.
الأدوات:
متر قماش خيامية
بكرة خيط دبارة
دباسة
مقص
دبابيس مكتب أو أي مادة لاصقة
الطريقة:
1- هاتي القماش وابدئي قصّيه على شكل مثلثات متساوية.
2- لفّي المثلثات على الخيط، بحيث إن قاعدة المثلث تكون ملفوفة على الخيط، ويبقى طرفه نازل من الخيط (مثلث مقلوب)، وتدبسيه بالدباسة، وهكذا.
3- هتلاقي نفسك عملتي فرع كبير من مثلثات الزينة، علّقيها في المكان اللي تختاريه باستخدام الدبابيس أو اللاصق.
سجادة صلاة بقماش الخيامية
الأدوات:
متر قماش خيامية
متر عقدة سجادة
إبرة وخيط
الطريقة:
1- قصي القماش على شكل سجادة الصلاة أو ودّيه عند الترزي يقصّه.
2- هاتي عقدة السجادة وخيّطيها في أطراف القماش، وبكده تكوني عملتي سجادة صلاة رمضانية من صنع إيدك.
3- تقدري كمان تعلقي السجادة على الحائط كأنها لوحة علشان تدّي شكل شرقي لحجرتك.
فكرة تانية:
ممكن تستخدمي كمية أكبر من القماش وتعملي بيها خُداديات تزيّني بيها الصالون أو غرفة المعيشة، وكمان ممكن تعمليها مفرش للسفرة.
شوية أفكار ع الماشي:
1- جرّبي تزيّني البيت كمان بالفازات اللي ليها أشكال خاصة برمضان زي الهلال والنجوم والفوانيس.
2- خلّي أطفالك يشاركوا فرحة رمضان بإنك تستخدمي الورق والكرتون وتخليهم يعملوا أشكال هلال أو فوانيس وتلوّنوها مع بعض، ويستخدموها بعد كده في تزيين غرفتهم.
3- ضيفي لبيتك رائحة شرقية باستخدامك للمبخرة بعطور المسك والعنبر، وممكن تستخدمي الإبريق الفضة أو النحاس كبديل للفازات في تزيين السفرة.

أفكار لتزيين بيتك في رمضان
* صحة وجمال
اضغط على الصورة لمشاهدة الجاليري:
وبكده يكون خلص موضوعنا..
لكن أفكارنا لسه ما خلصتش..
استنونا في رمضان مع موضوعات جديدة ومختلفة..