مكرونة بالزيتون والباذنجان على "سفرة دايمة"

أعدّها لكم: نيرة أحمد
وصفتنا النهارده صحية ومفيدة خصوصا للناس اللي بيعملوا ريجيم، جرّبي معانا المكرونة بالزيتون والباذنجان بطريقة سهلة وبسيطة.
مكرونة بالزيتون والباذنجان
المقادير:
1⁄2 كيس مكرونة اسباجيتي ( أو أي نوع تحبّيه)
ثمرة باذنجان مقطّعة مكعبات صغيرة
1⁄2 كوب زيتون أخضر مقطّع شرائح
2 ملعقة كبيرة زيت زيتون
جبنة بارميزان (اختياري)
1⁄4 كوب بقدونس مفروم
فص ثوم مفروم
عصير ليمونة
فلفل أسود
الطريقة:
1- اسلقي المكرونة، وبعدين سخّني زيت الزيتون على النار وشوّحي فيه الثوم، وبعد كده ضيفي عليه الباذنجان وقلّبيه لمدة 5 دقائق، وبعدين ضيفي عليه عصير الليمون والزيتون، وقلّبيهم على النار لحد ما يبقى لون الباذنجان دهبي.
2- شيلي المكرونة من على النار وصفّيها من الميه، وبعدين ضيفيها للباذنجان، وقلّبيهم مع بعض على النار، وبعدين ضيفي عليها نصف كمية البقدونس واستمرّي بالتقليب لمدة من 7 إلى 10 دقائق.
3- شيلي المكرونة من على النار، وحطّيها في طبق التقديم وضيفي عليها الفلفل الأسود، ورشّي عليها الجبنة وباقي كمية البقدونس، وقدّميها.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،