خطيبتي بتنتقدني وبتقول لي إني مش قادر أسيطر على قلبها

السلام عليكم.. أولا أحب أعبر عن إعجابي بالموقع وأدائه الرائع وبعدين أعرض مشكلتي..
مشكلتي تتلخص في: أنا شاب مغترب أعمل خارج مصر، خطبت قبل سفري بحوالي شهرين، وعلاقتي بخطيبتي كانت ممتازة وبعدين بدأت تحصل بعض المشادات البسيطة بين خطيبتي ووالدتي، ولكني تعاملت مع الموضوع بهدوء وهدّيتهم.
المشكلة إنها بدأت مؤخرا تقول لي إني مش قادر أسيطر على قلبها، وانتقدتني كتير وخصوصا مظهري، هي بتقول إنه كويس بس مش شبابي، وإن تسريحة شعري عادية على حد تعبيرها، وإن هي عايزة تعيش حياتها..
أنا مهندس وميسور ومش بخيل خالص وباهتم جدا بيها في كل شيء، باستشيرها في أدق أمور حياتي، وعلى طول مهتم بيها وبأهلها، مش عارف ليه الكلام ده بدأ يظهر دلوقتي، وكتير بتقول لي عايزين نبعد علشان نتأكد من مشاعرنا..
وأنا بطبيعتي هادي ومنظم وعمري ما اتعصبت عليها، حتى لما كانت بتتعصب كنت بامتص غضبها, كمان لاحظت إنها بتغير أوي من زميلاتها لو قعدت مع واحدة منهم وسمعت إن خطيبها بيعمل لها حاجة أو بيكلمها كتير تيجي تقول لي إشمعنى إنت..
وأقعد أنا أفكرها إن أنا عملت أكتر من كده وطول الوقت باعمل لها حاجات كتير، فبتقتنع شوية ويرجع تاني نفس الموضوع يتكرر، الصراحة أنا محبط ومش فاهم! أفيدوني.

meceng


صديقنا العزيز.. خطوبتك ما زالت في بدايتها، فلا تتعجل في الحكم عليها، وما يحدث رد فعل طبيعي لبعدك واغترابك، فالفتيات في فترة الخطوبة يشتقن إلى الاهتمام والخروج والهدايا، هذه المظاهر التي تعطيهن الإحساس بالسعادة، وكل هذا قد حرمت منه خطيبتك، وبل وقد حرمت أيضا من زيارتك لها أو مقابلتك، وربما أصبحتما تتحدثان على الإنترنت.
ولكن ربما يكون هذا غير كافٍ لكما، والغيرة إحساس طبيعي أيضا، فلو كنت في غربتك وحدك ولديك صديق متزوج ورأيت اهتمام زوجته به وسعادتهما معا لشعرت بالغيرة أنت أيضا، إن الغيرة إحساس طبيعي لدى البشر، وخصوصا لو كانوا في ثقافة تسعى إلى الاستعراض بالمظاهر كثقافتنا في مصر.
كل الحكاية أنها لم تتعود بعد على غيابك، ويجب أن تتحدث معها في هذا الشأن، وتقنعها بأنك تفعل كل ما بوسعك لإرضائها، وأن غيابك وعملك في حد ذاته هو من أجلها ومن أجل تكوين مستقبلك لإتمام زواجكما بسرعة.
ولتجعل منها مزحة لطيفة، عندما تطلب منك الاهتمام بها أو أشياء غير مستساغة أخبرها أنها بهذا ستعطل زواجكما يوما أو اثنين، لأنك فعليا مشغول بتفاصيل الزواج أكثر من الخطوبة ومظاهرها.
لما شخص بيخطب وبيسافر، للأسف بيسيب وراه فراغ كبير قوي، والبعد أحيانا بيكون هو السبب الرئيسي في المشاكل اللي من النوع اللي بتقول عليه ده، ولأنك مش موجود حواليها، هي من غير ما تحس برضه بتبدأ تقارن، وتفكر، وتشغل نفسها بحاجات فارغة، بتفتح معاك مواضيع، وساعات بتتخانقوا، كل ده على الإنترنت، لأن كل واحد فيكم عاوز يثبت وجوده في حياة الثاني، أو يمكن هي عاوزة تفكر معاك، وتتخانق معاك وتشاكسك أحيانا.
وبتبدأ المشاكل، لأن في العادة الكلام الحلو والروتين اليومي والسؤال عن الأخبار بيخلصوا في أول شهر.. وبتكونوا عاوزين تدوروا على كلام جديد.. وافتكر خطيبتك مش شاطرة في اختيار المواضيع اللي بتتكلم فيها.
احتمال كبير إن ده يكون سبب المشكلة الحقيقية، والبنت طيبة وغلبانة ومش في دماغها غيرة، وكل الحكاية إن البعد هو اللي عامل كل القلق ده، قرب منها أكتر واتكلموا أكتر وإن شاء الله ربنا يهدي لكم الحال.

لو عايز تفضفض لنا دوس هنا