كل سنة وكلكم في صحة وخير وسعادة.. خلاص كلها كام يوم ونحتفل كلنا بذكرى عطرة على قلوبنا وهي المولد النبوي الشريف.. وأكيد أول لما المولد بيقرّب، كلنا بنفتكر "حلاوة المولد" اللي بنستناها من السنة للسنة.. طيب إيه رأيكم لو غيرنا السنة دي.. وبدل ما نشتري حلاوة المولد.. نعملها بنفسنا في البيت.. أكيد هتكون أنضف وأحلى.. وكمان هتوفر لنا فلوس كتييير.. يلّا بينا نشوف هنعمل إيه... الفولية المقادير: 3 أكواب فول سوداني. كوب ونصف سكر. 1/3 كوب ماء. 1/4 ملعقة كبيرة ماء ورد. ملعقة كبيرة عصير ليمون. الطريقة: 1- سخني الفول في طاسة لغاية ما يتحمص. 2- أحضري حلة وحطي فيها السكر والماء وحطيها على النار، وبعد كده ضيفي عليها ماء الورد وعصير الليمون، وسيبيهم لغاية ما الخليط يبقى سميك شوية ولونه يغمق شوية يبقى قريب من لون الكراميل أو أغمق، وبعد كده نقلبه تقليبة بسيطة ونشيله من على النار. 3- بعد ما تشيليه من على النار أحضري الفول السوداني واخلطيه مع الشربات وقلبيهم كويس مع بعض. 4- تكوني مجهزة قوالب استانلس مدورة أو مستطيلة وبتصبي الفول والشربات فيهم. 5- اضغطي على القوالب بإيدك كذا مرة، بس خلي بالك إنك تكوني لابسة جوانتي حراري؛ لأن الفولية بتكون لسة سخنة، وسيبي القوالب لحد ما الفولية تبرد، وبعد كده قدميها، وبالهنا والشفا. وبنفس الطريقة دي تقدري تعملي الحمصية والفستقية والسمسمية، بس كل اللي عليكِ إنك تبدلي الفول السوداني بالحمص أو بالفستق أو بالسمسم. الملبن بالمكسرات المقادير 2 كوب نشا. 2 كوب ماء. 2 كوب سكر. مستكة. معلقة صغيرة ماء ورد. نصف كيلو عين جمل أو فستق أو أي مكسرات تحبيها. نصف ملعقه فانليا. الطريقة 1- احضري حلة وحطي فيها كوبايتين سكر والمية وارفعيها على النار. 2- ذوبي النشا في شوية مية، وسيبيها لغاية ما السكر والميه يوصلوا لدرجة الغليان، وبعد كده حطي عليهم النشا الدايبة في المية مع التقليب المستمر والسريع لمدة ربع ساعة. 3- بعد كده حطي كوبايتين السكر الباقيين عليهم، وافضلي قلبي جامد لغاية ما تلاقي شكلهم بقى عامل زي الكراميل بس فاتح شوية، وبعدين ضيفي عليهم المستكة والفانيليا وماء الورد. 4- أحضري حبل والضمي فيه المكسرات اللي عندك، واغمسيه في الخليط وطلعيه كذا مرة لحد ما الملبن يغطي المكسرات. 5- أحضري صينية مدهونة زيت وحطي فيها حبل الملبن وغطي الصينية، وسيبيها في الثلاجة لمدة يوم لحد ما الملبن يبقى متماسك مع بعضه.. وبالهنا والشفا. ولغاية هنا خلصت وصفاتنا النهارده.. واستنونا بكره علشان نكمّل مع بعض.. وصفات حلاوة المولد.. اوعي تنسي تبعتي لنا وصفاتك الجامدة على لينك... ورينا شطارتك