أنا كنت مرتبطة بواحد من سنتين.. بس هو كان بيحبني وأنا ماكنتش حاسة بيه، وكنت بازعله وباقسى عليه كتير، وهو كان بيحاول كتير باهتمامه وحبه إنه يخليني أحبه وأنا ضيعته مني وسبته.. ولما حاولت أصلّح اللي عملته وأصالحه رفض، وبعدها سمعت إنه خطب، وبعد فترة والده اتوفى وكنت عايزة أتطمن عليه؛ بعت له رسالة على ايميله بس هو ماكانش يعرف إني أنا، وبعد ما عرف لقيته بيرحب بيّ جدا، وفرح إني سألت عليه.. أنا فكرت من طريقته إنه ساب خطيبته، بس هو قال لي إنه لسه معاها وماكدبش عليّ، بس قال لي إن فيه مشاكل وإن أهله في البيت مش عايزين خطيبته، وهو قال لي إنه هيسيبها وقال لي عرّفي أختك بموضوعنا، وأنا دلوقتي بحبه جدا لأني حسيت بقيمته ونفسي يكون ليّ، بس أنا خايفة يكون بيكدب، وخايفة أبعد وأكون ظلمته وهو صادق، أعمل إيه؟
Jessy
صديقتي العزيزة.. قلتي مرتبطة ولم تقولي مخطوبة، فهل معنى هذا إنه ماكانش ارتباط رسمي؟ لو كده يبقى خلي بالك، إنه ممكن زي ما إنتي تعبتيه زمان وطلعتي عينه يكون هو بس بيلعب دلوقتي وبيتسلى، زائد إن العلاقة غير الرسمية مختلفة تماما عن العلاقة الرسمية اللي بتبقى قدام كل الناس. إنتي دلوقتي هتدخلي في علاقة مع واحد خاطب بالفعل، وحتى المشاكل اللي حكى لك عليها مع أهله مش معاه هو، ولو هايسيبها فعلا هايسيبها إمتى؟! ومستني إيه؟! وتعرفي منين إنه بعدها هايتقدم لك إنتي؟! أسئلة كتيرة لازم تجاوبيها قبل ما تقولي "باحبه جدا" إنتي خايفة يكون بيكذب لأن قلبك مش مطمّن. حاولي تكلميه مرة واحدة ويكون فيها حسم كبير، اسأليه هو هايسيب خطيبته فعلا ولا لأ، وإذا كان لسه بيحبك ولا لأ، ممكن تخليه يقابل أختك عشان تتأكدي إنه جاد فعلا. قبل ما يعمل كده ويجاوب على الأسئلة دي، حاولي تحمي قلبك وتخليكي بعيد وما تتورطيش في الحب.