باحتقر قلبي من كتر ما حب ودق

السلام عليكم.. أنا بنت عندي 23 سنة لاحظت إن عندي مشكلة بس مش فهماها وعايزة أعرف الحل.

أنا بحب من بعيد لبعيد، وأتعلق جدا لدرجة الإعياء أحيانا، وبمجرد مرور وقت قليل أو أقابل حد تاني برضه أحبه من بعيد لبعيد، وأنسى الحب اللي فات كأنه لم يكن، وبتتكرر الحكاية، وأقول إنه ماكانش حب ده وهم؛ لكن لما اشتغلت اتقدم لي زميل في الشغل واتخطبنا وحبيته جدا؛ لكن لم تستمر العلاقة بسبب مشيئة القدر مافيش نصيب يعني.

نفس الأعراض (عياط، وتعب نفسي، وتفكير ليل نهار، وإعياء شديد)؛ بس كنت باقول لنفسي إن دي أول علاقة بين طريفين بجد يعني هو ده حب حقيقي، ولكن بعد فترة وبمجرد إني قابلت حد تاني أعجبت بيه، ونسيت الحب اللي فات خالص، وإني حتى مش عايزة افتكر الأيام اللي قضتها معاه.

بس مشكلتي إني استحقرت قلبي، وباقول لنفسي إن دموعي دي مالهاش أي لازمة علشان هي رخيصة، وقلبي كمان عبيط بيتعبني على الفاضي ومش بقيت أصدقه، وأنا دلوقتي مش طايقة ولا قلبي ولا دموعي وأحاسيسي.

وحاسة أني ما حبتش خالص في حياتي؛ على الرغم من إن قلبي بيوجعني فعلا بعد انتهاء أي قصة عشتها.

أفيدوني.. أنا عايزة أعرف ده طبيعي، ولا أنا عندي مشكلة فعلا.. هل أنا مش مخلصة؟! أفيدوني.

s.o

صديقتنا الجميلة.. بالراحة كده على نفسك وماتقسيش عليها كتير، ومالهوش داعي تحتقري قلبك ولا ودموعك ومشاعرك لأنهم غاليين جدا؛ حتى لو كنت لسه ماقابلتيش اللي يقدر قيمتهم ويستحقهم فده مش مبرر إنك تغضبي من نفسك.

إحنا في حياتنا ملايين من "الأسطوانات المشروخة" الكلام المكرر اللي عملناه قواعد وإحنا مش حاسين، زي فكرة الحب الأول، والحب من أول نظرة، والحب اللي مايتنسيش، والحب القديم، حتى شكل القلب الأحمر اللي بنرمز بيه للحب مالهوش أي علاقة بشكل القلب الحقيقي اللي في جسمنا وبيدق على الشمال ده، اللي عايزة أوصله ليكي هو أنه مافيش قاعدة بتقول إن الحب بييجي مرة واحدة، والجواز قطر بيعدي مرة ولو فاتك هتفضلي طول عمرك قاعدة ع المحطة.

الحب ممكن ييجي كتير في حياة البنت والولد، وممكن ينتهي ويتنسي عادي جدا، وده مش معناه إننا وحشين، كلمة إنسان من نسيان، وصدقيني النسيان نعمة علشان نقدر نعيش ونستمر ونطور حياتنا ونجددها، في ناس بتتجوز وتعيش سنين مع بعض وبيموت جوزها وبتتجوز تاني وبتحب وبتعيش حياة جديدة يبقى ليه بتعذبي نفسك.

لو قلبك كان بيوجعك بعد كل مرة فارقتي فيها.. فده له معنى واحد بس إنك كنت في كل مرة بتحبي بصدق، ولو بتسألي إذا كان ده طبيعي؟ فأيوه يا صديقتي ده طبيعي جدا؛ لإن الحياة مش فيلم لإحسان عبد القدوس، حتى في الفيلم عبد الحليم في الآخر بينسى حبه الأولاني لبنى عبد العزيز وبيبدأ يحب مراته زهرة العلا.

الحياة حياة، متجددة زي الفصول، فيها موت وحياة، ونسيان، وحب وفراق، وقصص مش بتنتهي بكلمة النهاية لكن بتنتهي ببداية قصص جديدة، أوعي تكرهي نفسك لأنك بتعرفي تحبي بجد وتحزني لما تفارقي، احتقري نفسك بجد لما يتحول قلبك لحتة خشب لا بتحب ولا بتكره، ولا بدمع على حد فارقها؛ لكن صدقيني أنت زي الفل محتاجة بس حد يعرف قيمة مشاعرك ويحترمها.

لو عايز تفضفض لنا دوس هنا