إزاي الشعب يكتب دستوره؟

بعيدا عن المشكلات المُثارة حول لجنة كتابة الدستور.. نكتب في هذه السطور باختصار وببساطة كيف يشارك كل مواطن في كتابة دستوره.

كلنا يعرف أن الدستور هو العقد المبرم بين كل المواطنين وبعضهم، والذي على أساسه سنعرف كيف ستكون الدولة في المستقبل (اضغط هنا لتعرف معنى الدستور تفصيليا)
تمام..
عايزين نعرف إزاي المواطن المصري العادي يشارك في كتابة الدستور..
لجنة الدستور أو اسمها الصحيح "الجمعية التأسيسية للدستور" أنشأت موقعا إلكترونيا خاص باستقبال اقتراحات المواطنين لمواد الدستور.. بعنوان "دستور مصر"
يعني لو في عندك اقتراح حول مادة معينة في الدستور بأن يتم إضافتها في الدستور الجديد، أو مثلا أنك شغال في مجال معين وشايف إن فيه مشكلات في شغلك بسبب بعض القوانين اللي موجودة في البلد؛ خش على الموقع ده واكتب مقترحك.
ومش لازم تكون خبير في صياغة الدستور علشان تخش وتقول رأيك؛ الموضوع ببساطة خش.. وعبّر عن رأيك حتى لو هتكتب بالعامية -زي المقال اللي أنت بتقراه ده مكتوب بالعامية- أظن مافيش أبسط من كده.
هدّي لك مثال على المقترحات..
واحد شغال مدرس.. وشايف إن حقوق المدرسين في مصر مهدرة؛ لأن مافيش مادة في الدستور تكفل مقام ومكانة المدرس في البلد.
فدخل وكتب: "يا ريت تكون فيه مادة في الدستور تصون كرامة ومكانة المعلمين، وتوضح إن المعلم بيقدم رسالة نبيلة في المجتمع، وهو المسئول عن تربية الأجيال مش بس تعليمهم؛ لأن الوزارة اسمها التربية والتعليم".
يعني هم في الجمعية بتاعة الدستور دي هيخدوا بالكلمتين اللي هاكتبهم على الموقع بتاعهم ده؟؟
سؤال وجيه والله.. سامع قارئ بيسأله.. والإجابة هي: أيوه هياخدوا بيه؛ لأن الجمعية التأسيسية للدستور شكّلت لجنة خاصة لاستقبال مقترحات القوانين حول الدستور، وعرضها على لجنة قانونية مختصة لدراستها جيدا، والعمل بها في إعداد كتابة الدستور.
الموضوع مهم جدا.. لازم كلنا نشارك في كتابة الدستور ونبقى إيجابيين.
سامع واحد بيسأل ويقول لي: أنا عايز بالتفصيل أعمل إيه لما أخش على موقع كتابة الدستور.. وإزاي أكتب جواه المقترح بتاعي؟؟
تعال مع بعض نعرف ده واحدة.. واحدة..
افتح صفحة نت..
وخش على الموقع ده (هنا)
هتظهر لك الصفحة دي:
أضف جاليري:
دستور
* سبوت لايت
اضغط على الصورة لمشاهدة الجاليري:
أول حاجة هتلاقيها على يمين الصفحة بيقول لك: "اختار اللجنة الرئيسية"، وهتلاقي فيها خيارين: الأول: "اللجنة الرئيسية لنظام الحكم"، والثاني: "اللجنة الرئيسية للقوانين الأساسية".
هتختار إيييييه؟؟
لو كان مقترحك يتعلق بنظام الحكم.. يعني مثلا بتقول: "أنا عايز نظام الحكم يبقى برلماني"، أو "أنا عايز نظام الحكم يبقى رئاسي"، أو "أنا عايز نظام الحكم يبقى متخلط برلماني رئاسي"؛ يبقى تختار الكلام أول حاجة "اللجنة الرئيسية لنظام الحكم".
ولو أنت عايز تحط مقترحك عن أي حاجة تانية غير نظام الحكم: يبقى اختار تاني حاجة؛ وهي "اللجنة الرئيسية للقوانين الأساسية".
الاختيار اللي بعد كده بيقول: "اختار اللجنة الفرعية"، وهتلاقي فيهم أربع حاجات: "اللجنة الفرعية للحريات العامة"، و"اللجنة الفرعية للمقومات السياسية للمجتمع"، و"اللجنة الفرعية للمقومات الخلقية والاجتماعية"، و"اللجنة الفرعية للمقومات الاقتصادية".
بتختار واحدة من دول حسب المقترح اللي هتكتبه؛ يعني هتختار أول حاجة "اللجنة الفرعية للحريات العامة" لو كنت بتقول في مقترحك مثلا: "أنا عايز أكتب رأيي بحرية على فيسبوك من غير ما حد يحاسبني ما دام مش باكتب حاجة ضد الدين، ولا باشتتم حد باسمه"، لو كان مقترحك متعلق بحاجة زي كده يبقى تختار أول حاجة.. ولو كان مقترحك متعلق بحاجة سياسية تختار تاني حاجة -وأظن دي مش محتاجة شرح- أما بقى لو كان مقترحك متعلق بالأخلاق اللي أنت شايف إنها لازم تبقى موجودة في الدولة؛ فهتختار تالت حاجة "اللجنة الفرعية للمقومات الخلقية والاجتماعية"؛ زي مثلا واحد اقترح وقال: "يجب محاسبة أي شخص يقول كلام خارج وشتايم ضد شخص".. أو واحد اقترح إنه تبقى فيه مادة في الدستور بتقول "يجب غلق كل المواقع الإلكترونية الإباحية والمواقع التي تسبّ الأديان".. وهكذا، وهتختار لو كان اقتراحك متعلق بحاجة اقتصادية "اللجنة الفرعية للمقومات الاقتصادية"؛ يعني لو مثلا بتقول في اقتراحك: "عايز الدستور يحتوي على مادة بتلزم الحكومة بإعانة الشباب العاطلين عن العمل حتى يجدوا عمل".
بعد كده تكتب اسمك في خانة "اسم مقدم الاقتراح"، وبريدك الإلكتروني، ووظيفتك.
وأخيرا تكتب مقترحك في المربع الخاص بالمقترحات.. اللي مكتوب عليه "اكتب مقترحك"، وزي ما قلنا سابقا.. اكتب براحتك بالعامية أو الفصحى، بصيغة قانونية أو أي صيغة أنت تعرفها، المهم إنك تشارك، وفي الآخر تضغط على مربع "أضف مقترحك"، ويبقى كده مبروك عليك إنك شاركت بإيجابية في كتابة دستور مصر.
كل مواطن من حقه يقترح مادة في الدستور، وواجب على الجمعية التأسيسية للدستور أن تأخذ بهذه الاقتراحات، وفي النهاية الشعب المصري هو اللي هيوافق ويرفض الدستور اللي هتكتبه الجمعية دي في استفتاء نتمنى أنا يشارك فيه الجميع.. فالشعب هو المؤسس الوحيد للدستور.
اللهم ولِ علينا من يصلح.. واجعل لنا دستورا نحيا به في حرية وأمان وسعادة.