طماطم محشية بالسبانخ.. طبق مفيد وكله حديد

النهارده هنقدّم الطماطم المحشية والسبانخ بطريقة جديدة ومختلفة عن الطريقة التقليدية اللي إحنا متعوّدين عليها، جرّبيها وابعتي لنا رأيك فيها...
طماطم محشية بالسبانخ
المقادير:
* 1⁄2 كيلو سبانخ مفرومة
* 1⁄2 كيلو طماطم جامدة متوسطة الحجم
* 1⁄2 حزمة كزبرة خضراء مقطّعة قطع صغيرة
* ثمرة فلفل أخضر مقطعة قطع صغيرة
* 2 ملعقة كبيرة أرز مغسول ومصفّى
* 3 فصوص ثوم مقطّعة قطع صغيرة
* بصلة صغيرة مقطعة قطع صغيرة
* كوب صغير عصير طماطم
* كوب جبنة موتزاريلا
* 2 ملعقة كبيرة زبدة
* ملح وفلفل
الطريقة:
1- لتجهيز حشو الطماطم؛ شوّحي البصلة مع الزبدة على النار لمدة 10 دقائق أو لغاية لونها ما يبقى دهبي، وبعد كده ضيفي عليها السبانخ والثوم والكزبرة الخضراء والفلفل الأخضر، وقلّبيهم كلهم على نار هادية لمدة ربع ساعة، وبعد كده ضيفي عليهم عصير الطماطم والملح والفلفل والأرز، وسيبيهم على النار لمدة ربع ساعة.
2- هاتي الطماطم وقطّعي الجزء العلوي منها، وقوّريها واحشيها بالسبانخ ومن فوقيها رشّي الجبنة.
3- رصّي الطماطم في صينية بايركس ودخّليها الفرن على درجة حرارة متوسّطة لمدة نصف ساعة، أو لغاية ما تلاقي إن الطماطم استوت والجبنة دابت وبقى لونها دهبي، طلّعيها من الفرن ورصّي الطماطم في طبق التقديم.. وبألف هنا وشفا.
وبكده تكون خلصت وصفتنا النهارده..
يا ريت تجرّبوها وتبعتوا تقولوا لنا على النتيجة..
واستنونا بكره مع وصفة جديدة..
سلاااااااام،،،