مع رانيا.. اعملي بنفسك بلسم طبيعي لكل أنواع الشعر

أهلا بكل بنات "قمر 14" في حلقة جديدة من حلقات "جمالك من الطبيعة مع رانيا"، والنهارده وبناء على طلباتكم هنخصّص الحلقة لتحضير نوعين من البلسم الطبيعي لتغذية وتقوية ونعومة الشعر..
بلسم للشعر دون إضافات
المقادير:
62.5 جم مية بلسم (هتلاقيها عند العطار)
62.5 جم من شمع البلسم (هتلاقيها عند العطار)
3 كوب كبير ميه
الطريقة:
- هنحط الميه على النار لغاية ما تغلي، وبعد كده نضيف عليها شمع البلسم، مع التقليب برفق لغاية ما يدوبوا مع بعض ويتجانسوا تماما، ويغلوا مع بعض غلوتين تلاتة.

- بعد كده هنهدّي النار خالص، ونضيف مية البلسم، ومع التقليب هتلاحظي إن لون الميه بقى أبيض جيري، وبنستمر في التقليب من 4 : 10 دقائق بالكتير أوي.

- بعد كده ارفعي البلسم من على النار وسيبيه يبرد شوية لمدة 5 دقايق، وبعد كده حطّيه في برطمان زجاجي، والبلسم ده ممكن تحتفظي به لمدة سنة كاملة من غير ما يتأثّر بدرجة الحرارة.

إضغط لمشاهدة الفيديو:
بلسم بالأعشاب للشعر العادي والدهني
بلسم الأعشاب اللي هنحضّره دلوقتي بيساعد في علاج مشكلات الشعر؛ زي التقصّف والتساقط..
بلسم الأعشاب
المقادير:
62.5 جم مية البلسم
62.5 جم شمع البلسم
2 1⁄4 كوب كبير ميه مغلية
مقادير خليط الأعشاب:
ملعقة كبيرة لافندر
ملعقة كبيرة روزماري
ملعقة كبيرة كاموميل
كوب ميه

الطريقة:
- هنسخّن الميه على النار، وبعد كده نضيف عليها الأعشاب، مع التقليب باستمرار لغاية ما الخليط يغلي، ونسيبهم مع بعض على النار لغاية ما كمية المية تنقص وتبقى نصفها تقريبا.

- بعد كده بنصفّي مغلي الأعشاب، مع مراعاة الضغط على الأعشاب بالملعقة؛ علشان تنزّل كل الفايدة بتاعتها في الميه، وبكده نكون جهّزنا تقريبا 3/4 كوب من خليط الأعشاب.
إضغط لمشاهدة الفيديو:
- هنضيف مغلي الأعشاب اللي حضّرناه على مقدار الميه اللي عندنا (2 1⁄4 كوب كبير ميه مغلية)، ونحطّهم على النار علشان يغلوا مع بعض، وبعد كده بنضيف عليهم شمع البلسم، ونقلّبهم مع بعض لغاية ما يدوبوا تماما، وبعد كده بنهدي النار شوية، ونضيف مية البلسم ونقلّبهم مع بعض لمدة 4 أو 5 دقايق؛ بس نراعي إن النار تبقى هادية عليهم، وهنلاحظ إن اللون بقى بيج مش أبيض زي البلسم التاني؛ بسبب وجود الأعشاب.

- وبعد كده بنرفع البلسم من على النار، ونسيبه يهدي شوية ونشيله في برطمانات زجاجية.

- ممكن نضيف ملعقة من عسل النحل على كل أنواع البلسم اللي عملناها؛ بس بعد ما البلسم يبرد تماما، وبكده يبقى عندنا بلسم بالعسل.
إضغط لمشاهدة الفيديو:
وبكده خلصت حلقتنا النهارده..
نتمنى إنكم تجرّبوا البلسم اللي عملناه وتبعتوا تقولوا لنا على النتيجة..
سلاااااااااااااااااااااام،،،