البنتين اللي حبيتهم بيتخانقوا عليّ ومش عارف أعمل إيه؟؟

السلام عليكم ورحمة الله وبركاته.. باشكر "بص وطل" جدا على مساعدته لينا كقرّاء واهتمامه بمشاكلنا.. أنا آسف لو هطوّل عليكم.
أنا اتعرّفت على واحدة من 3 سنين، وهي حبيتني جدا، وأنا لمّا قرّبت منها بادلتها نفس الشعور، كنا بنقابل بعض قليل جدا يمكن كل شهرين مرة.. معظم كلامنا كان تليفون أو على النت، هي إنسانة عاقلة لأبعد حد تقريبا مافيهاش أي عيب.. طيبة وشاطرة وناجحة في شغلها وبتحب شغلها وبتحبّني أكتر.
عيبها الوحيد إنها بعيدة عني لأنها من محافظة تانية، وعشان أشوفها لازم أسافر ده إذا وافقت أصلا؛ لأن مبدأ المقابلات الكتير كان مرفوض عندها، رفضِتْ عرسان كتير أوي عشاني، وعلى طول فيه مشكلات مع أهلها؛ بسبب رفض العرسان ده, استحملت كتير أوي بسبب إننا بعيد عن بعض.
الوضع ده -مع الأسف- فتح لي باب الخيانة، اتعرّفت على واحدة تانية وقرّبت منها، وكنا بنكلّم بعض كتير، ولقيتها كل يوم بتقرّب مني أكتر ومهتمة بيّ أكتر، وماعندهاش مانع نشوف بعض في أي وقت، هي إنسانة كويسة مش وحشة، بس أسلوبها ومبادئها مختلفة عن حبيبتي الأولى.
فضلت أقرّب منها وأكلّمها يوميا وأخرج معاها تقريبا كل أسبوع لحد ما اتعوّدت عليها أوي، أو بمعنى أصح حبيتها، مع العلم إني لسه بحب حبيبتي الأولى وعمري ما هابطّل أحبها أبدا؛ يعني بقيت بحب اتنين, فعلا بحبهم هما الاتنين ممكن ماتصدّقوش كلامي أو تعارضوه، بس فعلا أنا بحبهم هما الاتنين، وماقدرش أستغنى عن واحدة فيهم.
لحد ما حبيبتي التانية جت في مرة ومسكت موبايلي وشافت الرسايل اللي عليه، وعرفت أمر حبيبتي الأولى، ودي كانت بداية مشاكل كتير حصلت لما الاتنين عرفوا بعض، وكلّموا بعض في التليفون من ورايا.. من ساعة ما كلّموا بعض وأنا كل يوم في خناقات ومشاكل مع كل واحدة فيهم.
أنا عايز أختار واحدة فيهم وحياتي تستقر معاها.. أختار الأولى وأسيب التانية اللي كانت عايشة ليّ واديتني كل حب واهتمام وسلّمت لي قلبها وأجرحها بعد ده كله؟ ولّا أختار التانية وأسيب الأولى اللي عاشت مع أهلها في نكد ليل نهار بسببي، ورفضت عرسان أفضل مني بمراحل؛ بسبب حبها ليّ، وأطلع ندل معاها بعد ده كله؟!!
أنا عارف إن أنانيتي وطمعي هم اللي حطّوني في المشكلة دي، بس يا ريت تساعدوني وتنصحوني.
matador
صديق "بص وطل" العزيز.. إنني بعد قراءة رسالتك تذكّرت مقولة "مِن أعمالكم سُلّط عليكم".
فأنتَ يا صديقي في وضع خطأ الآن ووضع خطأ منذ البداية، وعلى حد قولكَ فإن حبيبتك الأولى تُقيم في محافظة أخرى، وإنك لم تَذْكُر كيف تعرّفت عليها، وأعتقد أنه عن طريق النت، وحتى إن لم يكن هذا فأنت تقريبا لا تعرفها؛ وذلك بسبب عدم التعامل معها، وإن كلامك عبر التليفون أو شبكة الإنترنت ليس كافيا لمعرفة شخص معرفة جيدة.
وأنا أحترم هذه الفتاة في الحفاظ على نفسها؛ فأنت ليس من حقوقك أن تراها وتخرج معها، وكان يجب عليكِ أنك تتقدّم لها رسميا لو بتحبها فعلا زي ما بتقول؛ لأن ده هيخلّيك تعرف تشوفها، وتتكلّم معاها وتعرفها أكتر، وكمان هتكون ملتزم أكتر أمام أهلها حتى لو ظروفك لا تسمح الآن على الأقل كان ممكن يكون فيه خطوبة رسمي.
ولكن أشعر من شخصيتكَ أنك متردد جدا، أما بالنسبة لبُعدها عنك فهذا ليس سببا للخيانة تماما؛ لأن الوضع لو تغيّر وهي اللي عملت كده في الحالة دي هل هتقدر تسامحها ولا لأ؟!! يا ريت تفكّر، فكل مبرراتك غير منطقية.
وكل أسبابك إنها بعيدة عنك وإنك مش بتشوفها كتير.. كل ده مش مبرر أو سبب للخيانة خالص، أو إنك تتعرّف على واحدة تانية لو إنت حاسس إن بُعدك عنها حاجة مش مريحاك، وإنك في محافظة غيرها كان ممكن تسيبها، لكن الكذب والخيانة مش مبرر لأي ظروف في الدنيا.
ولا مبرر إنك تعلّق إنسانة تانية بيك عشان احتياجاتك، وإنك تخرج وتشوفها صديقتي ده عدم تحمّل للمسئولية، وأنا أعتبر كل التصرفات دي تصرفات مراهق وشخص غير مسئول.
ولكن الله أراد أن تعرف حبيبتك التانية الحقيقة، وكمان تكلّم حبيبتك الأولى على الرغم من وجودها في محافظة أخرى ومن الصعب إنها تعرف إنك بتخونها، ولكن هذا ما حدث.
صديقي.. الفتاتين سواء الأولى أو الثانية مش عربيات ولا سِلعة للشراء لتختار بينهم المناسبة لك، وحتى لو اخترت بينهم ما تفتكرش إنهم هيسامحوك على خيانتك؛ سواء لحبيبتك الأولى أو الثانية، واللي إنت بتفكّر فيه ده بسبب الإحساس بالذنب تجاههم مش عشان بتحبهم هما الاثنين؛ لأن مش هو ده الحب.
صديقي.. كل هذا بسبب الأنانية وإنك ما اكتفيتش بواحدة فقط، ولكن أنت تريد كل شيء.. عليكَ الآن أن تحدّد ماذا تريد وأن تقتنع باختيارك، ويجب أن تعلم إن مش كل حاجة في الدنيا بتاخدها، ولازم قبل ما تفكّر إنك ترتبط تبقى قادر على تحمّل المسئولية، ولا أعتقد إن واحدة منهم ممكن تسامحك على هذه الخيانة.. يجب عليك الابتعاد فترة عنهم، وأن تتخذ القرار المناسب وتتحمّل مسئوليته، وأنصحك بعد اختيارك أن ترضَى بما قَسَمه الله لكَ، وأتمنّى من الله أن يُوفّقك.
لو عايز تفضفض لنا دوس هنا