كشف المستور

أنا مشكلتي إن ما فيش مشكلة، حياتي فاضية، أنا صحيح باعمل دراسات عليا؛ لكن باحس إني لوحدي ما فيش حد في حياتي لأن نفسي أول إنسان أحبه يكون هو الإنسان اللي هاتجوزه، مش عارفة عدم ارتباطي ده صح ولا غلط لأني بارفض أي ارتباط غير رسمي. فيه ناس لما بتعرف إن عمري ما ارتبطت بتقول لي يا إما إنت كدابة يا إما مش طبيعية، مش عارفة إيه الصح؟ بالذات إني لما بيتقدم لي حد رسميا باحس إني خايفة منه: يا ترى هيحافظ علي ولا لا؟ لأنه إنسان ما اعرفهوش.
مش عارفة أعمل إيه؟ أسيب مشاعرى وأحب، ولا أرتبط رسمي بحد ما اعرفهوش كويس وزي ما تيجي؟ على فكرة لو قلتم نسأل عنه كويس هاقول لك: ياما فيه ناس سألوا والناس قالوا كويس؛ بس بتظهر حاجات مش بتبان غير لأقرب الناس، وطبعا مش سهل إنك تعرفي كتير عن بني آدم لمجرد السؤال عنه.
أمينة


صديقتنا العزيزة,
أنا معاك أن سؤال الناس عن شخص معين مش بيكشف حقيقة الشخص كلها؛ بس فيه حاجات مش ممكن تستخبى، وده اللي بيفيد في السؤال عنها, يعني لو سألت عن عريس متقدم لك في محل إقامته أو عمله، ممكن قوي تعرفي هل عائلته كويسة ولا لا, بتعرفي مين والده ووالدته وأخواته وأعمامه وأخواله, هل الأسرة مفككة ولا مترابطة, هل في أسرته أشخاص مجرمين أو سيئي السمعة.. وهكذا.
يعني بتعرفيه بصفة عامة, وطبعا فيه صفات مش بتبان إلا بالاحتكاك المباشر, وعلشان كده لازم يبقي فيه فترة خطوبة كافية, علشان التعامل المباشر في المواقف المختلفة هيبين الحاجات اللي أنت عاوزة تعرفيها, هل هو بخيل ولا عصبي ولا بتاع بنات؟ ودي صفات حتى لو قدر يخبيها لفترة؛ فهيتكشف في موقف معين بالصدفة, فهتعرفي هل هو عصبي ولا لا من قيادته للسيارة أو تواجده في الأماكن المزدحمة, هتعرفي هل هو عنيد وقاسي ولا لأ لو حصلت مشكلة بينك وبينه أو بينه وبين أهلك, هتعرفي هل هو بخيل ولا حريص وهو بيشتري حاجة, وهتعرفيه أكتر من المواقف اللي هو بيحكيها لك، واللي حصلت له في شغله أو بيته مع أهله, هل هو طموح ولا وصولي ولا استغلالي... وهكذا.
وعلشان كده لازم تبقى البنت حريصة في بداية الخطوبة، وتحاول تقرب من خطيبها -طبعا في ظل الحدود اللي بيسمح بها الشرع- علشان يصارحها بكل ما في حياته, وتقدر تعرف عنه كل اللي هي عاوزة وتطمن من ناحيته. ولو اكتشفت إن فيه طباع لا يمكن تتقبلها فوقتها لازم تنفصل عنه من غير ما حد يقنعها إنه ممكن يتغير؛ لأنه للأسف ناس كتير بتسأل عن العريس اللي بيتقدم لبنتهم وبيعرفوا عنه حاجة ما تطمنش، ومع كده بيكملوا الخطوبة ويتم الجواز وبينتهي يا إما بالطلاق يا إما بتستمر حياة لا تطاق.
مش معني إنك خايفة تتخطبي لشخص ما تعرفيش عنه حاجة إنك تدخلي في علاقة مع شخص مش ممكن أبدا تعرفي عنه حاجة غير اللي هو بيقولها لك؛ لأن في علاقة الارتباط سهل قوي إن الشخص يكذب وما يقولش حتى اسمه صح؛ أما في الجواز فالعريس حتى لو قدر يخبي حاجة فلازم هينكشف المستور.
فأرجوك اثبتي على موقفك, ومش معنى إنك لحد دلوقتي ما ارتبطتيش بحد إنك مش طبيعية؛ فده بالعكس بيثبت إنك إنسانة ملتزمة ومحترمة؛ فمش معنى إن كل البنات والشباب بيرتبطوا إن ده صح؛ فالطبيعي إن كل واحد مننا جواه رغبة أنه يحب ويتحب؛ بس فيه شرع ودين وأهل ومجتمع لازم نحترمهم, وكون إني أقاوم رغباتي علشان أرضي ربنا وأعمل الصح؛ فده معناه إني شخص ملتزم ومتدين بيخاف ربنا وبيحترم الناس.
فأرجوك ما تستلميش لشياطين الجن أو الإنس واثبتي على موقفك, وربنا يعوضك بالزوج الطيب الصالح وكل البنات يا رب.